1 Korintianuri 5

₁Ašunas ke phenen pa tumende sakda ke si maškar tumende kurvetsia, ai jekh kasavi kurvetsia kai inke nai ka kudala kai či patian; kadia griatsa ke jekh anda tumende si les e řomni leske dadeski. ₂Ai tume kerdilian barimatange! ai tume či sanas mai sigo ande o nekazo, eta ke kudo kai kerdias kudia te šiuden les dur tumendar! ₃Mange, nai kothe muřo stato, numa si muřo duxo, me inke dem pe kris, sar te avilemas kothe, pe kudo kai kerdias kadia. ₄Ande o anav le Baresko o Jesus, tume ai muřo duxo si ande jekh than la zorasa katar o Rai Jesus, ₅ke jekh kasavo manuš te den les ka o Satan te bilavel lesko mas, eta ke o duxo t'avel skipime ka o dies le Baresko o Jesus.

₆Intaino si ke tume luvudisaren tumen. Či žianen tume ke jekh tsiřa drosda uštiavel sa o manřo? ₇Šiuden tumendar e purani drosda, eta tume t'aven jekh manřo nevo, ke tume san bi drosdako, ke o Kristo, amaro bakrořo patradiako, sas mudardo. ₈Vestisaras o prasniko, na la purane drosdasa, na la drosdasa anda e xitrenia ai anda o nasul, numa le manřesa bi drosdako katar o vužimos ai katar o čačimos. ₉Me ramosardem tumenge ande muřo lil te na keren khanči le kurvarensa - ₁₀na le kurvarensa anda kadia lumia, vai le xanvalensa ai le čorensa, vai kudalensa kai patian ande le kaver dela: aver fialo trubula tume t'anklen avri anda e lumia. ₁₁Akana, so me ramosardem tumenge, si te na keren khanči unensa kai, akharen pe phral, si kurvari, vai xanžvale, vai kai patian ande le kaver dela vai prasan, vai matiarne, vai čora, te na inke xan kasave manušensa.

₁₂Ke so si ma, čačes, te dav kris kudalen kai si avri? Nai kudalen kai si andre kai tume trubul te den kris? ₁₃Kudalen kai si avri, o Del del len kris. Len avri le nasules maškar tumende.