1 Timoteo 4

₁Numa o Svinto Duxo phenel naročno ke, ande le mai paluni vrami, uni mukena o patiamos, t'astardion ka le duxi kai diliaren ai ka le sikavimata le demononge, ₂katar o xoxaimos le falši doxtorongo kai si pe lende e pečata le lažiaveski ande lengi godji, ₃dena ordina te na ansurin pe, ai te na xan o xamos le Devlesko kai vo kerdias te xan les řudjimasa kudala kai si čače ai kai žianen so si o čačimos. ₄Ke sogodi o Del kerdias si lašio, ai khanči trubul te šiuden, ferdi si te len les naisimasa, ₅ke sa si svintsime katar e vorba le Devleski ai katar o řudjimos.

₆Kana tu phenesa kadala dieli le phralenge, tu avesa jekh lašio ministero katar o Jesus Kristo, pravardo katar le vorbi le čačimaske ai e laši doktrina kai si tu te žial pala late. ₇Numa šiude le paramiča xoxamne kai nai laše, sikio t'avel tu e mila; ₈te aves zuralo ande tjiro stato si mišto numa te bešel paša o Del si mai mišto; vo phenel amenge pe o traio kai si akana ai pe kudo kai si t'avel. ₉Si kathe jekh vorba siguro ai laši t'avel lini. ₁₀Ame keras butji, čačes, ai ame maras ame, ke ame thas amaro ažiukerimos ande o Del živindo, kai si o Baro sa le manušengo, mai but kudalengo kai patian.

₁₁Phen kadala dieli, ai sikiar le. ₁₂Ke khonik te na vuřitsil tjiro ternimos; numa t'aves jekh modelo le čačenge, sar des duma, sar žias, ande e mila, ande o patiamos, ande o vužimos. ₁₃Žikin me či avava, tho tu ka o gjinimos, de duma pa o Del, ai sikiar. ₁₄Na muk rigate so si tu dino kai si ande tute, kai sas tuke dino katar le profeturi ai le vastensa kai le phure thode pe tute. ₁₅Le sama katar muře dieli, ke tu san pala lende, eta ke so tu mai sikios te dikhen les sa. ₁₆Le sama tutar ai pe so tu sikiares; žia angle ande kudala dieli, ke, kai keres tu kadia, tu skipisa tu tut, ai tu skipisa kudalen kai ašunen tute.