Apostoli 22

₁Manušale phralale ai dada, ašunena so si ma akana te phenav tumenge te čačiuvav! ₂Kana von ašunde ke vo delas lenge duma pe e šib aramaiko von mai ašile. Ai o Paul phenel:

₃Me sim Židovo, arakhadilem ande o Tarsus ande e Tsilisia; numa me barilem ande kado foro, ai vorta sikiardo ka le punře katar le Gamaliel ande o zakono amare dadengo. Keravas e butji le Devleski, sar tume adies. ₄Me mudardem pala kadia Vurma, phanglem ai thodem lansonsa ande e temnitsa muršen ai žiuvlian. ₅O baro rašai ai sa e kris katar le purane si muře martururi. Inke me lem lendar lila le phralenge anda o Damasko, kai me gelem eta t'anav phangle ande o Jerusalem kudalen kai sas kothe ai te dav len strafo.

₆Sar me simas pe e vurma, ai ke simas paše o Damasko, strazo, jekh bari vedaria avili anda o čeri ai strefiaias krugom mandar. ₇Me pelem tele, ai me ašundem jekh hango kai phendias mange: Saul, Saul, sostar kjinuis ma tu? ₈Me dem palpale: Baria, kon san tu? Ai vo phendias mange: Me sim o Jesus anda o Nazaret, kai tu kjinuis. ₉Kudala kai sas mansa dikhen mišto e vedaria, numa či ašunenas o hango kudalesko kai del duma. Atunči me phendem: So si te kerav me, Baria? ₁₀Ai o Baro phendias mange: Ušti, žia ande o Damasko, ai kothe phenena tuke sa so si te keres. ₁₁Sar me či dikhavas khanči, pala o strefiamos kudala vedariako, kudala kai sas mansa line ma vastestar, ai me areslem ande o Damasko.

₁₂Eta, jekh manuš akharen les Ananias, manuš kai patial sar si o zakono, ai kai sa le Židovuri kai bešenas ande o Damasko phenenas jekh laši diela pa leste, ₁₃avilo te sikadiol mande, ai phenel mange: Saul, muřo phral, puter tjire jekha. Strazo muře jakha puterdile ai dikhav les. ₁₄Vo phenel: O Del amare dadengo šinadias tu te žianes so vo kamel, te dikhes kudales kai si vorta, ai t'ašunes e vorba anda lesko mui: ₁₅ke tu avesa lesko marturo, paša sa le manuš, anda le dieli kai tu dikhlian ai ašundian. ₁₆Ai akana, so ažiukeres tu? Ušti, av boldo, ai xalado anda tjire bezexa, kai akhares o anav le Baresko.

₁₇Palpale ande o Jerusalem, sar me řudjivas ande o templo, dikhlem jekh dikhimos. ₁₈Me dikhlem le Bares kai phenelas mange: Gribisavo, ai ankli sigo avri anda o Jerusalem, ke von či lena opre so si te phenes pa mande. ₁₉Ai me phendem: Baria, von inke žianen ke me thavas ande temnitsa ai keravas te maren řaiasa ande le khangeria židovitsko kudalen kai patianas ande tute, ₂₀ai ke, kana mudarde le Stefano, tjiro marturo, inke me simas kothe, vi me žiavas pala le kaver, ai arakhavas le tsalia kudalenge kai mudarde les. ₂₁Atunči vo phenel mange: Me tradava tut dur karing le thema.

₂₂Von ašunde leste ži ka kudia vorba. Numa atunči von vazdine o hango, phenenas: Len pa e phuv kasavo manuš! Vo nai harniko te trail. ₂₃Ai von spiden tsipimata, šiuden penge tsalia, šiuden kišai pe balval. ₂₄O fitsiri dias poronka te den andre le Paul ande o armia, ai te maren les le bičosa, eta te žianel pala soste tsipin kadia pe leste. ₂₅Pala ke marde les le bičosa, o Paul phenel le ketaneske kai sas kothe: Si tuke slobodo te mares jekhe manušes kai si romano, kai inke nai dino strafo?

₂₆Ka kudala vorbi, o ketano gelo te phenel le fitsireske, phenelas: So si te keres tu? Kado manuš si romano.

₂₇Ai o fitsiri, avilo vo, phenel ka o Paul. Phenen mange, san tu romano.

Ei, del vo palpale.

₂₈O fitsiri mai phenel: Me pokindem but love te aresav romano.

Ai me, phenel o Paul, sim romano dekin arakhadilem.

₂₉Strazo kudala kai trubulas te maren les dine pe palpale, ai o fitsiri, dikhlias ke o Paul si romano, lias les e dar ke phanglias les.

₃₀Teharin, sar kamelas te žianel vorta so le Židovuri thon beda pe leste, o fitsiri lias pa leste le phanglimata, ai dias ordina ka le bare raša ai ka sa e kris le židovongi te kjiden pe; porme, anenas tele le Paul, vo thodias les maškar pende.