Marcu 3

₁È torna entrò inde a sinagoga. Ci si truvava un omu chì avia una manu aggrancata. ₂È vulianu vede s'ellu l'avia da risanà in sabbatu, per rimpruverallila. ₃Ghjesù disse à l'omu chì avia a manu aggrancata: «Arrizzati quì à mezu.» ₄È dumandò à tutti: «U abbatu, hè permessu di fà u bè o di fà u male? Di salva una vita o di tumbà?» Ma elli si stavanu zitti. ₅I fissò unu per unu, sdegnatu è cuntristatu per via di a cicaghjine di i so cori. Disse à quellu omu: «Stendi a manu.» L'omu a stese, è nè ritruvò l'usanza. ₆Allora u Farusei si n'andonu per raghjunà subitu cù quelli d'Erode, è vede cumu fà more à Ghjesù.

₇È Ghjesù cù i so discepuli s'alluntanò ver'di u mare. Ma una folla maiò u seguitava, ghjente venuta da a Galilea, da a Ghjudea, ₈da Ghjerusaleme, da l'Idumea, da Ghjurdanu in dà, è da i circondi di Tiru è di Sidone. Avianu intesu cuntà ciò ch'ellu facia è eranu venuti à truvallu. ₉È disse à i so discepuli di teneli una barca pronta per ch'ellu ùn sia stringhizzatu da a ghjente. ₁₀Per via ch'ellu ne risanava tanti è tanti chì quelli ch'avianu qualchi infirmità si lampavanu à vulellu tuccà. ₁₁È i spiriti maligni quand'elli u vedianu li s'inghjinuchjavanu è briunavanu dicendu: «Tù sì u Figliolu di Diu.» ₁₂Ma Ghjesù, cù poca manera, i minacciava perch'elli ùn lu palisassinu.

₁₃Culledi pè a muntagna è chjamò quelli ch'ellu'avia sceltu è elli li s'accustonu. ₁₄Ne scelse dodeci [è i chjamò apostuli] per avelli cun ellu è per mandalli à predicà, ₁₅cù u putere di risanà i malati è di scunvià i demonii: ₁₆[Ne scelse dodici], Simone, ch'ellu cugnumò Petru. ₁₇Ghjacumu è u fratellu Ghjuvanni, i figlioli di Zebedeu, ch'ellu cugnumò Boanerges, vene à dì “figlioli di u tonu”, ₁₈è Andria, è Filippu, è Bartulumeu, è Matteu, è Tumasgiu, è Ghjacumu u figliolu d'Alfeu, è Taddeu, è Simone u Cananeanu. ₁₉È Ghjuda Iscariotu, quellu chì u tradì.

₂₀Andò in casa è torna a folla ci si adunì. Ùn li davanu mancu tempu à manghjà. ₂₁U so imparintatu, messu à capu di sti fatti, ghjunse per riguarallu, pensendu ch'ellu ùn fussi più nantu à ellu ₂₂è i scribi chì eranu falati da Ghjerusaleme dicianu: «Hè cù Belzebù è ghjè cù a putenza di u principe di i demonii ch'ellu scunvia i demonii.» ₂₃Chjamenduli, li parlò in paragone: «Cumu pò Satana scunvia à Satana? ₂₄Sì un regnu hè divisu contru à sè, issu regnu ùn pò durà. ₂₅È sì una casa hè divisa contru à sè, issa casa ùn po durà. ₂₆Si Satana si rivolta contru à sè è si divide, ùn pò durà: hè a so fine. ₂₇Nimu pò entre in casa d'un omu forte per arrubà, s'ellu ùn hè capace prima di ligà l'omu forte. Tandu sì chì li metterà a casa à l'abottu. ₂₈A vi dicu da veru: tutti i peccati è e ghjisteme di i figlioli di l'omi seranu riscattati, quantu voglia ch'elli abbianu ghjistimatu. ₂₉Ma per quellu chì averà ghjistimatu contru à u Spiritu Santu, ùn ci pò esse riscattu mai, chì ferma abeternu reiu di piccatu.» ₃₀Era parch'elli dicianu: «Què hè in manu à un spiritu malignu.»

₃₁Tandu ghjunsenu a mamma è i fratelli chì, da fora, u mandonu à chere. ₃₂In giru à ellu c'era assai ghjente à pusà. Li dissenu: «Mammata , cù i to fratelli [è surelle] sò fora è ti cercanu.» ₃₃Ellu rispose è disse: «È quale hè mamma, è quale sò i miò fratelli?» ₃₄Fissò unu per unu quelli chì pusavanu in giru è disse: «Eccu à mamma, ecculi i miò fratelli, ₃₅[chì] quellu chì face a vulunta di Diu hè per mè fratellu, surella è mamma.»