1 Jono 1

₁So si de anda o gor, so ame ašundiam, so ame dikhliam amare jakhensa, so ame liam sama ai so amare vast asbade, hadia si o divano le traiosko, ₂ke o traio si sikado, ai ame dikhliam les ai ame sam leske martururi, ai ame phenas tumenge o traio pe sakda, kai sas paša o Dad ai kai sikadilias amenge. ₃So ame dikhliam ai ašundiam, ame phenas les tumenge, eta ke vi tume t'aven ande jekh than amensa. Eta, ame sam ande jekh than le Dadesa ai leske Šiavesa o Jesus Kristo. ₄Ai ame ramosaras kadala dieli, eta ke amari veselia t'avel laši.

₅E nevestia kai ame ašundiam tumendar, ai kai ame phenas la tumenge, si ke o Del si vedaria, ai ke nai ande leste tuniariko. ₆Te phenasa ame ke ame traisaras lesa, ai ke ame phiras ande o tuniariko, ame xoxavas, ai ame či keras o čačimos. ₇Numa te phirasa ame ande e vedaria, sar si vo ande e vedaria, ame sam jekh avresa ande jekh than, ai o rat katar o Jesus lesko Šiav vužarel ame anda sako bezex.

₈Te phenasa ame ke nai ame bezexa, ame diliaras ame korkořo, ai o čačimos nai ande amende. ₉Te puřisaras ame amare bezexa, vo si čačo ai vorta te jertil amenge, ai te vužarel ame anda sako žiungalimos. ₁₀Te phenasa ame ke nai ame bezexa, ame keras anda leste xoxamno, ai leski vorba nai ande amende.