Matteiu 14

₁In quellu tempu Erode lu tetrarca intese parlà di la riputazione di Ghiesù:

₂E disse a li so’ servitori: Quessu è Ghiuvanni Battista: è risuscitatu da li morti, ed è perciò, ch’ ellu face di li miraculi.

₃Erode avia fattu piglià a Ghiuvanni, e l’ avia ligatu e postu in prighiò per causa di Erodiade moglie di lu so fratellu.

₄Ghiuvanni li dicia: Nun t’ è permessu di tena ad ella.

₅E vulendu fallu mora, avia paura di lu populu: perchè u tinianu per un prufeta.

₆Ma lu ghiornu di la nascita d’ Erode la figliola di Erodiade ballò in mezu a tutti, e piacì ad Erode.

₇Allora ellu li prumisse cun ghiuramentu di dalli ciò, ch’ ella li dumandaria.

₈Ma ella, ch’ era stata struita da la so mamma: Dammi, li rispose, in un bacile lu capu di Ghiuvanni Battista.

₉E lu re ne fu tuttu afflittu: ma per via di lu so ghiuramentu, e per via di quelli, ch’ eranu culà, dede ordine di dallilu.

₁₀E mandò a taglià lu capu a Ghiuvanni in la so prighiò.

₁₁E lu so capu fu purtatu in un bacile, e datu a la zitella, che l’ ufferì a la so mamma.

₁₂E li so’ discipuli essendusi avvicinati, si piglionu lu so corpu, e lu suppellinu: e vinendu ne dedinu la nutizia a Ghiesù.

₁₃Ciò che sintendu Ghiesù, si n’ andò sopra d’ una barca, in un locu desertu e separatu: e quandu la ghiente lu seppe, partinu a pedi da la città per seguitallu.

₁₄E surtendu vidde una gran quantità di ghiente, ed ebbe cumpassione d’ elli, e guarì li loru infermi.

₁₅Ma essendu ghiunta la sera, s’ avvicinonu li so’ discipuli, dicendu: Stu locu è desertu, ed è tardi: licenzia sta ghiente, perch’ ella possa andandusine per li paesi cumprassi di che magnà.

₁₆Ma Ghiesù li disse: Nun è necessariu, ch’ elli si ne vadinu: datili di che magnà.

₁₇Li risposinu: Nun avemu che cinque pani, e dui pesci.

₁₈Ellu li disse: Purtatimili qui.

₁₉Ed avendu urdinatu a la ghiente di mettasi a pusà su l’ erba, prese li cinque pani, e li dui pesci, e guardandu lu celu li benedì, e li spezzò, e li dede a li so’ discipuli, e li discipuli li dedinu a la ghiente.

₂₀E tutti magnonu, e funu saziati. E di li resti, si ne purtonu dodici cufini pieni.

₂₁Quelli, che magnonu eranu in numeru di cinquemila omi, senza cuntà le donne, e li zitelli.

₂₂E subitu Ghiesù ubbligò li so’ discipuli a muntà sopra ad una barca, ed andà ad aspettallu sopra l’ altra riva, intantu ch’ ellu licenziasse la ghiente.

₂₃Ed avendu licenziatu la ghiente, si ne cullò sopra di un monte solu per pregà. E la sera essendu ghiunta era solu in quellu locu.

₂₄In stu frattempu la barca in mezu mare era sbattuta da l’ onde: perchè lu ventu era cuntrariu.

₂₅Ma quandu venne la quarta veglia di la notte, Ghiesù andò a truvalli marchiandu sopra lu mare.

₂₆E videndulu marchià sopra lu mare, si cunturbonu, dicendu: Quessu è un spiritu. E per paura si missinu a gridà.

₂₇Ma subitu Ghiesù li parlò, dicendu: Abbiate fiducia: so’ eiu, nun timete nulla.

₂₈Allora Petru rispundendu disse: Signore, se tu se’ tu, ordinami di vena versu di te sopra l’ acqua.

₂₉Ed ellu disse: Veni. E Petru scindendu di la barca, marchiava sopra l’ acqua per vena versu Ghiesù.

₃₀Ma videndu, che lu ventu era forte, ebbe paura: e come ella cuminciò ad andà a fondu, gridò dicendu: Signore, salvami.

₃₁E subitu Ghiesù stindendu la manu, l’ agguantò: e li disse: Omu di poca fede, per cosa hai dubbitatu?

₃₂E come elli funu cullati in la barca, lu ventu cessò.

₃₃Quelli poi, ch’ eranu in la barca, vensinu, e l’ aduronu, dicendu: Sei veramente lu Figliolu di Diu.

₃₄Ed essendu passati al di là di lu lagu, andonu in la terra di Ghienesar.

₃₅E quandu l’ omi di quellu locu l’ ebbinu cunusciutu, mandonu da per tuttu in lu paese, e li presentonu tutti quelli, che avianu male:

₃₆E u pregavanu di lascialli tuccà la falda di lu so vistitu. E tutti quelli, che la tucconu, guarinu.