Matteiu 13

₁In quellu ghiornu Ghiesù essendu surtitu di a so casa, pusava vicinu a u mare.

₂E siccome s’ eranu riunite molte ghienti, cullò sopra ad una piccula barca, e si misse a pusà: e tutta la ghiente si ne stava su la riva,

₃Ed ellu si misse a parlà di molte cose in parabule, dicendu: Eccu che surtì a suminà un siminatore.

₄E mentre che ellu seminava, qualche granelle casconu su la strada, e l’ acelli di lu celu vensinu, e si li magnonu.

₅Altre granelle casconu in locu petrosu, duva avianu poca terra: e spuntonu quasi subitu, perchè nun avianu terra assai sopra d’ elle.

₆Ma quandu s’ alzò u sole, s’ infuconu: e siccome nun avianu radica, si sicconu.

₇Altre casconu in li pruni: e li pruni criscinu, e le suffuconu.

₈Altre poi casconu su la terra bona: e dedinu fruttu, qualchidune centu per unu, altre sissanta, altre trenta.

₉Che quellu, che ha l’ arechie per senta, senti.

₁₀E li so’ discipuli essendusi avvicinati li dissinu: Per cosa parli per mezu di parabule?

₁₁Ed ellu li rispose: Perchè v’ è datu a voi altri di cunoscia li misteri di lu regnu di li celi: e perchè nun è datu a elli.

₁₂A quellu, che ha, sarà datu, e sarà nel’ abbundanza: ma a quellu, che nun ha, li si cacciarà ancora quellu, ch’ ellu ha.

₁₃Ed è perciò, ch’ eiu li parlu in parabule: perchè videndu nun vedunu, sintendu nun sentunu, nè mancu capiscunu.

₁₄E s’ adempirà in elli la prufezia d’ Isaia, che dice: Sintirete cun le vostre arechie, e nun capirete: e guardarete cun li vostri ochi, e nun vidrete.

₁₅Lu core di stu populu s’ è impetratu, le so’ arechie si so’ indurite, li so’ ochi si so’ chiusi: nun vedunu cun l’ ochi, nè sentunu cun l’ arechie, nè capiscunu cun lu core, per pudessi cunverta, e perchè eiu possi guarilli.

₁₆Ma beati li vostri ochi, perchè vedunu, e le vostre arechie, perchè sentunu.

₁₇Vi dicu in verità, molti prufeti, e molti ghiusti hannu desidaratu veda le cose, che voi videte, e nun l’ hannu viste: e senta ciò, che sintite, e nun l’ hannu intesu.

₁₈State a senta un po’ la parabula di lu siminatore.

₁₉Qualunque sente la parola di lu regnu, e nun la capisce, vene u malignu, esi rubba quellu, ch’ era suminatu in lu so core: quessu è quellu, che ha ricivuta la sumente su la strada.

₂₀Lu suminatu su lu locu pitrosu, vo dì quellu, che sente la parola, e subitu la si piglia cun alligria:

₂₁Ma nun ha radica in sè, e allora nun è che per un tempu. Ma quandu li vene la tribulazione e la persecuzione per la parola, allora subitu è scandalizatu.

₂₂Lu suminatu in li pruni, vo dì quellu, che sente la parola: ma li penseri di lu mondu, e l’ ingannu di le ricchezze suffucanu in ellu la parola, e fannu, ch’ ella nun face fruttu.

₂₃Quellu poi, ch’ è suminatu in terra bona, vo dì quellu, che sente la parola, e la capisce, e in lu quale face fruttu, e rende qualche volta lu centu, altre volte lu sissanta, o lu trenta per unu.

₂₄Li propose un’ altra parabula, dicendu: Lu regnu di li celi sumigliasi ad un omu, che suminò di lu bon granu in lu so chiosu.

₂₅Quandu durmianu li so’ cumpagnoni, venne lu so nimicu, e suminò sopra lu ciogliu in mezu a lu granu, e poi si n’ andò.

₂₆Quandu poi fu crisciuta l’ erba, e ch’ ella ebbe fattu lu fruttu, allora cumparì lu ciogliu.

₂₇Li servitori di lu babbu di famiglia essendusi avvicinati, li dissinu: Signore, nun avii suminatu di la bona sumente in lu to chiosu? Per cosa ci si trova avà di lu ciogliu?

₂₈Ed ellu li disse: L’ omu me nimicu ha fattu questu. Li servitori li dissinu: Voi, che andiamu a cogliala?

₂₉Ed ellu rispose: No: di paura che cugliendu lu ciogliu, nun sradichiate ancora cun ellu lu granu.

₃₀Lasciate crescia l’ un e l’ altru finu a la raccolta, ed in lu tempu di la raccolta diciaragghiu a li cuglidori: Cuglite primu lu ciogliu, e fatine tante fascine per brugialle, e purtate u granu in lu me granaghiu.

₃₁Li prupose un’ altra parabula, dicendu: Lu regnu di li celi si sumiglia a la grana di la senapa, che un omu pigliò, e suminò in lu so chiosu.

₃₂Sta grana e la più minuta di le sumenti: ma comu ella cresce, diventa lu più magghiò di li ligumi, e diventa un alberu, in modu che l’ acelli di lu celu vengunu ad abità su li so’ rami.

₃₃Li disse un’ altra parabula. Lu regnu di li celi si sumiglia ad un pezzu di levitu, che la donna impasta in tre staie di farina, fintantu che nun sii tuttu livitatu.

₃₄Tutte ste cose Ghiesù le dicia a la ghiente in parabule: e nun li parlava che in parabule:

₃₅Affinchè s’ adempisse cosa è statu dettu da lu prufeta, dicendu: Apriragghiu a me bocca in parabule, faragghiu cunoscia e cose, che sonu state nascoste da u principiu di lu mondu.

₃₆Allora, avendu licenziatu tutta quella ghiente, si n’ andò in casa: e s’ avvicinonu li so’ discipuli, dicendu: Spiegaci la parabula di lu ciogliu di lu chiosu.

₃₇Ed ellu rispundendu li disse. Quellu, che semina la bona sumente, è lu Figliolu di l’ omu.

₃₈Lu chiosu, è lu mondu. La bona sumente, sonu li figlioli di lu regnu. Lu ciogliu, so’ li figlioli di lu malignu.

₃₉Lu nimicu, che la suminò, è lu diavulu. La raccolta, è la cunsumazione di lu seculu: li cuglidori, sonu l’ agnuli.

₄₀Adunque siccome si coglie lu ciogliu, e si brugia: cusì sarà in la cunsumazione di lu seculu.

₄₁Lu Figliolu di l’ omu mandarà li so’ agnuli, e scacciarannu di lu so regnu tutti li scandali, e quelli, che fannu di le iniquità:

₄₂E li ghittarannu in la furnace di lu focu. E culà ci sarà piantu, e stridu di denti.

₄₃Allora li ghiusti splendarannu come u sole in lu regnu di lu so Babbu. Che quellu, che ha di l’ arechie per senta, senti.

₄₄Lu regnu di li celi si sumiglia ad un tesoru nascostu in un chiosu: che un omu ritrova, e piatta, e poi pienu d’ alligria si ne va, e vende tuttu quellu, che ellu ha, e si compra quellu chiosu.

₄₅E ancora lu regnu di li celi si sumiglia ad un marcante, che ricerca di le bone perle.

₄₆Ed avendu truvatu una perla priziusissima, si ne va, e vende tuttu quellu, ch’ ellu ha, e la compra.

₄₇Ed ancora lu regnu di li celi è simile a una reta ghittata in mare, che piglia ogni ghienare di pesce.

₄₈Quandu ella è piena, li piscatori la tiranu in terra, e pusandu su la riva di lu mare, scegliunu li boni, e li mettunu indi li vasi, e l’ altri li ghiettanu.

₄₉Cusì sarà in la cunsumazione di lu seculu: surtirannu l’ agnuli, e separarannu li cattivi da mezu a li boni,

₅₀E li ghittarannu in la furnace di lu focu: culà ci sarà lu piantu, e lu stridu di li denti.

₅₁Avete capitu tutte ste cose? Risposinu: Sì Signore.

₅₂Ed ellu li disse: Ogni scriba struitu in lu regnu di li celi, è simile ad un babbu di famiglia, che caccia di lu so tesoru le cose nove e le cose vecchie.

₅₃E Ghiesù avendu finitu ste parabule, si n’ andò.

₅₄Ed essendusine turnatu in la so patria, insignava in le so’ sinagoghe, in modu che si maravigliavanu, e dicianu: D’ induva è ghiunta a quessu tanta sapienza, e tanti miraculi?

₅₅Nun è quessu lu figliolu di lu faligname? La so mamma nun si chiama ella Maria, e li so’ fratelli nun so’ Ghiacumu, e Ghiuseppe, e Simone, e Ghiuda:

₅₆E le so’ surelle, nun so’ tutte fra di noi? Adunque come sa ellu tutte ste cose?

₅₇E si scandalizavanu d’ ellu. Ma Ghiesù li disse: Lu prufeta nun è senza unore, forchè in la so patria, e in la so casa.

₅₈E culà nun fece tanti miraculi per causa di la loru incredulità.