Hebreed 4

₁Diwallomp eta, gant aoun, goude ma eo bet lezet ganeomp ar bromessa da antren en he repos, ne zeblantfe unan‐benag ac’hanoc’h beza renonset da gement‐se. ₂Rag deomp‐ni, koulz ha dezhe, eo bet great ar bromessa eürus‐se; mes ar gomz‐se ho doa klevet na brofitaz ket dezhe, rag ar re a glevaz anezhi, a choumaz hep credi. ₃Evidomp‐ni, pere hon euz credet, a antre er repos, hervez ma hen deuz lavaret: Dre‐ze em euz touet em c’holer, na antreint biken em repos! Koulskoude peur‐c’hreat e oa he œuvrou abaoe crouidigez ar bed; ₄rag ar Scritur he deuz lavaret en eun tu‐benag, divarben ar seizved devez: Ha Doue a reposaz ar seizved devez euz he holl oberou; ₅hag aman c’hoas: Ne antreint biken em repos! ₆Pa’z eo gwir eta ez ai hinienou ebarz, ha pa n’eo ket antreet, o veza ma oaint incredul, ar re da bere e oa great da genta ar bromessa eürus‐se, ₇Doue a verk c’hoas eun dervez, dre ar gomz‐man: Hirio, en eur lavaret dre Zavid, ken pell amzer goude, evel ma’z eo bet lavaret huelloc’h: Hirio mar selaouit he vouez, na galedit ket ho calonou. ₈Rag mar hen divije Josue lakeat anezhe da antren ebarz er repos, neuze Doue na gomzje ket goude‐ze divarben eun devez all. ₉Choum a ra eta c’hoas gant pobl Doue eur repos a zabbat. ₁₀Rag an hini a zo antreet en he repos, a ziskuiz ive euz he oberou he‐unan, evel Doue euz he re. ₁₁Lakomp eta hor poan da glask antren er repos‐se, gant aoun na deufe unan‐benag da gweza en eur seurt revolt.

₁₂Rag ger Doue a zo beo, ha nerzus, ha lemmoc’h eged kleze e‐bed lem euz an daou du, treuzi a ra beteg an disparti euz an ene hag euz ar spered, beteg ar juntrou ha mel an eskern, ha barna a ra ar sonjezonou hag ar c’hoantaennou kuzet euz ar galon. ₁₃N’euz crouadur e‐bed hag a vez kuzet dirazhan, mes an holl draou a zo noaz ha dizolo da zaou‐lagad an hini da behini a tleomp renta count.

₁₄Pa’z eo gwir eta hon euz eur Beleg‐braz, pehini hen deuz treuzet an envou, Jesus, Mab Doue, dalc’homp stard hor profession a feiz. ₁₅Rag n’hon euz ket eur Beleg‐braz ha na hell ket kaout truez euz hon infirmiteou, er c’hontrol, amprouvet eo bet e pep tra, evel‐domp‐ni, mes hep pec’hed. ₁₆Tostaomp eta gant fizians ouz tron ar c’hras, evit ma recevimp trugarez, ha ma kavimp gras, evit beza sicouret en amzer ma vezo dleet.