1 Timoteo 2

₁Me vazdav tumen kadia, angla sa le dieli, te keren te řudjin, te mangen, te pušen, řudjimasa, sa le manušenge, ₂le amperatsonge ai sa kudalenge kai si vazdine te porončin, eta t'aven amen jekh traio lašio ai mirno, ande sa e mila ai o čačimos. ₃Kudo si lašio ai drago angla o Del amaro Skipitori, ₄kai kamel te sa le manuš t'aven skipime ai te aresen te žianen o čačimos. ₅Ke ferdi jekh Del si, ai ferdi jekh kai lašiarel maškar o Del ai le manuš, o Jesus Kristo o manuš, ₆kai dias pe vo korkořo te kjinel savořen. Si e marturia phendi ande peski vramia, ₇ai pala savi me sim thodino te dav duma sar apostolo, me phenav o čačimos, me či xoxavav, sim thodino te sikiarav kudalen kai či patian ande o patiamos ai o čačimos.

₈Me kamav ke te le manuš řudjin kai-godi, te vazden vast vuže, bi xoliako ai či gindonsa nasul. ₉Me vi mai kamav ke le žiuvlia t'aven uriarde sar trubul bi-lažiaves ai prosto, te na muken penge čunřa, tela len pe pende sunakai, či meržali, či tsalia pria kuč, ₁₀numa te len pe pende le lašimata, sar trubul le žiuvlian kai kamen te služin le Devles. ₁₁Ke e žiuvli te ašunel muto so sikiol, sa so ašunel. ₁₂Me či mukav la žiuvlia te sikiarel, či t'avel voi bari pe o murš; numa voi trubul te bešel muto. ₁₃Ke o Adamo sas kerdo o mai angluno, e Eva pala kudia; ₁₄ai nai ke o Adamo sas diliardo, si e žiuvli kai, diliardi, aresli došali kai či patiaias. ₁₅Voi avela numa skipime kai aresel dei, te voi žiala angle lokořes ande o patiamos, ande e mila, ai ande o svintsimos.