Matteiu 20

₁Lu regnu di li celi è simile ad un babbu di famiglia, che surtì di gran mattina per appustà li lavuratori pe a so vigna.

₂Ed avendu cunvinutu cun li travagliatori di un danaru per la ghiurnata, li mandò in la so vigna.

₃Ed essendu surtitu inversu a la terza ora, ne vidde di l’ altri, che stavanu in piazza senza fà nulla,

₄E li disse: Andate anche voi in la me vigna, e cosa sarà ghiustu vi daragghiu.

₅Elli si n’ andonu. Surtì ancora versu l’ ora sesta, e nona: e fece l’ istessa cosa.

₆Versu l’ ora undecima surtì ancora, e ne truvò di l’ altri, che stavanu fermi: e li disse: Cosa state a fà qui tuttu lu ghiornu nel’ oziu?

₇Li risposinu: Percosa nissunu ci ha presu in ghiurnata. Ellu li disse: Andate ancora voi altri in la me vigna.

₈Quandu fu ghiunta la sera, lu patrone di la vigna disse a lu so fattore: Chiama i travagliatori, e dalli la loru paga, incuminciandu da l’ ultimi finu a li primi.

₉Essendu ghiunti quelli, che nun avianu cuminciatu che a l’ ora undecima, ricivinu ugnunu un danaru.

₁₀Essendu ghiunti poi li primi, si pensavanu, ch’ elli aurianu ricivutu di più: ma nun ricivinu che un danaru ugnunu.

₁₁Ed avendulu ricivutu, sparlavanu contra di lu babbu di famiglia,

₁₂Dicendu: Quest’ ultimi nun hannu lavuratu che un’ ora, e l’ hai fatti pari a noi, che avemu purtatu lu pesu di u ghiornu, e di u calore.

₁₃Ma ellu rispundendu ad unu d’ elli, disse: Amicu, eiu nun ti facciu inghiustizia: nun hai cunvinutu cun me d’ un danaru per la ghiurnata?

₁₄Piglia ciò, che è toiu, e vaitine: vogliu dà a quest’ ultimu quantu agghiu datu a te.

₁₅Nun possu eiu fà ciò, che mi piace? o hai invidia, perchè eiu so’ bonu?

₁₆Cusì l’ ultimi sarannu li primi, e li primi sarannu l’ ultimi. Assai so’ li chiamati, ma pochi so’ li scelti.

₁₇Ed avvicinandusi da Ghierusalemme, Ghiesù pigliò in disparte li dodici discipuli, e disse:

₁₈Eccu ci avvicinemu da Ghierusalemme, e u Figliolu di l’ omu sarà datu in le mani di li principi di li sacerdoti, e di li Scribi, e lu cundannarannu a morte,

₁₉E lu darannu a li ghientili per fanne lu scherzu, frustallu, e crucifissallu, e lu terzu ghiornu risuscitarà.

₂₀Allora li si avvicinò la mamma di li figlioli di Zebedeiu cun li so’ figlioli, adurandulu e dumandanduli qualche cosa.

₂₁Ed ellu li disse: Cosa voi? Ella li rispose: Dì, che sti dui mei figlioli posinu, l’ unu a la to dritta, e l’ altru a la to sinistra in lu to regnu.

₂₂E Ghiesù rispundendu li disse: Nun sapete ciò, che dumandate. Putete voi bia lu calice, che agghiu da bia eiu? Elli risposinu: Lu putemu.

₂₃Ellu li disse: Sì, biarete lu me calice: ma di pusà a la me dritta o a la me sinistra, nun tocca a me di favvila, ma sarà per quelli, per li quali lu me Babbu l’ aurà preparatu.

₂₄E li deci avendu intesu, si sdignonu cun li dui fratelli.

₂₅Ma Ghiesù li chiamò a sè, e disse: Sapete, che li principi di le nazioni hannu la duminazione sopra d’ elle: e quelli, che so’ i più magghiò fannu senta lu so putè sopra d’ elli.

₂₆Nun sarà mica cusì fra di voi: ma se qualchidunu di voi altri vurrà diventà più grande, ch’ ellu diventi lu vostru servitore.

₂₇E quellu, che vurrà essa lu primu fra di voi, sarà u vostru servu.

₂₈Siccome lu Figliolu di l’ omu nun è vinutu per essa servitu, ma per serva, e per dà la so vita, per la redenzione di molti.

₂₉E come elli surtianu da Ghiericu, molta ghiente lu seguitò;

₃₀Ed eccu dui cechi, che pusavanu vicinu alla strada, che avendu intesu, che Ghiesù passava, si missinu a gridà, dicendu: Signore, abbi pietà di noi, figliolu di Davidde.

₃₁E a ghiente li sgridacciava, perch’ elli si tacessinu. Ma elli gridavanu più forte, dicendu: Signore, figliolu di Davidde, abbi pietà di noi.

₃₂E Ghiesù si fermò, e li chiamò, e disse: Cosa vulete, ch’ eiu vi fia?

₃₃Li risposinu: Signore, ch’ elli s’ aprinu li nostri ochi.

₃₄E Ghiesù avendu pietà d’ elli, tuccò li so’ ochi. E subitu viddinu, e lu seguitonu.