2 Tesalonisianuri 1

₁Lil katar o Paul, ai o Silas, ai o Timoteo,

ka e khangeri katar le Tesalonikianuri, kai si ande o Del amaro Dad ai ande o Jesus Kristo o Rai:

₂ke o mištimos ai e patia t'avel tumenge dine katar o Del amaro Dad ai katar o Rai o Jesus Kristo!

₃Amen si amen pala tumende, phralale, te naisaras sakda, sar si vorta, le Devles ke tumaro patiamos kerel but mai angle, ai ke e mila anda sako anda tumende karing le kaver butiol but ai mai but. ₄Kadia ame luvudisaras anda tumende ande le kaver khangeria le Devleske, pala tumaro patiamos ai ninkerimos maškar sa o marimos ai le nasulimata kai tume ninkerdian.

₅Sa kodia sikavel ke e kris le Devleski si vorta, t'aven tume harniči ande e amperetsia le Devleski, pala kaste tume kjinuisailian. ₆Ke si e kris katar o Del te rimol kudalen kai rimon tumen, ₇ai te den tumen, tumen kai san nekežime, hodina amensa, kana o Rai o Jesus sikadiola anda o čeri le andželonsa peska zorasa, ₈maškar jekh pařa jagaki, te del strafo kudalen kai či žianen le Devles ai kai či patian ka e Laši Viasta amare Bareski o Jesus. ₉Len avela len o strafo jekh phařaimos pe sakda, dur katar e fatsa le Bareski ai katar e vestia leska zoraki, ₁₀kana vo avela, ande kudo dies, t'avel vestime katar peske svintsi ai drago ka sa kudala kai patian tume avena maškar kuda lende, ke patianas amari marturia.

₁₁Sa anda kudia ame řudjisaras tumenge sakda, eta ke te o Del t'arakhel tumen harniči sar tume kerdian katar pesko akharimos, ai ke te del tumenge katar peski zor sogodi tumen kamlian katar lesko mištimos, ai e butji katar tumaro patiamos, ₁₂ke o anav amare Baresko o Jesus t'avel vestime ande tumende, ai ke tume t'aven luvudime ande leste, sar si o mištimos amare Devlesko ai katar o Rai Jesus Kristo.