Apostoli 10

₁Sas ande o Tsesarea jekh manuš bušol Kornelius, baro pe jekh šel ketani ande e trupa kai akharen les Italianitsko. ₂Kudo manuš patialas ai daralas katar o Del, sa peske kheresa; vo but delas love le narodoske, ai řudjilas le Devles sakda. ₃Karing o trito časo pala mismeri, vo dikhlias jekh suno — sikadilias leske jekh andželo le Devlesko kai dias ande lesko kher, ai phenel leske, Kornelio!

₄Dikhel e andželo ai lias les e dar, vo del palpale: So si, Baria?

Ai o andželo phenel leske: Tjire řudjimata ai so dian le čořenge ankliste opre angla o Del, ai vo či busterel tu. ₅Trade akana manušen ande o Jope, ai ker t'avel o Simon, kai akharen les Petri; ₆vo bešel ka jekh varekon kai bušol Simon, jekh mortsari, lesko kher si paša e maria. ₇De sar o andželo dias lesa duma, gelotar. O Kornelius akharel don anda peske služi, ai jekhe ketanos kai patial maškar kudala kai sas astarde leste; ₈ai, pala ke phendias lenge sa, vo tradias le ande o Jope.

₉Teharin, sar von sas pe o drom, ai ke von pašion paša o foro, o Petri anklisto pe o čardako karing mismeri te řudjil. ₁₀Sas les bokh, ai vo kamelas te xal. Žikin lašiaren leske te xal, vo pelo sar ande e lindri. ₁₁Vo dikhlias o čeri puterdo, ai jekh diela jekh fialo sar jekh tsolo phanglo katar le štar koltsuri, kai vulelas ai perelas karing e phuv, ₁₂ai sas ande o tsolo sa le žigeni štare punřensa ai le sapa la phuviake ai le čiriklia le čereske. ₁₃Ai jekh hango phenel leske: Ušti, Petri, mudar ai xa.

₁₄Numa o Petri phenel: Niči, Baria, ke me šoha či xalem mahrime či so nai vužio.

₁₅Ai pe duito data o hango ašundiol leske: So o Del phendias ke si vužio, na dikh pe leste sar t'avel mahrime. ₁₆Kudia areslias trivar; ai strazo pala kudia, e diela sas line ande o čeri.

₁₇Žikin ke o Petri či žianelas so te gindil anda so dikhlias kai sas, eta, le manuš tradine katar o Kornelius, pušle kai si o kher le Simonosko, avile angla o vudar, ₁₈ai pušen zurale hangosa te bešel kothe o Simon, kai bušol Petri.

₁₉Ai sar o Petri delas pe godji so vi dikhlias, o Duxo phenel leske: Eta, trin manuš mangen tu; ₂₀ušti, vuli, ai žia lensa bi te ažiukeres, ke me sim kai tradem len. ₂₁Kadia o Petri vulisto, ai vo phenel kudale manušenge: Eta, me sim kudo kai tume roden; pala soste avilian tume?

₂₂Von den palpale: Kornelius, baro pe jekh šel ketani, manuš vorta ai kai daral katar o Del, ai kastar sa le Židovongo den les pativ, sas naročno phendo katar jekh svinto andželo t'akharel tu ande pesko kher ai t'ašunel tjire vorbi.

₂₃O Petri kadia dias len andre, ai bešle kothe.

Teharin, vo uštilo, ai gelotar lensa. Uni anda le phral anda o Jope gele lensa. ₂₄Von aresle ande o Tsesarea o dies pala kudo. O Kornelius ažiukerelas len, akhardiasas gosti peske niamon ai peske vortakon le mai laše. ₂₅Kana o Petri dias andre, o Kornelius, kai gelo angla leste, pelo ka leske punře ai dias čanga. ₂₆Numa o Petri vazdias les, phenelas: Ušti, vi me, me sim jekh manuš. ₂₇Ai dela duma lesa, vo del andre, ai arakhlias but ženen kjidine. ₂₈Tume žianen, phenel lenge vo, nai slobodo jekhe Židovoske te phangiol ka jekh streino vai t'avel leste, numa o Del sikiardias man te na dikhav pe či jekh manuš sar mahrime ai ke nai vužio. ₂₉Sa anda kudia či ninkerdem ma te na avav, sar ke tume akhardian man; me mangav tumen sostar tume tradian te roden man.

₃₀O Kornelius phenel leske: Si de štar diesa, pe kado časo, me řudjivas ande muřo kher ka o trito časo; ai eta, jekh manuš pe leste jekh tsalia sa parno sikadilo angla mande, ai phenel: ₃₁Kornelio, avela sar si tjiro řudjimos, ai o Del dias pe godji so tu dian le čořenge. ₃₂Trade ande o Jope, ai ker te avel o Simon, akharen les Petri; vo bešel ande o kher le Simonosko, o mortsari paša e maria. ₃₃Strazo me tradem karing tute, ai tu mišto kerdian ke avilian. Akana ame san sa angla o Del, t'ašunas sa so o Baro dias tu ordina te phenes amenge.

₃₄Atunči o Petri, puterdias o mui, phenel: Čačimasa, me prinžiarav ke o Del sa jekh fialo lel sama savořendar, ₃₅numa ke ande sako them kudo kai daral lestar ai kai kerel e kris si leske drago. ₃₆Vo tradias e vorba ka le šiave ande o Israel, phendias lenge e laši viasta katar e patia katar o Jesus Kristo, kai si o Rai savořengo. ₃₇Tume žianen so areslias ande e Judea, pala ke lias pe ande Galilea, pala o bolimos kai o Jono phendias; ₃₈tume žianen sar o Del svintsisardias katar o Svinto Duxo ai ande e zor le Jesus anda o Nazaret, kai žialas than thanestar, kerelas mištimos ai sastiarelas sa kudalen kai sas tela e zor le bengeski, ke o Del sas lesa. ₃₉Ame sam martururi anda sa so vo kerdias ande o them le Židovongo ai ande o Jerusalem. Von mudarde les, amblade les pe o trušul. ₄₀O Del živindisardias les o trito dies, ai vo muklias les te sikadiol, ₄₁na sa le narodoske, numa le marturonge alome angla savořende katar o Del, amenge kai xaliam ai piliam lesa, pala ke vo živindisailo katar le mule. ₄₂Ai o Jesus dias amen ordina te phenas le narodoske ai te sikavas ke vo si kai si thodino katar o Del sar krisinitori pe le živinde ai pe le mule. ₄₃Sa le profeturi si leske martururi ke kon-godi patial ande leste katar lesko anav lel o jertimos peske bezexango.

₄₄Sar o Petri mai mothol kudala vorbi o Svinto Duxo vulisto pe sa kudala kai ašunenas e vorba. ₄₅Le Židovuri kai patianas ande o Jesus ai kai avilesas le Petrosa sas lenge šodo ke so si katar o Svinto Duxo vi mai avilo pe le nai-Židovuri. ₄₆Ke von ašunenas lende sar denas duma pe le šiba ai vestin le Devles. Atunči o Petri phenel: ₄₇Šai te na das ame o bolimos le paiesko kudalen kai line o Svinto Duxo kadia mišto sar ame? ₄₈Ai vo dias ordina te bolen len ande o anav le Baresko. Pe kudia řudjisaile leste te bešel paša lende uni dies.