Marcu 9

₂Sei ghjorni dopu, Ghjesù pigliò cun ellu à Petru, à Ghjacumu è à Ghjuvanni, è i purtò nant'à una muntagna alta per ch'elli fussinu soli cun ellu è davanti à elli trè fù trasfiguratu, ₃i so panni diventonu risplendenti è più bianchi chè a neve, chì nimu, nantu a terra, ne pò fà sorte di più bianchi da i bugni bucataghji. ₄È li cumparsenu Elia è Musè, tratenendusi cù Ghjesù. ₅Petru prese a parolla è disse à Ghjesù: «Maestru, hè una bona chì noi siamu quì. Arrizzeremu trè tende: una da tè, una da Musè, una da Elia.» ₆In fatti, ùn sapia chì dì: eranu pigliati da u siscu. ₇È ci fù tandu, u nulu chì i tense sottu à a so ombra. È da u nulu vense una voce: «Què ghjè u miò figliolu u predilettu. Statelu à sente.» ₈Di colpu, guardendu di giru in giru ùn vìdenu più à nimu chè à Ghjesù solu cun elli.

₉Di falata da a muntagna Ghjesù li ricumandò d'ùn racunta à nimu ciò ch'elli avianu vistu, à tà à chì u Figliolu di l'Omu ùn fussi resuscitatu da frà li morti. ₁₀Fecenu casu à issa parolla, ragiunendu frà elli: «chì vulerà dì: resuscitatu da frà li morti?» ₁₁È quistiunonu à Ghjesù, dicendu: «Cumu hè chì i Farusei è i Maestri di a Lege dicenu ch'ellu ci vole prima ch'ellu venga Elia.» ₁₂Li rispose: «Elia vene prima è rimette ogni cosa in assestu. Ma cumu hè ch'ella hè scritta chì à u Figliolu di l'Omu l'hà da tuccà à soffre assai è à esse disprezzatu? ₁₃Ma a vi dicu, Elia hè venutu è l'anu fattu ciò ch'elli anu vulsutu, secondu ciò ch'è scrittu d'ellu.»

₁₄Avvicinendusi vide i so discepuli avvinti da una folla immensa, mentre chì i Maestri di a Lege discurrianu cun elli. ₁₅È subitu, tuttu u populu, videndu à Ghjesù, si messe in sussurru è l'incorsenu per falli mottu. ₁₆Ellu li dumandò: «Di chè discurriate cun elli?» ₁₇Unu di a folla rispose: «O Maestru, t'aghju arrecatu u miò figliolu chì hà un spiritu mutu, ₁₈chì, duve voglia ch'ellu sia, quand'ellu u piglia, u lampa pè a piana. Allora sciumieghja, stringhje i denti è vene sticchitu. Aghju dettu à i to discepuli di scunviallu, ma ùn ci sò riesciuti.» ₁₉Ghjesù rispose à tutti è disse: «O generazione senza fede! Finu à quandu steraghju cun voi? Finu à quandu vi suppurteraghju? Avvicinatemilu qui.» ₂₀È u l'avvicinonu. Da chì u zitellu vide à Ghjesù, u spiritu malignu u stambussò. U zitellu cascò pè a piana, sturcinendusi è sciumiendu. ₂₁È Ghjesù dumandò à u babbu: «Da quandu l'accade què?» U babbu rispose: «Da quand'ellu hè creaturu. ₂₂Spessu l'hà lampatu inde u focu è inde l'acqua, per tumballu. Ma sì tù poi qualcosa, aghjutacci, abbia pietà di noi.» ₂₃È Ghjesù li rispose: «Sì tù poi… Hè pussibile tuttu per quellu chì crede.» ₂₄Senz'altru, u babbu di u zitellu gridò: «Credu; susteni a miò poca fede.» ₂₅È Ghjesù, videndu chì a folla s'accuglia minacciò u spiritu malignu è disse: «Spiritu sordu è mutu, ti ne dò l'ordine, esci da stu zitellu è ùn ci turnà piu.» ₂₆Dopu avè briunatu è stambussatu assai u zitellu, u spiritu escì. U zitellu paria un cataveru è a ghjente dicia: «Hè mortu!» ₂₇Ma Ghjesù li pigliò a manu, l'arrizzò è quellu si tense arrittu. ₂₈Quandu chì Ghjesù fù entratu in casa, i so discepuli li dumandonu solu à solu: «Cumu hè chì noi ùn l'avemu pussutu scunvià?» ₂₉Li rispose: «Sta razza (di demonii) ùn esce chè cù a precera.»

₃₀Esciuti da culà, traversonu a Galilea è Ghjesù ùn vulia chì nimu à sapessi. ₃₁Ma insegnava à i so discepuli dicenduli: «U Figliolu di l'Omu serà messu in manu à l'omi è u tumberanu. Ma trè ghjorni dopu resuscitera. ₃₂Ma elli ùn capianu isse parole è temianu à dumandalline a spiegazione.»

₃₃È ghjunsemu in Cafarnau. Entratu ch'ellu fù in casa, Ghjesù li dumandò: «Di chè raghjunavate per strada?» ₃₄Ma elli si stavanu zitti chì, strada facendu, raghjunavanu di qual'ellu era u maiò d'elli. ₃₅Pusendusi, Ghjesù chjamò i dodeci è li disse: «Quellu chì vole esse u primu, ch'ellu sia l'ultimu di tutti è u servu di tutti.» ₃₆Poi, pigliendu un zitellucciu, u messe à mezu à elli, è, abbracciatulu, disse: ₃₇«À chì riceve unu di sti zitellucci à nome meiu riceve à mè. È à chì mi riceve ùn riceve solu à mè, ma riceve quellu chì m'hà mandatu.»

₃₈Ghjuvanni li disse: «O Maestru, avemu scontru à unu chì scunvìava i demonii in nome toiu. Cum'ellu ùn hè micca di quelli chì ci seguitanu, l'avemu impeditu.» ₃₉È Ghjesù rispose: «Ùn lu impedite micca chì nimu pò fà meraculi in nome meiu, è, subitu dopu, parlà male di mè. ₄₀À chì hè contru à noi, hè cù noi. ₄₁À chì vi darà à beie un bichjeru d'acqua à nome chè vo' site di Cristu, a vi dicu da veru, u so premiu ùn u perderà. ₄₂À chì scandalizerà unu di sti zitellucci chì credenu [in mè], megliu serìa ch'omu l'appicchi à u collu una di isse macine ch'elli facenu girà i sumeri, è ch'omu u lampi in mare.»

₄₃«È sì a to manu t'hè cagione di scandalu, tagliala. Hè megliu ch'è t'entri mani mozzu inde a vita, ch'è d'andà cù e to due mane à l'infernu, ind'u focu ch'ùn si spenghje mai, ₄₄[…] ₄₅è' sì u to pede t'hè cagione di scandalu, taglialu. Hè megliu ch'è t'entri pedi mozzu inde a vita eterna, ch'è d'esse lampatu, cù i tò dui pedi, inde l'infernu. ₄₆[…] ₄₇È sì u to ochju t'hè cagione di scandalu, cacciatilu. Hè megliu ch'è t'entri cù un ochju solu inde u Regnu di Diu, chè d'esse lampatu, cù i to dui ochji, inde l'infernu. ₄₈Duve u varme ùn more è u focu ùn si spenghje. ₄₉Perchè ognunu sera salitu cù u focu. ₅₀Hè bonu u sale. Ma si u sale vene dissapitu, cun chè u saliscerete? Abbiate u sale in voi. È siate in pace trà di voi.»