Lucca 1

₁Postu ch'elli anu messu uni belli pochi ad assistà a storia di i fatti stalvati ind'è noi altri ₂suvente ciò ch'elli ci anu tramandatu quelli chì, da u cumenciu, anu vistu cù i so ochji è sò divintati servi di a parolla, ₃ancu à mè chì mi sò primuratu à l'affine di cum'ellu hè an datu tuttu à parte si da u principiu, m'hè parsa una bona di scrivela da tè, in modu suvitu è chjaru, carissimu Tiofalu, ₄da chì tù sappia, e parolle chì tù sè statu amparatu, quant'elle sò sicure.

₅À i tempi d'Erode, rè di a Ghjudea, ci era un prete di nome Zaccaria di a classa d'Abià. A moglia era discindente di Aarone è si chjamava Lisabetta. ₆Eranu parsone ghjuste davanti à Diu, tramindui. Suvitavanu à l'intuttu l'ordini è i cumandi di u Signore è rimprovari ùn li si ne pudia fà. ₇Ma zitelli ùn ne avianu chì Lisabetta ùn ne pudia avè ed eranu tramindui annosi. ₈Vense chì, in la so funzione di prete sicondu a tacca di a so classa davanti à Diu, ₉è sicondu l'usu di a funzione di prete tirede à l'umbusca u dirittu di brusgià u incensu dopu intrutu in lu tempiu di Diu, ₁₀ed era a turba magna di u populu à pricà fora indì l'ora di u incensu. ₁₁Or li si fece prisente à l'ochji un anghjulu di u Signore, rittu à diritta, di fiancu à l'altare di u incensu. ₁₂Videndu lu Zaccaria si scumpunì è li falede a paura à dossu, ₁₃è l'anghjulu li disse: «ùn aghja timenza, o Zaccarì, chì hè stata intesa a to prichera è Lisabetta, to moglia ti hà da fà un figliolu è l'ai da chjamà di nome Ghjuvanni ₁₄è ti hà da esse gioia è alicria, è uni belli pochi si anu da ralicrà di a so nascita ₁₅chì hà da esse maiò davanti à u Signore, ùn hà da beie nè vinu nè nulla chì imbriachi è hà da esse pienu di Spiritu Santu ancu in corpu à a mamma. ₁₆È à parechji di i figlioli d'Israele l'hà da fà vultà verdi u Signore, u so Diu, ₁₇ed ellu stessu hà da viaghjà in davanti à Diu in lu spiritu è in la putenza d'Alia da fà vultà i cori di i babbi verdi i figlioli è i ribelli verdi u pinsà di i ghjusti ch'ellu sia prontu da Diu, un populu priparatu.» ₁₈Zaccaria disse à l'anghjulu: «è cumu l'aghju da sapè eiu, quessa? Chì sò vechju è ancu à me moglia, l'anni li sò crisciutu.» ₁₉È da risposta l'anghjulu li disse: «eiu sò Gabriellu, quellu chì stà rittu davanti à Diu è sò statu mandatu da parlà ti è da purtà ti isse nove bone; ₂₀ed eccuti chì ai da stà zittu fin'à u ghjornu ch'elle accadaranu isse cose, senza pudè parlà, causa d'ùn esse ti fidatu di e me parolle chì, ghjuntu u tempu, si anu da vede fatte.»

₂₁È u populu stava ad aspittà à Zaccaria è si maravigliava ch'ellu stessi tantu in lu tempiu. ₂₂È dopu isciutu, mancu più pudia parlà à quella ghjente. Capinu ch'ellu avia vistu calcosa in lu tempiu. Ed ellu facia i motti ma stava zittu. ₂₃Vense chì, compiu i so ghjorni di serviziu, si ne vultede in casa soia. ₂₄Dopu quellu tempu fù incinta Lisabetta, a moglia, è par cinque mesi mancu si palisò, cugitendusi: ₂₅«cusì fece u Signore à prò meiu, quand'ellu tolse ciò chì mi mittia in vargogna davanti à a ghjente.»

₂₆È in lu sestu mese l'anghjulu Gabriellu fù mandatu da Diu ind'una citai di Ghjuda chì u so nome era Nazarè ₂₇à truvà una verghjine spusata cun unu chì u so nome era Ghjaseppiu di a casa di Davide, e u nome di a verghjine era Maria. ₂₈Intrutu ch'ellu fù ind'è quella, disse: «salute à tè chì ai ricivutu a grazia, u Signore hè cù tecu.» ₂₉Ed ella fù cunturbata da issu discorsu; circava chì salutu ch'ellu era quellu. ₃₀È l'anghjulu disse: «ùn aghja timenza, o Marì, chì ai trovu a grazia ch'ellu dà Diu. ₃₁Ed eccuti: ai da vene incinta è avarè un figliolu. L'ai da chjamà di nome Ghjesù. ₃₂Ellu sarà altu è hà da esse chjamatu figliol'di l'Altissimu è u Diu Signore l'hà da dà u tronu di Davide u babbu, ₃₃è hà da esse rè sopra à a casa di Ghjacobbe pa i seculi è mai vinarà à fine a sò putenza di rè.» ₃₄Tandu Maria disse à l'anghjulu: «cumu hà da esse, quessa, postu chì omu ùn ne cunnoscu?» ₃₅Di risposta, l'anghjulu li disse: «u Spiritu Santu ti si hà da vene à dossu è a forza di l'Altissimu ti hà da piattà in la so ombra; par ciò quellu chì hà da nasce santu sarà chjamatu Figliolu di Diu. ₃₆È po ci hè issa to parente Lisabetta, chì a chjamavanu sterile, in vichjaia aspetta ancu ella ed hè di sei mesi, ₃₇chì mai vinarà priva di forza nisuna parolla di Diu.» ₃₈È Maria disse: «hè quì prisente a serva di Diu; ch'ellu mi sia fattu sicondu a to parolla.» È l'anghjulu si ne andede da ind'è ella.

₃₉In quelli ghjorni, Maria s'arrizzò è parti lestra à via di e muntagne, ind una cità di Ghjuda ₄₀è intrì in casa di Zaccaria è salutede à Lisabetta. ₄₁È subitu chì Lisabetta intese u salutu di Maria, u zitellu messe à scalcittà li in corpu è Lisabetta vense piena di Spiritu Santu ₄₂è, disse, à alta voce: «binadetta tù, trà le donne, è binadettu u fruttu di u to corpu ₄₃è da duva mi hè data ch'ella venga in casa meia a mamma di u me Signore? ₄₄Chì, mì: Quand'ella mi hè ghjunta à l'arechje a voce di u to salutu, u zitellu mi hà saltatu in corpu da l'alicria ₄₅è biatu à quella chì hà cridutu ch'elle aghjanu da vene e cose chì li funu annunciate da parte di u Signore.»

₄₆È Maria disse:

₅₆Maria si stede trè mesi cù Lisabetta è po si ne vultede in casa.

₅₇È ghjunse da Lisabetta u tempu di parturì ed abbe un figliolu. ₅₈U imparintatu è u vicinatu intesenu ch'ella li era crisciuta a misaricordia di u Signore è si ralicronu cun ella. ₅₉È ghjunsenu ad uttava à circuncì u zitellu chjamendu lu cù u nome di u babbu Zaccaria. ₆₀Tandu a mamma disse: «innò, si hà da chjamà Ghjuvanni.» ₆₁È elli dissenu: «ùn ci hè nimu, in la to sterpa, chì si chjami cusì.» ₆₂È fecenu cenni à u babbu ch'ellu dicissi cum'ellu u vulia chjamà. ₆₃Quellu cherse un tavulellu è scrisse cusì: «u so nome hè Ghjuvanni.» È ne funu maravigliati tutti. ₆₄È di colpu, aprì a bocca, a lingua li si sciolse, è parlava, laudendu à Diu. ₆₅E à tutti quelli di u vicinatu, li vense a paura à dossu, è andavanu mintuvati issi detti in la muntagna sana di Ghjuda, ₆₆è tutti quelli chì l'avianu intesi i si tinianu in core, è dicianu: «ma chì avarà da esse issu zitellu?» Chì u Signore ci hà a manu à dossu.

₆₇È Zaccaria u babbu fù pienu di Spiritu Santu è prufetizò dicendu:

₈₀È u zitellu ingrandava è pigliava forza cù u spiritu, è stede in lu disertu finu à u ghjornu ch'ellu si fece vede da Israele.