Apostoli 12

₁Karing kudia vramia, o amperato o Herodo thodias pe te kjinuil unen anda e khangeri. ₂Ai vo kerdias te merel la xanřesa le Jakob, phral le Jonosko. ₃Dikhlias ke sas drago le Židovonge, vo mai astardias le Petri. Sas ka le diesa le manřenge bi-drosdake. ₄Pala ke lias les ai šiudias les ande e temnitsa, vo thodias les t'arakhen les štar-var-štar ketanen ke sas les gindo t'anen les angla o narodo pala e Patradi. ₅Kadia o Petri sas garado ande e temnitsa; ai e khangeri či ašelas te řudjin leske le Devles.

₆E riat angla savořende kai o Herodo sas te sikavel les, o Petri, phanglo do lansonsa, sovelas maškar dui ketani; ai kaver angla o vudar arakhenas e temnitsa. ₇Ai eta, jekh andželo le Baresko avilo, ai jekh vedaria strefial ande e temnitsa. O andželo uštiavel le Petri, marel les pe o prašav, ai phenelas: Ušti sigo! Le lansuri pele pa leske vast. ₈Ai o andželo phenel leske: Tho tjiri prastia ai tjire spargati. Ai vo kerdias kadia. O andželo mai phenel leske: Tho pe tute tjiri bunda, ai aidi mansa. ₉O Petri anklisto, či žianelas ke so kerdiol katar o andželo te si čačes, ai vo gindilas pe ke dikhel suno. ₁₀Kana von nakhle katar le mai angluni ketani porme katar le dui, von aresle ka o vudar o sastruno kai žial ande o foro, ai kai puterdilo anda peste angla lende; von ankliste avri, ai gele angle ande jekh vulitsa. Strazo o andželo muklias le Petri.

₁₁Avilo peste, o Petri phenel: Me dikhav akana čačimasa ke o Baro tradias peske andželos, ai ke vo skipisardias ma anda o vast katar o Herodo ai anda sa so o narodo židovitsko ažiukerelas.

₁₂Pala ke dias pe gindo, vo gelo karing o kher la Mariako, e dei le Jonoski, akharenas les Marko, kai but manuš sas ande jekh than ai řudjinas. ₁₃Vo marel ka o vudar kai den andre, ai jekh sluganka, bušol Rod, pašili t'ašunel. ₁₄Voi prinžiardias o hango le Petrosko; ai ande pesko veselimos, bi te putrel, voi našli te phenel ke o Petri si ka o vudar. ₁₅Von phenen lake: Tu san dili. Numa voi zuriarel ke e diela si kadia. Ai von phenen: Lesko andželo si.

₁₆Numa o Petri mai marel. Von puterde, ai sas lenge šodo ke dikhen les. ₁₇O Petri, kerdias lenge anda o vast t'ašen, mothol lenge sar o Baro ankaladias les avri anda e temnitsa, ai vo phenel: Phenen kadia ka o Jakob ai ka le phral. Porme vo anklisto avri, ai gelotar ande jekh kaver than.

₁₈Kana o dies avilo, le ketani but miškisaile, te žianen so areslo le Petroske. ₁₉O Herodo, thodias pe te rodel les ai či arakhlias les, pušel katar kudala kai arakhenas les, ai dias ordina te ningeren le te kjinuin le.

Atunči vo vulisto anda e Judea ande o Tsesarea, te bešel kothe.

₂₀O Herodo sas les ginduri nasul karing le Tirienuri ai le Sidonuri. Numa von avile leste ande jekh than; ai, line pensa le Blaste, kai lel sama lestar, von mangen e patia, ke von trainas katar o amperato.

₂₁Ande jekh dies thodino, o Herodo, pe leste peske tsalia amperatisko, bešelas pe pesko skamin amperatisko, delas lensa duma angla sa. ₂₂O narodo tsipilas: Hango jekhe Devlesko, ai na jekhe manušesko! ₂₃Strazo, jekh andželo le Baresko maladias les, ke vo či luvudisardias le Devles. Ai vo mulo, xalo katar le kjerme.

₂₄Numa e vorba le Devleski geli but ai mai but, ai le vortača bution.

₂₅O Barnabas ai o Saul, pala ke von dine duma, gele palpale ande o Jerusalem, ningerde pesa le Jono, akharen les Marko.