Apostoli 5

₁Numa jekh manuš kai bušolas o Ananias, la Safirasa leski řomni, bikjindias jekh phuv, ₂ai ninkerdias jekh partia anda so bikjindias. Leski řomni žianelas. Porme andias so ašilias, ai thodias les ke le punře le apostolonge. ₃O Petri phenel leske: Ananias, sostar o Satan pherdias tjiro ilo, kadia sar tu xoxaves le Svinto Duxo, ai ke tu ninkerdias jekh partia anda so lian kana bikjindian o kimpo. ₄Te na avilinosas bikjindo, nas t'avel tjiro? Ai, pala ke sas bikjindo le love nas von t'aven tjire? Sar tromailian tu te thos ande tjiro ilo kasavo gindo? Nai ke le manušenge ke tu xoxadian, numa le Devleske. ₅O Ananias, ašundias kudala vorbi, pelo tele, ai mulo. Jekh bari dar lias sa kudalen kai sas kothe. ₆Le terno murš uštile, phangle les, ningerde les, ai angroposarde les.

₇Pašte trin časuri pala kudia, leski řomni del andre, bi te žianel so nakhlias. ₈O Petri del lasa duma: Phen mange, si pe če prešo kai tume bikjindian o kimpo?

Ei, del voi palpale, si pe kudo lov.

₉Atunči o Petri phenel lake: Sar tume thodian tume ande jekh than te zumaven le Duxos le Baresko? Eta, kudala kai angroposarde tjire řomes si ka o vudar, ai von ningerena tut. ₁₀Strazo, voi peli tele ke le punře le apostoloske. Le terne murš, arakhle la muli; von ningerde la, ai angroposarde la paša lako řom. ₁₁Jekh bari dar lias sa e khangeri ai sa kudalen kai ašunde kudala dieli.

₁₂But čudeni ai šodo kerdionas maškar o narodo katar le vast le apostolonge. Von bešenas sa ande jekh than ka o vudar katar o Salomon, ₁₃ai khonik anda le kaver či tromalas te žial lensa; numa o narodo luvudinas len oprune hangosa. ₁₄Le but kudala kai patianas le Bares, murš ai žiuvlia, bution but ai mai but; ₁₅kadia ke anenas le nasvalen ande le vulitsi ai ke thonas le pe le thana ai kai soven, eta ke, kana o Petri nakhela, leski ušialin t'avel te garavel uni anda lende. ₁₆O baro narodo vi mai našel anda le foruri paše, anenas le nasvalen ai le ženen kai si ande lende duxuri bi-vuže; ai sa sas saste.

₁₇Numa o baro rašai ai sa kudala kai sas lesa, e partida katar le Sadusenuri, uštile, pherde xoli, ₁₈thodine le vast pe le apostoli, ai šiudine le ande e temnitsa publiko. ₁₉Numa jekh andželo le Baresko puterdias žikin si e riat le vudara la temnitsake, ankaladias le avri, ai phenel lenge: ₂₀Žian, bešen ande o templo, ai phenen sa le narodoske sa le vorbi kadale neve traioske. ₂₁Kana ašundine kudia, von dine andre de diminiatsara ande o templo, ai thode pe te sikiaren.

O baro rašai ai kudala kai sas lesa avile, von akharde e kris židovitsko ai sa le phure katar le šiave ande o Israel, ai von tradine te žian t'anen le apostolon anda e temnitsa. ₂₂Le slugi, kana aresle, či arakhle le ande e temnitsa, von avile palpale, ai phende so sas, ₂₃Phenenas: Ame arakhliam e temnitsa mišto phandadi, ai kudala kai arakhen sas angla o vudar; numa, pala ke puterde, ame či arakhliam khanikas andre. ₂₄Kana von ašunde kudala vorbi, o fitsiri le templosko ai le bare raša či mai žianenas so te gindin pe le apostoli ai so mai avela angle anda kudia diela. ₂₅Varekon avel te phenel lenge: Eta, le manuš kai tume thodian ande e temnitsa von si ande o templo, ai von sikiaren o narodo. ₂₆Atunči o fitsiri gelotar le slugensa, ai ningerdias le apostolon, bi zorako, ke sas lenge dar ke mudaren le bařensa o narodo.

₂₇Pala ke ningerde le angla e kris židovitsko, o baro rašai pušel le kadia: ₂₈Či phendiam tumenge ame zorasa te na sikiaren ande kudo anav? Ai eta, tume pherdian o Jerusalem ande tumaro sikiarimos, ai tume kamen te peraven pe amende o rat kudale manušesko!

₂₉O Petri ai le apostoli den palpale: Mai mišto te patias le Devles sar le manušen. ₃₀O Del katar amare dada živindisardias le Jesus, kai tume mudardian, kai ambladian les ka o kašt. ₃₁O Del vazdias les pe pesko čačo sar Prinso ai Skipitori, te del ka o Israel te keil pe ai te jertil leske bezexa. ₃₂Ame sam martururi ande kudala dieli, sa jekh fialo si o Svinto Duxo kai o Del dias ka kudala kai patian ande leste.

₃₃Xoliariko anda kudala vorbi, von kamenas te mudaren len. ₃₄Numa jekh Fariziano, bušol o Gamiliel, zakonari, drago sas le narodoske, uštilo ande e kris židovitsko, ai dias ordina t'ankalaven avri pe tsiřa vramia le apostolon. ₃₅Porme vo phenel lenge: Manuš anda o Israel, len tume sama so tume si te keren karing kadala žene. ₃₆Ke, nai de dumult ke sikadilo o Teudas, kai motholas ke vo si varekon, ai kaste gele pašte štar šela manuš: Mudarde les, ai sa kudala kai gele pala leste gonisarde le ai manai khanči. ₃₇Pala leste, sikadilo o Juda o Galileno, ande e vramia kai gjinenas o narodo, ai vo anelas peste ka peski partida baro narodo; vi vo xasailo, ai sa kudala kai gele pala leste purisaile. ₃₈Ai akana, me phenav tumenge, na len sama katar kudala manuš, ai muken le te žiantar. Te kadia diela vai kadia butji avena katar le manuš, von perena tele; ₃₉t'avena katar o Del, tume naština te phagen len. Den tumen sama te na thon tume te maren pe le Devlesa.

₄₀Von gele pala leste sar vo phendias. Ai akharde le apostolon, von thode te maren le řaiansa, ai phende lenge te na den duma ande o anav le Jesusosko, ai von mukle le. ₄₁Le apostoli geletar anda e kris židovitsko, veseli ke sas dine pe kris harniči ke marde mui lendar pala o anav le Jesusosko. ₄₂Ai sako dies, ande o templo ai ande le khera, von či ašenas te na sikiaren, ai te phenen e laši viasta katar o Jesus Kristo.