2 Jono 1

₁Katar o phuro,

ka e Rani e alome katar o Devel ai ka lake glati, kai si mange drago ande o čačimos, — ai nai ke ferdi me kamav le, numa vi sa kudala kai si lenge drago o čačimos, ₂pala o čačimos kai bešel ande amende, ai kai avela amensa pe sogodi avela e lumia;

₃ke o mištimos, e mila ai e patia t'aven tumensa katar o Del ai katar o Jesus Kristos, o Šiav le Dadesko, ande o čačimos ai e mila.

₄Me but sim veselime ke arakhlem anda tjire glati uni kai phiren ande o čačimos, sar si le poronki kai ame liam katar o Dad. ₅Ai akana, so me mangav tutar, kamli Rani, na ke te dav tu jekh poronka nevi, numa kudia kai si ame de anda o gor; si ke t'avas drago jekh avreske. ₆Ai o kamimos si te phires sar si le poronki. Kathe si e poronka ande savi tume trubun te phiren, sar tume sikilian de anda o gor.

₇Ke but kai athaven dine andre e lumia, kai či puřin ke o Jesus Kristo avilo ande pesko mas. Kudo kai si kadia, si o athavari ai o dušmano le Kristosko. ₈Len tume sama tume, eta te na xasaren e fruta tumaria butiaki, numa tume te len jekh pherdo pokjimos.

₉Kon-godi žial mai angle ai či bešel ande o zakono le Kristosko nai les o Del; kudo kai bešel ande kudo zakono si les o Dad ai o Šiav ₁₀Te si varekon ke avel tumende ai či anel kudo zakono, na ninkeren les ande tumaro kher, ai na phenen leske: Impači! ₁₁ke kudo kai phenel leske: Impači! žial pala leske nasul butia.

₁₂Makar ke si but dieli te ramov tumenge, me či kamlem te kerav kudia la xartiasa ai le černilasa; numa me gindiv ma ke si te žiav tumende, ai te dav duma tumensa mui moste, eta ke amari veselia t'avel laši.

₁₃Le glati katar tjiri phei e alome den tumen pozdraimos.