Marcu 13

₁È mentre ch'ellu escia da u tempiu, unu di i so discepuli li disse: «O Maestru, guarda ghjà chì belle petre è chì travagliu!» ₂Ghjesù li disse: «U vedi issu tamantu travagliu, ebbè! Ùn n'hà da fermà petra sopra à petra. Tuttu sera distruttu.»

₃È mentre ch'ellu pusava in a culletta à l'Olivetu, di punta à u tempiu, Petru, Ghjacumu, Ghjuvanni è Andria soli cun ellu, l'interrugavanu. ₄«Dicci quandu chì ste cose anu da accade? È chì serà u segnu quandu chì tuttu què serà in puntu di realizassi?» ₅È Ghjesù principiò à dilli: «fate casu chì nimu v'inganni! ₆Chì parechji affaccaranu, aduprendu u miò nome è dicendu: “Sò eiu”, è inganneranu assai ghjente. ₇Quandu ch'è vo'senterete parlà di guerre, o di rimusci di guerre, ùn vi pigli u tremu. Bisogna chì tuttu què accadi, ma ùn serà ancu a fine. ₈Chì si rivulterà populu contr'à populu, è regnu contr'à regnu. In certi lochi ci seranu i terramoti, a fame. Serà u principiu di i dulori. ₉Fate casu à voi stessi, perchè vi manderanu in tribunale, vi pesteranu da i colpi ind'e sinagoghe. Serete purtati davanti à i guvernatori è i rè in testimunianza per via di mè. ₁₀Ma prima ci vole à sparghje u Vangelu in tutte e nazione. ₁₁E quand'elli vi purtaranu per ghjudicavi, ùn vi fate penseru per ciò ch'è v'averete da dì. Dite solu ciò chì vi serà datu à l'ora vulsuta. Chì tandu, un serete micca voi chì parlerette, ma u Spiritu Santu. ₁₂Infatti, un fratellu ferà cundanna l'altru fratellu à morte. Un babbu u figliolu. I figlioli si rivulteranu contru à i genitori, è i feranu more. ₁₃È serete in odiu à tutti per vìa di u miò nome. Ma quellu chì resisterà fin'à l'ultima sera salvu.»

₁₄«Quandu ch'è vo'viderete l'orrore di u disguastu stabbulitu duv'ellu ùn avia da esse —à chì leghje capisca—, tandu chì quelli chì sò in Ghjudea fuganu pè a muntagna. ₁₅Quellu chì serà in terrazza, ch'ellu ùn fali in casa, è ch'ellu ùn ci entri per vulè riguarà qualcosa. ₁₆Quellu chì serà in campagna, ch'ellu ùn rientri per riguarà u so mantellu. ₁₇Guai, tandu, à e donne incinte, è à quelle chì daranu à sughje ind' issi ghjorni! ₁₈Ma precate chì ste cose ùn accadinu d'invernu. ₁₉Chì ci seranu ind' issi ghjorni e tribulazione cumu mai si n'hè vistu da poi u principiu di a creazione, opera di Diu, fin'à oghje, è cum'ellu ùn si ne viderà mai più. ₂₀È sì u Signore ùn avissi accurtatu issi ghjorni, nimu a si francheria. Ma grazia à l'eletti ch'ellu hà sceltu, issi ghjorni l'hà accurtati. ₂₁Allora, sì qualchissia vi dicesse: “Eccu chì u Cristu hè qui, o ecculu quallà”, ùn ci credete. ₂₂Chì affacheranu i falzi Cristi, i falzi prufeti, chì feranu meraculi è maraviglie per ingannà, s'ella fussi pussibule, ancu l'eletti. ₂₃Voi guardatevi, ghjà ch'eiu v'aghju annunziatu tuttu.»

₂₄«Ma, in quelli ghjorni, dopu à isse tribulazione,

₂₆È tandu videranu u Figliolu di l'Omu, venendu annantu à i nuli, putentissimu è gloriosu. ₂₇È tandu manderà i so anghjuli per adunì quelli ch'ellu hà sceltu, da i quattru punti di l'orizonte, da u capu di a terra à u capu di u celu.»

₂₈«Or amparate a parabula di a fica: Quandu ch'elle inteneriscenu e so punte, è ch'elle affaccanu e fronde, sapete chì l'estate s'avvicina. ₂₉Cusì quandu chè vo'viderete accade ste cose, sappiate ancu voi ch'ellu hè vicinu, à le porte. ₃₀A vi dicu da veru: sta generazione ùn passera prima chè tuttu què ùn sìa accadutu. ₃₁U celu è a terra passeranu, ma e miò parolle ùn passeranu micca.»

₃₂«In quant'à u ghjornu o à l'ora, nimu i cunnosce, nè l'anghjuli di u celu, nè u Figliolu, nimu fora di u Padre. ₃₃Siate attenti è veghjate, ghjà ch'è vo' ùn sapete quand'ella sera. ₃₄Hè cum'è un omu chì, partendu luntanu, lascia à so casa è ne dà a carica à i so servi, a ognunu secondu u so travagliu, è chì dumanda, à u purtinaru d'apre l'ochju. ₃₅Allora aprite l'ochji, ghjà ch'è vo' ùn sapete quandu chì u patrone di casa venerà: o di sera, o à mezanotte, o à u cantà di u ghjallu, o a mane, ₃₆Di modu chì, s'ellu vene à l'ispensata, ch'ellu ùn vi trovi durmendu. ₃₇È ciò ch'e' vi dicu, a dicu à tutti: aprite l'ochji!»