Apocalyps 9

₁Hag ar pemved eal a zonaz gant he drompil, hag e veliz eur stereden kwezet euz an env d’an douar; hag alc’houez punz an abim a oe roet d’an eal‐ze. ₂Hag e tigoraz punz an abim, hag e savaz euz ar punz eur vogeden, henvel ouz moged eur forn vraz; hag an heol hag an ear a oe tenvaleet gant ar moged euz ar punz; ₃hag euz ar moged‐se e teuaz killeienraden pere a zeuaz da c’holo an douar; ha roet e oe dezhe eur galloud henvel ouz galloud ar scorpioned euz an douar. ₄Hag e oe lavaret dezhe diwall da ober droug e‐bed d’ar yeot euz an douar, na da netra a c’hlaz, na da vezen e‐bed; nemed hep‐ken d’an dud n’ho deuz ket siel Doue var ho zal. ₅Hag e oe roet dezhe ar galloud, nann d’ho laza, mes d’ho zourmanti e‐pad pemp mis, hag ho zourmant a oa henvel ouz an hini a ra ar scorpion pa ro eun taol‐flem da eun den. ₆En deiziou‐ze an dud a glasko ar maro, ha n’her c’havint ket; hag e c’hoantaint mervel, mes ar maro a dec’ho kuit diouthe. ₇Ar c’hilleien‐radenman a oa henvel ouz kezec prest evit ar brezel; bez’ e oa var ho fennou evel curunennou henvel ouz aour, hag ho bizach a oa henvel ouz bizach tud. ₈Bleo ho doa hag a oa evel bleo merc’hed, hag ho dent a oa henvel ouz dent leoned. ₉Beza ho doa cuirasennou evel cuirasennou houarn; hag an drouz euz ho diou‐askel a oa henvel ouz trouz kirri ha kalz a gezec o redec d’ar brezel. ₁₀Beza ho doa lostou henvel ouz lostou ar scorpioned, hag eur flem en ho lost; hag ho galloud a oa da noazoud d’an dud e‐pad pemp mis. ₁₁Beza ho doa varnezhe eur roue, eal an abim, galvet enn hebreach Abaddon, hag en gregach Apollyon (Distrujer).

₁₂Ar c’henta gwalen tremenet, setu ma teu c’hoas diou walen all goude honnes.

₁₃Hag ar c’houec’hved eal a zonaz gant he drompil; hag e kleviz eur vouez o tond euz a bevar c’horn an aoter aour a zo dirag Doue, ₁₄hag a lavare d’ar c’houec’hved eal a oa an drompil ganthan: Tenn ho liammou d’ar pevar eal a zo stag var ar ster vraz Euphrates. ₁₅Kerkent e oe distaget ar pevar eal pere a oa prest d’an heur, d’an deiz, d’ar mis, d’ar bloaz, da laza an derved loden euz an dud. ₁₆Hag an niver euz a gavalierien an arme‐ze a oa daou c’hant milion; rag klevet a riz an niver anezhe. ₁₇Hogen evel‐hen e veliz ar c’hezec er vision; ar re a oa var ho c’hein ho doa cuirasennou a liou tan hag hyacinth ha soufr; pennou ar c’hezec a oa henvel ouz pennou leoned, hag euz ho genou e teue tan, ha moged, ha soufr. ₁₈An drederen euz an dud a oe lazet gant an tri dra‐man, gant an tan, gant ar moged, ha gant ar soufr a zeue er meaz euz ho genou. ₁₉Rag ho galloud a oa en ho genou, hag en ho lostou, hag ho lostou, henvel ouz serpanted, ho doa pennou; ha gant ar re‐man e reant drouk. ₂₀Hag ar rest euz an dud pere ne oant ket lazet gant ar gwalennou‐man n’ho doe ket a geuz euz a oberou ho daouarn, evit paouez da adori an diaoulou hag an idolou aour, hag arc’hant, ha mean ha coat, pere na hellont na gwelet, na klevet, na bale. ₂₁N’ho doe ket a geuz euz ho lazerezou, nag euz ho zorselachou, nag euz ho libertinach, nag euz ho laeronsiou.