I Corintied 5

₁Brudet eo dre holl penaos ez euz en ho touez dizurzou, ha dizurzou ker braz, ma n’int ket anavezet zo‐ken e‐touez ar Jentiled; unan‐benag ac’hanoc’h hen deuz kemeret greg he dad. ₂Hag ez oc’h c’hoas c’houezet gant an ourgouil! Ha n’hoc’h euz ket, kentoc’h, kemeret gla‐c’har, evit ma vije lammet euz ho touez an hini hen deuz great kement‐se? ₃Evidoun‐me, absant a gorf, mes prezant a spered, em euz barnet dija, evel pa vijen prezant, an hini hen deuz great kement‐se: ₄(en hano hon Aotrou Jesus‐Christ, c’houi o veza en em dastumet assambles, ha me ganeoc’h a spered, gant galloud hon Aotrou Jesus‐Christ,) barnet em euz, ₅eur seurt den‐ze da veza livret da Satan, ma vezo distrujet ar c’hig, ha ma vezo salvet ar spered e dervez an Aotrou Jesus. ₆Ne zere ket ouzoc’h en em c’hlorifia. Ha na ouzoc’h‐hu ket penaos eun tammic goell a laka an toaz holl da c’hoï? ₇Taolit er meaz eta ar goell koz, evit ma viot eun toaz nevez, evel ma’z oc’h hep goell; rag ar C’hrist, hor Pask‐ni, a zo bet offret en sacrifis evidomp. ₈Rag‐se, miromp ar gouel, nann gant ar goell koz, na ken‐neubeud gant goell ar valiç hag an drougviez, mes gant ar baraou hep goell euz al lealded hag euz ar wirionez.

₉Scrivet em euz deoc’h em lizer diwall deuz compagnunez an dud impudic; ₁₀ne fell ket d’in lavaret kement den impudic a zo er bed, pe an dud touellet gant an avaristed, al laeron, pe adorerien an idolou; anez e vije red deoc’h mond er meaz euz ar bed; ₁₁mes ar pez em euz scrivet deoc’h eo kement‐man: Mar d’euz unan‐benag a c’halver breur, hag a zo impudic, pe avar, pe servicher an idolou, pe teod fall, pe mezvier, pe laer, diwallit da gaoud darempred ganthan, na zo‐ken da zibri assambles gant eur seurt gwall den. ₁₂Rag, da betra em euz‐me ezom da varn ar re a zo en diaveaz? Ha n’eo ket deoc’h‐hu eo da varn ar re a zo en diabarz? ₁₃Evit ar re a zo en diaveaz, Doue a varno anezhe. Lammit eta an den fall euz ho touez.