Matteiu 24

₁E Ghiesù essendu surtitu da lu tempiu, si n’ andava. E s’ avvicinonu li so’ discipuli, per falli veda lu fabbricatu di lu tempiu.

₂Ma ellu rispundendu li disse: Videte tutte ste cose? Vi dicu in verità, nun ristarà qui petra sopra petra, che nun sii diruccata.

₃E come ellu stava sidutu su lu monte Ulivetu, s’ avvicinonu li discipuli in secretu, e li dissinu: Dicci, quandu sarannu ste cose? e qual sarà lu segnu di lu to arrivu, e di la cunsumazione di lu seculu?

₄E Ghiesù rispose ad elli: Badate, che qualchidunu nun vi seduca.

₅Perchè molti vinirannu in lu me nome, dicendu: Eiu so’ lu Cristu: e seduciarannu molta ghiente.

₆Perchè sintirete parlà di guerre, e di rumori di guerra. Badate di nun disturbavvine. Perchè bisogna, che queste cose abbinu locu, ma nun è la fine.

₇Ed in fatti si sullivarannu populu contra populu, regnu contra regnu, e ci sarannu peste, fame, e terramoti in diversi lochi.

₈Ma tutte queste cose sonu lu cuminciamentu di li dulori.

₉Allora vi ghittarannu nele tribulazioni, e vi ammazzarannu: e sarete in odiu a tutte le nazioni per causa di lu me nome.

₁₀Ed allora molti si scandalizarannu, e si tradirannu l’ un l’ altru, ed aurannu odiu l’ un contra l’ altru.

₁₁E cumparirannu molti falsi prufeti, e seduciarannu molta ghiente.

₁₂E perchè l’ iniquità sarà grande, la carità diminuirà in molti.

₁₃Ma quellu, che persevararà finu a la fine, quellu sarà salvu.

₁₄E questu vanghielu di lu regnu sarà predicatu in tuttu l’ universu, per tistimunianza a le nazioni: e allora vinirà la fine.

₁₅Adunque, quandu vidrete l’ abominazione di la desolazione predetta da lu prufeta Daniele essa in lu locu santu: che quellu, che legghie, capischi.

₁₆Allora che quelli, che sarannu in la Ghiudea, si ne fugghinu a li monti:

₁₇E che quellu, che si truvarà sopra a lu tettu, nun fali a piglià qualche cosa in la so casa:

₁₈E quellu, che sarà in lu so chiosu, ch’ ellu nun torni in casa a circà lu so vistitu.

₁₉Ma guai a le donne gravide, e a quelle, che darannu a sugghia in quelli ghiorni.

₂₀Perciò pregate, perchè la vostra fugghita nun abbi locu d’ invernu, o in ghiornu di sabatu.

₂₁Perchè ci sarà allora una gran tribulazione, comu nun fu mai da lu cuminciamentu di lu mondu fin ad oghi, e comu mai sarà.

₂₂E se nun fussinu accurciati quelli ghiorni, nun si salvaria carne umana: ma per via di quelli, che so’ eletti sarannu accurciati quelli ghiorni.

₂₃Allora se qualchidunu vi diciarà: Eccu qui è lu Cristu, o culà: nun lu cridite.

₂₄Perchè surtirannu fora falsi cristi, e falsi prufeti: e farannu gran miraculi, e grandi prove, per putè inducia in l’ errore (se è pussibile) ancora li eletti.

₂₅Eccu eiu vi l’ agghiu predettu.

₂₆Adunque, s’ elli vi dicunu: Eccu si ritrova in lu desertu, nun surtite: ecculu in lu fondu di la casa, nun ci cridite.

₂₇Perchè comu lu lampu sorte da livante, e si face veda infinu a punente: cusì sarà ancu la vinuta di lu Figliolu di l’ omu.

₂₈Luva si truvarà lu corpu, culà si riunirannu l’ aquile.

₂₉Subitu dopu la tribulazione di quelli ghiorni lu sole diventarà scuru, e la luna nun darà più la so luce, e le stelle cascarannu da lu celu, e le forze di li celi sarannu scummosse:

₃₀Ed allora cumparirà lu segnu di lu Figliolu di l’ omu in lu celu: ed allora piegnarannu tutte le tribù di la terra: e vidirannu lu Figliolu di l’ omu vinendu sopra li nivuli di lu celu cun gran putere, e gran maiestà.

₃₁E mandarà li so’ agnuli cun la tromba, e voce grande: e da li quattru venti riunirannu li so’ eletti, da lu più altu di li celi insinu a li so’ ultimi cunfini.

₃₂Circate a capì sta parabula da quella di l’ alberu di ficu: quandu lu so ramu è tenaru, e che è nata la fronda, capite, che l’ estate è vicina:

₃₃Cusì voi altri, quandu vidirete ste cose, state certi, ch’ ellu vicinu è a l’ usciu.

₃₄In verità eiu vi dicu, nun passarà questa ghienerazione, che tutte ste cose nun si fianu.

₃₅Lu celu e la terra passarannu, ma le me’ parole nun passarannu.

₃₆Ma di lu ghiornu e di l’ ora nimu ne sa nulla, mancu l’ agnuli di li celi, eccettu lu solu Babbu.

₃₇Come in li tempi di Nuè, cusì sarà in la vinuta di lu Figliolu di l’ omu.

₃₈Ed in fatti siccome in li ghiorni prima di lu diluviu magnavanu e biianu, e si maritavanu e davanu le donne a lu maritu, insinu a lu ghiornu, che Nuè intrò in l’ arca,

₃₉E nun s’ accorsinu di nulla, fintantu che fu ghiuntu lu diluviu, che li si purtò tutti: cusì sarà la vinuta di lu Figliolu di l’ omu.

₄₀Allora sarannu dui in lu chiosu: unu sarà pigliatu, e l’ altru lasciatu.

₄₁Dui donne macinarannu in lu mulinu: una sarà pigliata, e l’ altra sarà lasciata.

₄₂Adunque vegghiate, perchè nun sapete, in che ora deve vena u vostru Signore.

₄₃Ma sappiate sta cosa, che se lu babbu di famiglia sapesse, in che ora è per vena u latru, vegghiaria per certu, e nun lasciaria rubbà la so casa.

₄₄E perciò voi stativine pronti: percosa nun sapete, in che ora vinirà lu Figliolu di l’ omu.

₄₅Qual è lu servu fidele, e prudente, che lu so patrone stabilisce sopra la so servitù, per dalli per tempu lu cibu?

₄₆Beatu quellu servu, che quandu vinirà lu so patrone, u truvarà cusì facendu.

₄₇Vi dicu in verità, ch’ ellu lu mittarà a lu cumandu di tutti li so’ beni.

₄₈Ma se a l’ incuntrariu lu cattivu servitore diciarà in lu so core: Lu me patrone tarda a vena:

₄₉E ch’ ellu cuminci a minà a li so’ cumpagni, e a magnà ed a bia cun li briachi:

₅₀Arrivarà lu patrone di quellu servitore, in lu ghiornu, ch’ ellu nun l’ aspetta, e in l’ ora, ch’ ellu nun sa:

₅₁E lu separarà, e li farà lu so postu in mezu a l’ ipocriti. E culà ci sarà piantu, e stridu di denti.