I Timoteus 2

₁Exhorti a ran eta, araog pep tra, ma vezo great goulennou, pedennou, supplicationou hag actionou a c’hras evit an holl dud; ₂evit ar rouane, hag ar re holl a zo er c’hargou huel, evit ma c’hellimp heuil en peoc’h eur vuez tranqil, en pep piete hag honestis. ₃Rag kement‐se a zo mad ha deread dirag daoulagad Doue hor Zalver, ₄pehini a fell dezhan e vez salvet an holl dud, ha ma teufent da anaoud ar wirionez; ₅rag n’euz nemed eun Doue hep‐ken, hag eur Mediator hep‐ken etre Doue hag an dud, an den Christ Jesus, ₆pehini a zo en em roet he‐unan da rançon evit an holl; hennes eo an desteni roet en he amzer. ₇Evit an desteni‐ze eo, (ar wirionez a lavaran er C’hrist, ne lavaran ket a c’hevier,) ez oun bet lakeat da brezeger, da abostol ha da zoctor d’ar Jentiled er feiz hag er wirionez.

₈Me a fell d’in eta e pedfe an dud en pep leac’h, o sevel daouarn pur, hep coler hag hep chican; ₉hag er memeus doare ive, ma teui ar gragez d’en em gempen gant dillad deread, gant furnez ha gant honestis, n’e ket gant bleo ganset, na gant aour, perlez ha dillad coustus; ₁₀mes gant oberou mad, evel ma tere ouz merc’hed hag a ra profession da zervicha Doue. ₁₁Ra zeui ar vaouez da zelaou ar gelennadurez er silans, gant pep soumission; ₁₂rag ne bermettan ket d’ar vaouez kelen, na kemeret otorite var ar goaz; mes ar silans a dle da zerc’hel. ₁₃Rag Adam a zo bet great da genta, hag Eva goude‐ze. ₁₄Ha n’e ket Adam a zo bet tromplet; mes ar vaouez, o veza bet tromplet, a zo bet kwezet er pec’hed. ₁₅Koulskoude saveteet e vezo o tond da veza mam, mar kendalc’h gant modesti er feiz, er garantez hag er zantelez.