Apostoli 14

₁Ande o Ikonium, o Paul ai o Barnabas dine andre ande jekh than ande e khangeri židovitsko, ai von den duma kadia ke baro narodo anda le Židovuri ai le Grekuri patian. ₂Numa le Židovuri kai či patian vazdine ai xoliarde le duxuri katar le nai-Židovuri pe le phral. ₃Von bešle dosta vramia ande o Ikonium, denas duma zorasa, ninkerdionas-pe pe o Baro, kai vo sas marturo ka e vorba e šukar ai muklias t'aven katar lenge vast čudeni ai šodimata. ₄O narodo anda o foro huladias pe ande dui: uni sas pala le Židovuri, le kaver pala le apostoli.

₅Ai kudala kai či patian ai le Židovuri, ande jekh than penge birevonsa, thodine pe ande jekh than te prasan le ai te mudaren le bařensa. ₆O Paul ai o Barnabas, ašunde kudia, gele te garadion ande le foruri katar e Likaonia, ande o Listre ai o Derbe, ai ande le riga krugom. ₇Ai von phenen kothe e laši vorba.

₈Ande o Listre, bešelas jekh manuš, leske punře bange ai kai šoha či phirdias. ₉Vo ašunel sar del duma o Paul. Ai o Paul, šiudias le jakha pe leste ai dikhlias ke si les patiamos te sastiol. ₁₀Vo phenel pe jekh hango baro: Beš vorta pe tjire punře. Ai vo uštilo ande jekh xutimos ai phirel. ₁₁Kai dikhle so o Paul kerdias, o narodo vazdel o hango, ai phenen pe e šib anda e Likaonia: Le dela sar le manuš vuliste karing amende. ₁₂Von akharenas le Barnabas Jupiter, ai le Paul Merkur, ke vo sas kai delas duma. ₁₃O rašai katar o Jupiter, kai lesko templo sas angla o foro, andias guruva le luludiansa karing o vudar, ai kamelas, sa kadia vi o narodo, te den jekh sakrifiso.

₁₄Le apostoli o Barnabas ai o Paul, ašunde kudia, šinde penge tsalia, ai našle maškar o narodo, ₁₅tsipinas: Manušale, sostar keren tume kadia? Vi ame, ame sam manuš jekh fialo sar tumende; ai, anas tumenge jekh laši viasta, ame mangas tumen te na keren kudala dieli intaino, t'ambolden tume karing o Del živindo, kai kerdias o čeri, e phuv, e maria, ai sogodi si. ₁₆Kudo Del, ande le berša kai nakhle, muklias sa le themen te žian pe pengi vurma sar von kamen. ₁₇Makar ke vo kamelas te kerel marturia anda so si vo, kerel mištimos, del tumen anda o čeri le brišinda ai le vrami kai bariaren, del tume but xamos, ai pherel tumare ile e veselia. ₁₈Trudno sas lenge t'ašaven, katar kudala vorbi, o narodo te na den len jekh sakrifiso.

₁₉Atunči avile anda o Antioxi ai anda o Ikonium Židovuri kai nirisarde o narodo, ai kai šiude bař pe o Paul, ningerde les avri anda o foro, gindinas ke vo si mulo. ₂₀Numa le vortača ašiade krugom les, vo uštilo, ai dias andre ande o foro. Teharin, gelotar ande o Derbe le Barnabasa.

₂₁Kana von sikiarde ande kudo foro ai line uni vortakon, von gele palpale ande o Listre, ande o Ikonium ai ande o Antioxi, ₂₂zuralenas le duxuri le vortakonge, vazdenas le te žian angle ande o patiamos, ai phenenas lenge ke si katar but kjinuimos ke trubun te das andre ande e amperetsia le Devleski. ₂₃Von thonas le puranen lenge ande sako khangeri, ai, pala ke řudjisarde ai postisarde, von den le ka o Baro, ande kaste von patian.

₂₄Nakhenas atunči e Pisidia ai avile ande e Pamfilia. ₂₅Phenen e vorba ande o Perge, ai vuliste ande e Atalia. ₂₆Kothar line o čuno pe o Antioxi, katar von gele pe e poronka le Devleski pe e butji kai von kerde.

₂₇Pala ke von aresle, von akharde e khangeri, ai von mothon sa so Del kerdias lensa, ai sar von puterde le themenge o vudar le patiamosko. ₂₈Ai von bešle dosta vramia le vortakonsa.