S. Jakes 4

₁Abe leac’h e teu en ho touez an disputou hag ar c’hannou? Ha n’eo ket euz ho kwall‐ioulou pere a ra brezel en hoc’h izili? ₂C’hoantaad a rit, ha na hellit ket kaoud; c’houi a zo muntrerien ha leun a jalouzi, ha ne hellit ket beza contantet; c’houi a stourm hag a ra brezel, ha na recevit netra, rag ne c’houlennit netra. ₃Goulen a rit, ha na recevit ket, abalamour ma c’houlennit fall, hag evit contanti ho kwall‐ioulou. ₄Goazed ha merc’hed avoultr, ha na ouzoc’h‐hu ket penaos karantez ar bed a zo eur gassoni a‐enep Doue? Piou‐benag eta a fell dezhan beza mignon d’ar bed, en em laka da veza adversour da Zoue. ₅Ha c’houi a gav deoc’h e komz ar Scritur en ven? Ar Spered pehini a ra he zemeurans enomp, daoust hag hen hen deuz c’hoantaennou hag a zoug d’an anvi? ₆Er c’hontrol, rei a ra eur c’hras vrassoc’h. Dre‐ze ar Scritur a lavar: Doue a stourm ouz ar re ourgouillus, mes rei a ra gras d’ar re humbl. ₇En em zoumetit eta da Zoue; stourmit ouz an diaoul, hag e tec’ho diouzoc’h. ₈Tostait ouz Doue, hag hen a dostai ouzoc’h. Netait ho taouarn, pec’herien, ha c’houi, pere a zo daou‐hanteret ho calon, purifiit, ho calonou; ₉santit ho mizer, bezit evel en kaon, ha gouelit; ra vezo ho c’hoarz troet en daelou, hag ho choa en tristidigez. ₁₀En em humiliit dirag an Aotrou, hag hen a zavo ac’hanoc’h.

₁₁Breudeur, na zroug‐komzit ket an eil divarben egile. An hini a zroug‐komz divarben eur breur, hag a gondaon he vreur, a zroug‐komz divarben al lezen, hag a varn al lezen. Hogen mar barnez al lezen, ne zentez ket ouz al lezen, mes barna a rez anezhi. ₁₂N’euz nemed Unan hep‐ken hag a ra al lezen, hag a hell savetaad ha koll. Te, piou oud‐de, evit barna ar re all?

₁₃Breman e komzan ouzoc’h‐hu pere a lavar: Hirio pe varc’hoas ez aimp d’ar gearman pe d’ar gear‐zont, hag e choumimp eno eur bloavez, hag e tratikimp, hag e c’hounezimp. ₁₄Hogen, ne ouzoc’h ket petra a vezo varc’hoas; rag petra eo ho puez? N’ed eo nemed eur vogeden pehini en em ziskouez evit eun neubeud amzer, ha neuze a ia kuit. ₁₅E‐leac’h ma tlefec’h lavaret: Mar fell d’an Aotrou, ha mar choumomp beo, e raimp an dra‐man pe an dra‐ze. ₁₆Mes breman, en em c’hlorifiit en ho fougeou. Pep gloar euz ar seurt‐se a zo fall. ₁₇Hennes eta pehini a anavez ar mad ha n’hen gra ket, a zo eur pec’her.