Matteu 14

₁Tandu Erode u tetrarca vense à sente a nomina di Ghjesù è disse à i so servi: ₂«Questu hè Ghjuvanni u Battistu; s'hè discitatu da trà li morti è pè via di què, in ellu sò à l'opara i miraculi.» ₃Chì Erode, dopu pigliatu à Ghjuvanni l'avia ligatu è messu in prighjò pè via di Erodiade, a moglia di u fratellu Filippu. ₄Chì Ghjuvanni li dicia: «Ùn t'hè cuncessa di tene la.» ₅Ma, puru ch'ellu u vulessi tumbà, timì a folla chì u tenia da prufetu. ₆Ghjuntu l'anniversariu di Erode, a figliola di Erodiade si messe à ballà à mezu à a ghjente è piacì à Erode; ₇Tandu cun ghjuramentu prumesse di dà li ciò ch'ell'avia chersu. ₈È, cunsigliata da a mamma, ella disse: «Dà mi nant'à un piattu u capu di Ghjuvanni u Battistu.» ₉È u rè fù afflittu, ma pè via di i so ghjuramenti è di quelli attavulinati cun ellu, cumandò ch'ellu li fussi datu, ₁₀è mandò à qualchissia à muzzà u capu à Ghjuvanni in prighjò ₁₁è u capu fù arricatu nant'à un piattu è datu à a zitella, è ella u purtò à a mamma. ₁₂È ghjunti à u locu, i discepuli caccionu a salma è a seppellinu, è andonu à purtà a nova à Ghjesù.

₁₃Intesu cusì, Ghjesù partì da quallà cù a barca ver di un locu desertu scantatu. Intesu ne a nutizia, e folle u suvitonu à pedi da e cità. ₁₄È dopu sbarcatu, vide tamanta folla è fù cummossu à l'anima per isse ghjente, è guarì i so infermi. ₁₅Toccu a sera, i discepuli vensenu ind'è ellu dicendu: «desertu hè u locu, è l'ora hè trapassata; rimanda e folle in i so paesi, ch'elle si possinu cumprà da manghjà.» ₁₆Tandu ellu disse: «Ùn anu bisognu d'andà, date li voi da manghjà.» ₁₇Elli li dissenu: «Quì avemu solu cinque pani è dui pesci.» ₁₈Ellu disse: «Arricate mi li quì.» ₁₉È cumandatu à e folle di pusà in l'erba, pigliò i cinque pani è i dui pesci è pisatu l'ochji ver di u celu, disse a benedizione poi, spartutu i pani i dete à i discepuli, è i discepuli à e folle. ₂₀È tutti manghjonu è funu sazii, è si ricusse ciò chì avanzava di pezzi: dodeci coffe piene ₂₁Quelli chì manghjavanu eranu cinquemila omi, da più à menu, cacciatu e donne è i zitelli.

₂₂È subitu cumandò à i discepuli ch'elli cullessinu in barca è tirà avanti à via di l'altra sponda intantu ch'ellu rimandessi e folle. ₂₃È dopu avè lasciatu andà e folle, cullò fin'à u monte pè pricà in un locu scantatu. Ghjunta a sera, era solu. ₂₄A barca era ghjà bellu luntanu da a terra, ciambuttata da i marosuli, chì u ventu era cuntrariu. ₂₅È à u finì di a notte, vense à truvà li viaghjendu nant'à u mare. ₂₆È i discepuli, videndu lu viaghjà nant'à u mare, funu frasturnati, dicendu: «Hè una fantomia»; è gridavanu di paura. ₂₇È subitu ellu li parlò dicendu: «Curagiu chì sò eu, ùn abbiate paura.» ₂₈Li risponde Petru è li dice: «O Signore, s'è tù sì tù, cumanda ch'eu venghi à truvà ti annant'à l'acque.» ₂₉Tandu li disse: «Veni!» È falatu da a barca, Petru viaghjò nant'à l'acque per andà à truvà à Ghjesù; ₃₀tandu vistu u ventu, si pigliò di paura, è, cum'ellu principiava à annigà si, gridò dicendu: «O Signore, salvami.» ₃₁Tandu subitu Ghjesù stende a manu, l'agguanta, è li dice: «Omu di poca fede, cum'hè ch'è tù ai dubbitatu?» ₃₂Cullati ch'elli funu in barca, u ventu stanciò ₃₃Tandu quelli in a barca li si indinuchjonu davanti, dicendu: «Sì propiu u figliolu di Diu.»

₃₄È toccu l'altra sponda accustonu da e parti di Ghjenesarè. ₃₅È l'omi d'issu locu, ricunniscendu lu, a mandonu à dì in tuttu u rughjone vicinu è li purtonu tutti quelli chì avianu un male, ₃₆è u pricuronu di pudè tuccà solu l'arice di u so mantellu. È tutti quelli chì tuccavanu eranu salvi.