1 Korintianuri 8

₁So si pala o mas šinado le kavre devlenge?

Ame žianas ke amen si sa so žianas, — o sikiarimos phukiarel, numa e mila vazdel. ₂Te si varekon ke gindil pe ke žianel vareso, vo inke či žianel sar trubul te žianel. ₃Numa te si varekon ke kamel le Devles, kudales vo prinžiarel les.

₄Pala so si ke te xan mas kai si šinado le kavre devlenge ame žianas ke nai von khanči ande e lumia, ai ke si ferdi jekh Del. ₅Ke, te si manuš ke akharen le dela, t'avela ande o čeri, t'avela pe e phuv, sar ke čačes si but dela ai but bare, ₆numa amenge si ferdi jekh Del, o Dad, kastar aven sa le dieli ai kaske ame sam, ai ferdi jekh Rai o Jesus Kristo, kastar si sa le dieli ai kastar ame sam.

₇Numa kudo žianglimos nai ka sa. Uni, sar von mai len sama katar le vobrazi, xan anda kudala masa sar si šinade ka le vobrazi, ai lengi godji, kai si kovli, si mahrime. ₈Nai ke si jekh xamos te pašiarel ame ka o Del: t'ame xasa, amen nai ame khanči mai but; te na ame xasa, amen nai ame khanči mai xantsi.

₉Len tume sama, univar, ke tumaro skipimos te na avel te peravel tele le kovles. ₁₀Ke, te si varekon ke dikhel tu, tu kai žianes, bešes pala e skafidi ande jekh templo kavre devlesko, vo kai si kovlo, či xala vo pa kudia le masa šinade ka le kaver devlenge? ₁₁Ai kadia o kovlo xasavola katar tu žianes, o phral pala savo o Kristo mulo! ₁₂Ke keres kadia bezex pe le phral, ai ke rimos lengi godji kovli tu keres bezex pe o Kristo. ₁₃Sa anda kudia, te si jekh xamos ke nai mišto muře phraleske, me či xava šoha mas, eta te na kerav te perel muřo phral.