Kolosianuri 3

₁Te živindisailian tume le Kristosa, roden le dieli opral, kai o Kristo bešel pe rig e čači le Devleski. ₂T'avel tumenge drago le dieli opral, ai na kudala kai si pe e phuv. ₃Ke tume san mule, ai tumaro čačo traio si garado ande o Kristo le Devlesa. ₄Kana o Kristo, tumaro traio, sikadiola, atunči vi tume sikadiona lesa ande o vestimos.

₅Keren te meren le kotora kai si phuviake, sar e kurvetsia, o marimos, so kamel o mas, le ginduri nasul, ai o xanžvalimos (kai si sar vobrazi kai patian ande le). ₆Si pala kudala dieli ke e xoli le Devleski avel pe le šiave kai buntuin pe, ₇maškar save tume phirenas angla savořende, kana tume trainas ande le bezexa.

₈Numa akana, muken tele sa kudala dieli, muken e xoli, na mesain tumen sar le žigeni, muken o nasulimos, o prasaimos ai le vorbi žiungale kai šai anklen anda tumaro mui. ₉Na xoxaven jekh avres, ke muklian o purano traio ai leske butia, ₁₀ai thodian pe tumende o traio nevo, kai neviol, sar si o vobrazo kudalesko kai kerdias tumen. ₁₁Nai kathe či Greko či Židovo, či šindo či bi-šindo, či sirbato či Skito, či řobo či slobodo; numa o Kristo si sa ai ande sa.

₁₂Kadia si, sar alome katar o Del, svintsi ai pria dragi, thon pe tumende le pořa la milake, le kamimaske, le kovlimoske, le guglimaske, le ažukerimaske. ₁₃Ai, te si jekh anda tumende te vatil-pe pe o kaver, ninkeren tume jekh avres, jertin tume jekh avres. Sar ke o Kristo jertisardias tumen vi tume jertin tumen. ₁₄Numa mai opral sa kudala dieli thon pe tumende opral e mila, kai astarel tume sar mai mišto. ₁₅Ai ke e patia le Kristoski, ka savi tume san akharde t'avel tumen ferdi jekh stato, t'amperetsil ande tumare ile. Ai te naisin. ₁₆Ke te e vorba le Kristoski te bešel ande tumende but; sikiaren jekh avres ai vazden tume jekh avres ande sako godji, katar le psalmoria, katar le gjilia, katar le gjilia duxoske, gjilaben le Devles ande tumare ile tela o mištimos. ₁₇Ai sogodi tume kerena, la vorbasa vai la butiasa, keren sa ande o anav le Jesus Kristosko, keren lestar o naisimos le Devleske o Dad.

₁₈Řomnia, patian o mui tumare řomengo, sar trubul ande o Baro.

₁₉Řoma, kamen tumare řomnian, ai na xoliavon pe lende.

₂₀Glati, patian o mui ande sa le dieli ka tumare dada, ke kudia si drago le Bareske.

₂₁Dada, na xoliaren tumare glaten, daratar ke na peren tele.

₂₂Řoburi patian ande sa le dieli ka tumare birevia sar si o mas, na ferdi angla lenge jakha, sar t'aven drago le manušenge, numa kovle ilesa, daratar katar o Baro. ₂₃Sa sogodi tume keren, keren les laše ilesa, sar le Bareske ai na le manušenge, ₂₄žianen ke tume lena katar o Baro so si lesko t'avel tumaro. Služin le Kristos, o Rai. ₂₅Ke kudo kai či kerel vorta lela so nai vorta, ke či lela o Del sama jekhestar mai but avrestar.