Galatian 1

₁Lil katar o Paul, apostolo, tradino na katar le manuš, či katar jekh manuš, numa katar o Jesus Kristo ai o Del o Dad, kai živindisardias les katar le mule, ₂ai sa le phral kai si mansa, ka le Khangeria kai si ande e Galatia: ₃ke o mištimos ai e patia t'avel tumenge dine katar o Del o Dad ai katar amaro Rai o Jesus Kristo, ₄kai dias pe vo korkořo pala amare bezexa, eta te lel amen avri anda kadala berša nasul, sar kamlias amaro Del ai Dad, ₅t'avel o mištimos berš beršestar! Amen!

₆Mange šodo ke tume muklian kadia sigo o Del kai akhardias tumen le mištimasa katar o Jesus, te nakhen ka jekh kaver laši viasta. ₇Na ke mai si jekh kaver laši viasta, numa ke si žene kai diliaren tumen, ai kai kamen te den muial e Laši Viasta katar o Kristo. ₈Numa, kana makar ame, kana jekh andželo anda o čeri anela tumenge jekh kaver laši viasta sar kudia kai ame phendiam tumenge, t'avel armandino! ₉Ame phendiam angla savořende, ai me mai phenav les pe kado časo: Te si varekon ke anel tumenge jekh kaver laši viasta sar kudi kai tume lian, t'avel armandino!

₁₀Ai kana, si o lašimos le manušengo kai me kamav, vai le Devlesko? Rodav me t'avav drago le manušenge? Te mai avava drago le manušenge, či avilemas sluga le Kristoski.

₁₁Me phenav tumenge, phralale, ke e Laši Viasta kai si phendi mandar nai katar o manuš; ₁₂ke me či lem ai či sikilem la katar jekh manuš, numa sikadias la mange o Jesus Kristo. ₁₃Tume žianglian, čačes, sar me traivas angla savořende kana simas astardo ande o patiamos židovitsko, sar me rimovas sar mai zurales ai phagavas e Khangeri le Devleski, ₁₄ai sar me žianavas ande o patiamos židovitsko mai but kudalendar kai sas ande muře berš ai ande muřo them, pria lemas ma opre pala le zakonuri katar muře dada.

₁₅Numa, kana sas drago le Devleske kai thodias ma rigate dekin arakhadilem katar muři dei, ai kai akhardias ma katar peski dragostia, ₁₆te sikavel mange pesko šiaves, eta te phenav pa leste ka kudala kai či patian, strazo, či lem sama či khanikastar, ₁₇ai me či anklistem ande o Jerusalem karing kudala kai sas apostoli angla savořende mandar, numa gelemtar ande e Arabia. Porme, mai avilem palpale ande o Damasko. ₁₈Trin berš pala kudia, me gelem ande o Jerusalem te prinžiarav le Petri, ai me bešlem deš-u-panž dies leste. ₁₉Numa me či dikhlem či jekh anda le kaver apostoli, te na nas ferdi o Jakob, o phral le Baresko.

₂₀Ande so me ramosardem tumenge, eta, angla o Del, me či xoxavav.

₂₁Me atunči gelem ande le riga katar e Siria ai e Tsilisia. ₂₂Eta, či prinziarenas ma pe o mui le khangeria anda e Judea kai si le Kristoske; ₂₃ferdi, von ašunde ke phenen: Kudo kai aver data marelas ame phenel akana o patiamos kai vo kamelas te phařavel. ₂₄Ai von luvudisarde le Devles pala mande.