Jakob 3

₁Muře phralale, te na avel maškar tumende but manuš kai thon pe te sikiaren, ke tume žianen ke ame avasa pe e kris mai zurales. ₂Ame miškisaras sa pe but vrami. O manuš kai či miškil pe la vorbasa si jekh manuš vorta, harniko te ninkerel sa pesko stato salavaresa. ₃Te thasa ame o salavari ande o mui le grastengo te patian amaro mui, ame vi keras te tradas sa lengo stato. ₄Eta, inke le čuni, kai si kasave bare ai kai spidel len le balvalia buntuimaske, si ningerde katar jekh tsinoři řata, sar kamel kudo kai tradel. ₅Sa kadia, e šib si jekh tsinořo kotor ai voi luvudil pe anda bare dieli.

Eta, sar jekh tsinoři jag šai del pařa jekh baro veš! ₆E šib vi voi si jekh jag; si e lumia e bezexali. E šib si thodini maškar amaro stato, mahril sa o stato, ai del pařa sa o traio la pařasa kai avel katar o nasulimos. ₇Sako fialo žigeni ai čiriklia, le sapa ai le maše, si sikiarde ai sas sikiarde katar le manuš; ₈numa e šib, či jekh manuš naštil te sikiarel la; si nasul ai naštil te sikiarel la; voi si pherdo velino merimasko. ₉Latar ame svintsisaras le Bares amaro Dad, ai latar ame das armaia le manušen kai si kerde sar o vobrazo le Devlesko. ₁₀Anda sa kudo mui anklel avri o svintsimos ai e armai. Či trubul, muře phralale, t'avel kadia. ₁₁O paiořo kai vulel anda jekh than či del o pai guglo ai o pai kerko. ₁₂Jekh figa, muře phralale, naštil del voi maslini, vai jekh rez naštil del figi? Anda o pai lonalo naštil te del pai guglo.

₁₃Savo anda tumende si lašio ai godiaver? Ke te sikavel kadia peske butia katar jekh lašio traio kovlimasa ai godiaverimasa. ₁₄Numa te si tumen ande tumaro ilo žaluzia kerki ai jekh duxo čingarako, na luvudin tume ai na xoxaven pe o čačimos. ₁₅Kadia godiaverimos nai voi kai avel de opral; numa si phuviaki, maseski, bengeski. ₁₆Ke kothe kai si jekh žaluzia sigo ai jekh duxo čingarako, si buntuimos ai sako diela nasul. ₁₇E godiaverimos de opral si mai angluno vuži, atunči patiaki, kovli, lašiarimaski, pherdi mila ai laše fruti, či diliarel, či athavel. ₁₈E fruta la krisaki si thodini ande e patia kadalendar kai roden e patia.