1 Korintianuri 15

₁Me mai phenav tumenge phralale, e Laši Viasta kai me phendem tumenge, kai tume lian, ande savi tume žian angle — ₂latar tume san skipime, te ninkeren tume so me phendem tumenge. Aver fialo, tume patianas intaino.

₃Me sikiardem tumen angla savořende sa, sar me lem, ke o Kristo mulo pala amare bezexa, sar sas le Ramomata. ₄Vo sas angropome, ai ke vo živindisailo o trito dies, sar si le Ramomata; ₅ai ke sikadilo ka o Petri, porme le deš-u-donge. ₆Atunči, vo sikadilo ka mai but de panž šela phral anda jekh data, kai but anda lende mai si živinde, makar ke uni mule. ₇Atunči, vo sikadilo ka o Jakob, porme ka sa le apostoli.

₈Pala lende sa, vo sikadilo vi mange, sar jekh šiav arakhadilo pala e vramia; ₉ke me sim o mai tsinořo anda le apostoli, me či sim harniko t'akharen ma apostolo, ke me mardem e Khangeri le Devleski. ₁₀Katar o mištimos le Devlesko me sim so sim, ai lesko mištimos karing mande nas intaino; dur kothar, me kerdem butji but mai but sar savoře; na me, numa o mištimos le Devlesko kai si ande mande. ₁₁Kadi si, ke te si me, ke te si von, eta so ame phenas, ai so tume patian.

₁₂Eta, te dena duma pa ke o Kristo uštilo anda le mule, sar uni maškar tumende šai phenen von ke či živindin le mule? ₁₃Te na živindina le mule, či o Kristo nai živindo. ₁₄Ai te nai o Kristo živindo, amaro divano nai khančesko, ai vi tumaro patiamos nai khančesko ₁₅Šai vi t'avel kadia ke ame sam falši martururi karing o Del, ke ame sam martururi pe o Del ke vo živindisardias le Kristos, numa te si ke le mule či živindin, vo či živindisardias les. ₁₆Ke te si ke le mule či živindin, o Kristo vi vo či živindisailo. ₁₇Ai te si ke o Kristo či živindisailo, tumaro patiamos si intaino, tume mai san ande tumare bezexa, ₁₈ai anda kudia vi kudala kai mule ande o Kristo si xasarde. ₁₉Te si ferdi ke ande kado traio ke ame patias ande o Kristo, ame sam le mai nekežime anda sa le manuš.

₂₀Numa akana, o Kristo živindisailo anda le mule, vo si o mai angluno anda le mule. ₂₁Ke, sar ke o merimos avilo ferdi katar jekh manuš, si vi katar jekh manuš ke avilias o živindimos katar le mule. ₂₂Ai sar ame meras ande o Adam, sa kadia ame traisaras ande o Kristo, ₂₃numa sako ande pesko řindo, o Kristo sar o mai angluno, porme kudala kai si le Kristoske, kana vo avela. ₂₄Atunči avela te getol pe sa, kana vo dela e amperetsia ka kudo kai si Del ai Dad, pala ke bilavela sa kai porončinas, sako baro ai sako zor. ₂₅Ke vo trubul te amperetsil žikin či sa leske dušmaia t'aven tela leske punře. ₂₆O mai paluno dušmano kai avela bilado, si e martia. ₂₇O Del, čačes, sa thodias tela peske punře. Numa kana vo phenel ke sa si tela leste, si sikado ke kudo kai si baro pe sa le dieli vo či perel. ₂₈Ai kana sa le dieli avena tela leste, atunči vi o Šiav inke avel tela leste ande sa le dieli, eta ke o Del t'avel sa ande sa.

₂₉Aver fialo, so kerena kudala kai bolen pe pala le mule? Te si ke či jekh fialo či ušten le mule, sostar bolen pe von pala lende? ₃₀Ai ame, sostar sam ame sako časo ande o xasamos? ₃₁Sako dies šai te merav, me žianav, phralale, katar o vestimos kai tume san mande, ande o Jesus Kristo amaro Baro. ₃₂Te si pala o zakono manušesko ke me mardem ma pe e žigania ande o Efeso, so nirisardem me? Te le mule te na živindina, xas ai pias, ke tehara ame meras.

₃₃Te na šibin tume: le žiungale vortača rimon le laše dieli so keren. ₃₄Aven tumende, sar mai trubul, ai na keren bezexa; ke uni či žianen le Devles; me phenav les pe tumaro lažiav.

₃₅Numa uni phenena: Sar živindina le mule, ai če statosa avena von. ₃₆Dile! so tu thos te bariol či avela te trailo, te na merela. ₃₇Ai so tu bariares, nai ke si o stato kai arakhadiol; si ferdi jekh tsinoři simintsa, anda o gjiv amburim, vai anda varesavi simintsa; ₃₈Porme o Del del les stato sar vo kamel, ai ka sako simintsa vo del jekh stato sar si lesko.

₃₉Sako mas nai sa jekh fialo mas; numa aver si o mas le manušengo, aver si kudalengo si len štar punře, aver si le čirikliango, aver si le mašengo.

₄₀Vi mai si staturi le čereske ai staturi la phuviake; numa aver fialo si te strefian le čereske, aver le phuviake. ₄₁Aver fialo strefial o kham, aver fialo strefial o šiunuto, ai aver fialo strefian le čeřaia; inke jekh čeřai či strefial sar jekh kaver čeřai;

₄₂Kadia si kai živindin le mule. O stato si thodino te bariol rimome, vo živindila bi rimome; ₄₃vo si thodino te bariol vuřito, vo živindila vestime; vo si thodino te bariol bango, vo živindila pherdo zor; ₄₄vo si thodino te bariol stato žiganiako, vo živindila stato duxosko. Te si jekh stato žiganiako, vi mai si jekh stato duxosko. ₄₅Sa anda kudia si ramome: O mai angluno manuš, o Adam, areslo jekh živindo. O mai paluno Adam areslo jekh duxo živindo. ₄₆Numa so si duxosko nai o mai angluno, so si masesko si; so si anda o duxo avel pala kudo. ₄₇O mai angluno manuš, tsirdino anda e phuv, si phuviako; o duito manuš si anda o čeri. ₄₈Sar o manuš phuviako, kadia si vi le phuviake; ai sar o manuš čeresko, kadia si vi le čereske. ₄₉Ai sa sar jekh fialo ame ninkerdiam o vobrazo la phuviako, ame ninkerasa vi o vobrazo le čeresko.

₅₀So me phenav, phralale, si ke o mas ai o rat naštin te len e amperetsia le Devleski, ai ke o rimome naštil te lel so nai rimome.

₅₁Eta, me phenav tumenge jekh čudenia: ame či merasa sa, numa ame sa avasa pařude, ₅₂ande jekh vramia, sar marel e jakh, ka e mai paluno tuturiaza. E tuturiaza bašela, ai le mule uštena bi rimome, ai ame, ame avasa pařude. ₅₃Ke trubul ke kado stato rimome thol pe peste so nai rimome, ai ke kado stato merimasko lel pe peste o stato kai či merel: ₅₄kana kado stato rimome lela pe peste so či rimol pe, ai kana kudo stato merimasko lela pe peste so či merel, atunči aresela e vorba kai si ramome:

₅₆E suv le merimaski, si e bezex; ai e zor la bezexaki, si o zakono. ₅₇Numa nais le Devleske, kai del ame te nirisaras katar o Rai o Jesus Kristo!

₅₈Kadia, muře phral pria drago, bešen zurales, te na miškin tume, keren butji sar mai mišto ka e butji le Bareski, žianen ke tumari butji či avela intaino ande o Baro.