Marcu 15

₁Subitu à l'alba, i capisacerdoti si cunsultonu cù l'anziani, i Maestri di a Lege è tuttu u cunsigliu, è dopu d' avè ligatu à Ghjesù u purtonu per mettelu in manu à Pilatu. ₂È Pilatu li dumandò: «tù sì u Rè di i ghjudei?» Ghjesù li rispose è disse: «a dici tù!» ₃È i capisacerdoti l'appunianu tante cose. ₄Tandu Pilatu l' interrugò torna, dicendu: «ùn rispondi nunda? Mì quant'elli ti n'apponenu.» ₅Ma Ghjesù ùn rispundì più nunda da tantu chì Pilatu si ne stunava.

₆À ogni festa, li liberava un prighjuneru, quellu ch'elli dumandavanu. ₇È ci era un certu Barabbà, prighjuneru cù i ribelli, per avè tombu in tempu di rivolta. ₈È a folla chì era cullata, messe à dumandà à Pilatu ciò ch'ellu era solitu d'accurdalli. ₉È Pilatu li rispose è disse: «vulete ch'eiu vi libereghji u Rè di i Ghjudei?» ₁₀Sapìa ch'ella era per ghjalusia chì i capisacerdoti u l'avianu messu in manu. ₁₁Ma i capisacerdoti azzizzonu a folla per chì Pilatu li lintassi anzi à Barabbà. ₁₂È Pilatu rispose torna è disse: «chì [vulete] ch'eiu ne faccia di quellu chì vudei?» ₁₃Elli, torna, briunonu: «mettilu in croce.» ₁₄Ma Pilatu li disse: «chì hà fattu di male?» Ma elli briunonu ancu piu forte: «mettilu in croce!» ₁₅Pilatu chì vulìa cumpiace à a folla, li liberò à Barabbà, è dopu d'avè fattu fiagellà à Ghjesù, u li dede in mane da ch'elli u mettessinu in croce.

₁₆È i suldati u purtedinu in la corte di u palazzu, vene à dì indè u guvernatore è arricuglinu a scedra. ₁₇U vestinu di panni rossi, è l'incalfonu una curona di spine intrecciate. ₁₈È cumencionu à salutallu: «salve, o Rè di i Ghjudei!» ₁₉Li menavanu in capu cù una canna, li stupavanu addossu è piegavanu u ghjinochju è li si rinchjinavanu. ₂₀È dopu à sti scherzi li caccedinu u vestitu rossu, li rimessenu i so panni, è u purtedinu fora per mettelu in croce.

₂₁Passava un certu Simone di Cirene, babbu di Lisandru è di Ruffu, chì rientrava da a campagna, è l'ubliconu à purtà a croce di Ghjesù. ₂₂È purtonu à Ghjesù ind'un locu chjamatu Golgottà, chì si traduce “locu di a capochjula.” ₂₃Li dedenu da beie vinu mischiatu di balzamu, ma ùn lu pigliò. ₂₄È u crucifissonu,

₂₅Eranu nov'ore di mane quand'elli u crucifissonu. ₂₆Una scritta cù u mutìu di a cundanna dicia: «Rè di i Ghjudei.» ₂₇À tempu à ellu crucifissonu dui latroni: unu à ogni latu. ₂₈[…] ₂₉À chì passava u ghjistimava, capizzendu, è dicendu: «ebbè! tù chì distrughji u tempiu è l'arrizzi in trè ghjorni, ₃₀salvati da per tè è barcati da a croce!» ₃₁Listessa, i capisacerdoti è i Maestri di a Lege si ne ridianu trà elli è dicianu: «hà salvatu l'altri è ùn hè bonu à salvà à sè! ₃₂U Cristu, u Rè d'Israele, ch'ellu si barchi avà da a croce, chì no' vechimu è chì no' credimu.» È quelli chì eranu crucifissati à tempu à ellu l'insultavanu.

₃₃È à meziornu abbughjò a tarra sana, finu à trè ore. ₃₄À trè ore, Ghjesù briunò: «Eloi, Eloi, Lama Sabactani», ciò chì si traduce: miò Diu, miò Diu, perchè mi ai abbandunatu? ₃₅Uni pochi di quelli chì eranu presenti, dopu intesulu, dicianu: «mì chì chjama à Alìa!» ₃₆Ma unu corse à ciuttà una spunga inde l'acetu, a messe in punta d'una canna è li dede da beie, dicendu: «aspittate ch'è no vegamu si Alìa venerà à barcallu.» ₃₇Ma Ghjesù, briunendu forte, spirò l'ultimu fiatu. ₃₈È u tendone di u tempiu si sdrisgiò in dui, da cima à fondu. ₃₉È u centurione chì era di fronte à Ghjesù, videndu in la manera ch'ellu era spiratu disse: «da veru st'omu era Figliolu di Diu!» ₄₀C'eranu dinò e donne chì guardavanu da luntanu. Cun elle, Maria Matalena è Maria a mamma di Ghjacumu u giovanu, è di Ghjuvanni è di Ghjiseppu è dinò Salomea, ₄₁chì u seguitavanu da quand'ellu era in Galilea, per servelu, è po' tante altre ch'eranu cullate cun ellu in Ghjerusaleme.

₄₂Era dighjà venuta a sera, ed era u ghjornu di l'approntu, vene à dì a vigilia di u sabbatu. ₄₃Ghjunse tandu Ghjiseppu d'Arimatea, nobile cunsiglieru chì, ellu dinò, aspettava u Regnu di Diu. Si prese di curaghju è andò duvè Pilatu à dumandalli u cadaveru di Ghjesù. ₄₄Ma Pilatu, si stunò ch'ellu fussi dighjà mortu, fece chjamà u centurione è li dumandò s'ellu era mortu da poi un pezzu. ₄₅Assicuratu ch'ellu fù da u centurione, cuncesse u cadaveru à Ghjiseppu. ₄₆È Ghjiseppu cumprò un lenzolu, barcò à Ghjesù da a croce, l'ingutuppò ind'u lenzolu, è u messe ind'un sepucru scavatu inde a petra, è vultulò un teghione davanti à l'entrata. ₄₇È Maria Matalena è Maria à mamma di Ghjiseppu, guardavanu induv'ellu era statu messu.