1 Jono 3

₁Dikhen ke kamimos o Dad sikadias amenge, t'avas ame akharde glati le Devleske! Ai ame sam. Te si ke e lumia či prinžiarel ame, si ke voi či prinžiarel les. ₂Muře kuč, ame sam akana glati le Devleske, ai so ame avasa inke či dikhiol; numa ame žianas ke, kana vo sikavela pe, ame avasa sa jekh fialo sar leste, ke ame dikhasa les sar vo si. ₃Kon-godi si les kudo ažiukerimos ande leste vužiol, sar vo si vužio.

₄Kon-godi kerel bezex šinel e kris, ai e bezex si te šines e kris ₅Eta, tume žianen, o Jesus sikadilo te lel amendar e bezex, ai nai ande leste bezex. ₆Kon-godi bešel ande leste či kerel bezex; kon-godi kerel bezex či dikhel les, ai či prinžiarel les.

₇Tsinoře glati, ke khonik te na diliarel tumen. Kudo kai kerel e kris si vorta, sar vo si vorta. ₈Kudo kai kerel bezex si anda o beng, ke o beng kerdias bezex de anda o gor. O Šiav le Devlesko sikadilo te rimol le butia le bengeske.

₉Kon-godi arakhadilo katar o Del či kerel e bezex, ke e simintsa le Devleski bešel ande leste; ai vo naštil te kerel bezex, ke vo arakhadilo katar o Del. ₁₀Kothar prinžiaren kudalen kai si le glati le Devleske ai le glati le bengeske. Kon-godi či kerel e kris nai ande o Del, či kudo kai nai leske drago lesko phral.

₁₁Ke so sas tumenge phendo ai ke so tume ašundian de anda o gor, si ke trubul t'avas drago jekh avreske, ₁₂ai te na miaziuvas sar o Kain, kai avilo katar o beng, ai kai mudardias peske phrales. Ai sostar mudardias les vo? Ke leske butia sas nasul ai ke kudala leske phraleske sas vorta.

₁₃Te na avel tumenge šodo, phralale, te si ke e lumia vuřitsil tumen. ₁₄Ame žianas ke ame nakhliam katar e martia ka o traio, ke ame kamas le phralen. Kudo kai či kamel bešel ande o merimos. ₁₅Kon-godi vuřitsil peske phrales si jekh kai mudarel, ai tume žianen ke či jekh kai mudarel nai les o traio pe sakda ande leste. ₁₆Ame žiangliam o kamimos, ke vo dias pesko traio pala amende; vi ame, trubul te das amaro traio pala le phral. ₁₇Te si varekon kai si les sa le mištimata la lumiake, ai kai dikhel peske phrales ke trubul les vareso, numa vo phandavel angla leste pesko ilo, sar šai bešel o kamimos le Devlesko ande leste? ₁₈Tsinoře glati, na kamen ferdi le vorbensa ai la šibasa, numa vi le kerimasa ai le čačimasa.

₁₉Kothar ame žianas ke ame sam anda o čačimos, ai ame lašiaras amare ile angla leste; ₂₀ke te si amaro ilo ke del ame strafo, o Del si mai baro sar amaro ilo, ai vo žianel sa le dieli. ₂₁Muře draži, te si ke amaro ilo či del ame strafo, amen si ame te ninkeras angla o Del. ₂₂So avela ke ame mangas, ame lasa lestar, ke ame arakhas leske poronki ai ame keras so si leske drago. ₂₃Ai kathe si leski poronka: ke ame patias ande o anav leske Šiavesko o Jesus Kristo, ai ke ame kamas ame jekh kavres, sar e poronka kai vo dias amen. ₂₄Kudo kai arakhel leske poronki bešel ande o Del, ai o Del ande leste; ai ame žianas ke vo bešel ande amende katar o Duxo kai vo dias amen.