Hebreed 5

₁Rag, peb Beleg‐braz, kemeret euz a‐douez an dud, a zo lakeat evit an dud en traou a zell ouz Doue, evit offr donezonou ha sacrifisou evit ar pec’hejou. ₂Gallout a ra kaout truez ouz ar re a zo en ignorans hag en errol, pa’z eo gwir ema he‐unan e‐kreiz ar zempladurez. ₃Hag abalamour da ze e tle ober offransou evit he bec’hejou he‐unan kerkoulz hag evit pec’hejou ar bobl. ₄Ha den na hell kemer an henor‐ze evithan he‐unan, nemed an hini a zo galvet gant Doue, evel Aaron. ₅Evel‐se ive ar C’hrist n’hen deuz ket kemeret evithan he‐unan ar gloar da veza Beleg‐braz, mes hen recevet hen euz digant an hini hen deuz lavaret dezhan: Te eo va Mab, hirio em euz da engehentet. ₆Evel ma lavar ive dezhan en eul leac’h all: Te a zo Beleg da viken, hervez urz Melkisedec. ₇Hennes eo an hini pehini, e‐pad an deiziou euz he vuez er c’hig, o veza offret gant scrij ha gant daelou, pedennou ha supplicationou d’an hini a helle hen sauvetaad euz ar maro, hag o veza bet delivret abalamour m’hen doa doujans evithan, ₈petra‐benag ma oa Mab, hen deuz desket ar zentidigez dre an traou hen deuz gouzanvet, ₉hag o veza bet rentet parfet, ez eo deuet da veza an oberour euz ar zilvidigez eternel evit ar re holl a zent outhan; ₁₀o veza bet galvet gant Doue Beleg‐braz, hervez urz Melkizedec.

₁₁Var ar poent‐se hon euz kalz a draou da lavaret, hag a zo dies da zisplega, abalamour ma’z oc’h deuet da veza gorrec da gompren. ₁₂Rag e‐leac’h beza mistri, evel ma tlejec’h beza abaoe pell amzer, hoc’h euz c’hoas ezom da zeski ar c’henteliou kenta euz a gomzou Doue; hag ez oc’h deuet da gaoud ezom a leaz e‐leac’h a voued krenv. ₁₃Hogen, an hini en em vag gant leaz, na gompren ket komz ar justis; rag n’ed eo nemed eur bugel bihan. ₁₄Mes ar boued krenv a zo evit an dud en oad, evit ar re pere, dre ma’z int custum, ho deuz eur Spered exercet da zifferansi an droug hag ar mad.