Lucca 20

₁Unu di quelli ghjorni, mentre chì Ghjesù insignava u populu in lu tempiu è purtava u vangelu, li t'affacconu i capisacerdoti è i Maestri di a Lege cù i capipopulu ₂è piglianu è dumandanu: «dì ci cù chì putere chì tu faci ste cose, o, issu putere, quale u ti dà?» ₃Tandu ellu: «una dumanda, a vi vogliu fà ancu eiu, ditemi ghjà: ₄Vinia da u celu o da l'omi, u battezimu di Ghjuvanni?» ₅È quelli, raghjunonu frà elli, maliziendu: «sì no dicemu: “da u celu”, hà da dì: “ma ch'ùn lu cridiate, allora?” ₆Ma sì no dicemu: “da l'omi”, u populu sanu ci piglia à pitrate è ci tomba! Da tantu ch'elli sò persuasi chì Ghjuvanni era un prufeta.» ₇Cusì vene ch'elli rispundinu d'ùn sapè. ₈È Ghjesù li disse: ebbè, mancu eiu a vi dicu cù chì putere chì eiu faciu isse cose.

₉È messe à dì, à u populu, issa parabula: «un omu punì una vigna, a dede à rindutu à vignaghjoli, è partì par longu tempu. ₁₀Ghjuntu u mumentu mandede à i vignaghjoli un servu, da ch'elli li dianu u rindutu. Ma elli u tribbionu è u rimandedinu maniviotu. ₁₁U patrone mandò torna un antru servu, ma i vignaghjoli tribbionu ancu à quellu, u carconu di vituperii è u rimandedinu maniviotu. ₁₂Ne mandò torna un terzu, ma ancu à quellu u firinu è u lampedinu fora. ₁₃U patrone di a vigna disse: “or chì avaraghju da fà? Mandaraghju à me figliolu u caleghju; forse à ellu, u rispittaranu.” ₁₄Ma quand'ì i vignaghjoli u vissenu, si cunsiglionu frà elli, dicendu: “què hè l'erede, tumbemu lu chì, cusì, a lascita tuccarà à noi.” ₁₅È u lampedinu fora da a vigna è u tumbedinu. Ebbè, chì l'avarà da fà, u patrone di a vigna? ₁₆Vinarà, tumbarà issi vignaghjoli è a vigna a darà à d'altri.» Sintendu cusì, dissenu: «mai ch'ella sia!» ₁₇È ellu, fighjenduli, disse: «allora, chì vole dì ciò chì hè scrittu:

₁₈A chì cascarà annant'à issa petra vularà à pezzi, à qual'ella cascarà addossu, u sciacciarà.» ₁₉I Maestri di a Lege è i capi di i preti li volsenu mette a manu addossu subitu tandu, ma ebbinu a paura di u populu chì a sapianu chì a parabula era detta contru à elli.

₂₀Survigliedinu è mandedinu spie chì facianu neciu d'esse omi ghjusti, par incappiallu annantu à una parolla, è mettelu sottu à l'autorità è u putere di u guvernatore. ₂₁U intarrughedinu è dissenu: «o Maestru, a sapemu chì tù parli è insegni cumu si deve, è mancu cambii faccia davanti à nimu, ma insegni a strada di Diu sicondu u veru. ₂₂Sarà parmessa, o nò, chì no paghimu u impositu à Cesaru?» ₂₃Ma ellu vide a trappula è li disse: «fate mi vede una pezza di muneta. ₂₄Di quale porta a figura è u nome scrittu? Di Cesaru.» Dissenu. ₂₅Tandu ellu: «ebbè, pagate à Cesaru quellu di Cesaru è a Diu quellu di Diu.» ₂₆Ùn la li fecenu à incappiallu par via di issu dettu davanti à u populu, è si stedenu zitti, imbafati ch'elli eranu da a risposta.

₂₇Uni pochi di Saducei, quelli chì dicenu chì resurrezzione ùn ci ne hè, li s'avvicinedinu è dumandedinu: ₂₈«o Maestru, u cumandu scrittu di Musè hè questu quì: s'ellu more u fratellu d'unu chì hè maritatu è senza figlioli, chì u fratellu pigli a moglia di u mortu è ponga, ellu, a sumente pà u so fratellu. ₂₉Or ci era sette fratelli. U prima si maritò è morse senza figlioli. ₃₀U sicondu è u terzu piglionu a veduva, ₃₁è cusì fù di tutti à sette chì morsenu senza lascià zitelli. ₃₂Dopu morse ancu a moglia. ₃₃Di quale hà da esse moglia u ghjornu di a resurrezzione? Maritata fù cù i sette!» ₃₄Ghjesù li disse: «i figlioli di stu seculu piglianu moglie è mariti, ₃₅ma quelli chì sò degni d'avè parte à quellu seculu chì hà da vene è à a resurrezzione di i morti ùn piglianu nè moglie nè mariti. ₃₆È more ùn ponu più, chì sò sumigli à l'anghjuli è figlioli di Diu, issendu figlioli di a resurrezzione. ₃₇Di ch'elli si sveghjinu i morti, a face sapè Musè à puntu di u prunicaghju, quand'ellu dice di u Signore: Diu d'Abraamu, d'Isaccu è di Ghjacobbe. ₃₈Chì Diu ùn hè di i morti ma di i vivi; cun ellu vivenu tutti.» ₃₉Qualchiduni di i Maestri di a Lege dissenu: «o Maestru, ai parlatu bè.» ₄₀È ùn ebbinu curaghju à dumandalli altru nulla.

₄₁Ghjesù li disse: «comu hè ch'elli dicenu chì u Cristu hè figliolu di Davide? ₄₂Un dice da par ellu, Davide, in li salmi:

₄₅Mentre chì u populu sanu u stava à sente, disse à i discepuli: ₄₆«Guardate vi da i Maestri di a Lege chì volenu spassighjà cù i vistiti longhi è l'aggustanu i saluti in piazza publica, è e prima carreghe in le sinagoghe è i migliò pusatoghji à cena. ₄₇Si manghjanu a casa di a veduva è, facenu e prichere longhe pà a praforma. A cundanna li sarà più forte.»