Matteu 16

₁I Farusei è i Saducei si avvicinanu da Ghjesù è u mettenu à u provu dumandendu ch'ellu li fia vede un segnu da u celu. ₂È ellu li risponde è dice: «[A sera dite chì ellu hà da fà u bellu tempu per via ch'ellu hè rossu u celu; ₃è a matina, dite chì ellu hà da esse tempurale chì u celu hè rossu scuru? Sapete leghje l'aspettu di u celu, è i segni di i tempi ùn li pudete leghje?] ₄Issa ghjente infida è gattiva cerca un segnu, ma ùn li si derà chè quellu di Ghjona.» È piglia è si ne và.

₅I discepuli si eranu scurdati di piglià u pane, prima di parte à via di l'altra sponda. Ghjesù li dice: ₆«Attenti, tenite vi luntanu da u levitu di i Farusei è di i Saducei.» ₇I discepuli ragiunavanu trà di elli è dicianu: «Hè per via ch'è no ùn avemu micca pigliatu u pane.» ₈Ghjesù si ne accorghje è dice: «O ghjente di poca fede, chì ragiunate trà di voi dicendu chì voi ùn avete pane? ₉Ùn avete ancu capitu? Soca ùn vi ne arricurdate di i cinque pani pè cinquemila persone nè di quante coffe ricusse? ₁₀Nè di i sette pani pè quattru mila persone nè di quante panere ricusse? ₁₁Cumu hè ch'è vo ùn capite chì eu ùn parlava di pane? Tenite vi luntanu da u levitu di i Farusei è di i Saducei?» ₁₂Tandu i discepuli anu capitu ch'ellu ùn parlava micca di levitu di u pane, ma di l'insignamentu di i Farusei è di i Saducei.

₁₃Ghjuntu da e parte di Cesarea di Filippu, Ghjesù dumanda à i discepuli: «Quale saria u figliolu di l'omu, secondu a ghjente?» ₁₄Quelli rispondenu: «À chì dice ch'ellu hè Ghjuvanni, à chì dice Elia, à chì dice Ghjeremia o unu di i prufeti.» ₁₅Ghjesù dice: «Ma voi, quale dite ch'eu sò?» ₁₆Simon Petru risponde: ₁₇«Tù si u Cristu, u Figliolu di u Diu vivu.» È Ghjesù li dice: «Beatu à tè, o Simò figliolu di Ghjona, chì issa cosa ùn ti l'anu micca palisata a carne è u sangue ma u mo babbu chì hè in celu. ₁₈Ed eu dicu ch'è tù sì Petru, è nantu à issa petra aghju da alzà a mo chjesa, è mancu e porte di l'infernu l'anu da piglià a suprana. ₁₉Ti aghju da dà e chjave di u regnu di i celi, è ciò ch'è tù averai ligatu nantu à a terra fermerà ligatu in i celi, è ciò ch'è tù averai scioltu nantu à a terra fermerà scioltu in i celi.» ₂₀È po s'arricumandò à i discepuli ch'elli ùn dicanu à nimu ch'ellu era u Cristu.

₂₁Da tandu Ghjesù messe à fà capì à i so discepuli ch'ellu li tuccava à andà in Ghjerusaleme, chì l'anziani di u populu, i capisacerdoti è i maestri di a Lege l'avianu da fà soffre assai è tumbà lu, ma u terzu ghjornu ch'ellu avia da risuscità. ₂₂Tandu Petru u pigliò da parte è messe à rimpruverà lu dicendu: «Diu ne guardi, o Signore; mai ch'ella sia!» ₂₃Ma Ghjesù si vultò è disse à Petru: «Vai via, o Satanassu; sì una pastoghja per mè chì ùn ai micca in capu e cose di Diu, ma quelle di l'omi.» ₂₄È po Ghjesù disse à i so discepuli: «S'è unu vole vene cun mè, ch'ellu pianti di pensà à ellu stessu, ch'ellu agguanti a so croce è ch'ellu mi seguiti. ₂₅À chì vole salvà a so vita l'hà da perde; à chì perde a so vita per mè a truverà. ₂₆S'è unu vince u mondu sanu à chì li puderà ghjuvà s'ellu ci perde l'anima? O allora cùn chene l'hà da barattà, l'omu, a so anima? ₂₇U Figliolu di l'Omu hà da vene in a gloria di u Babbu cù i so anghjuli. È pacarà à ognunu secondu a so manera di fà. ₂₈A vi dicu da veru, chì unepochi di quelli chì sò quì ùn anu da more prima di avè vistu vene u Figliolu di l'Omu in u so regnu.»