Jono 14

₁Ke tumaro ilo te na rimol pe. Patian ande o Del, ai patian ande mande. ₂Si but thana kai te bešen ande o kher muře Dadesko; te na avilinosas kadia, me phendemas les tumenge. Me žiav te lašiarav tumenge jekh than. ₃Ai, kana me žiavatar, ai ke lašiardem tumenge jekh than, me avava palpale, ai me lava tumen mansa. Eta ke kothe kai me avava t'aven vi tume. ₄Tume žianen kai me žiav, ai tume žianen e vurma.

₅O Tomas phenel leske: Baria, ame či žianas kai tu žias; sar žianasa ame e vurma?

₆O Jesus phenel leske: Me sim e vurma, o čačimos, ai o traio. Khonik či avel ka o Dad ke ferdi mandar. ₇Te žianena man tume, tume žianena vi muře Dades. Ai de akanara tume žianen les, ai tume dikhlian les.

₈O Filipo phenel leske: Baria, sikav amenge le Dades, ai avela amenge dosta.

₉O Jesus phenel leske: Si de dumult ke mii sim tumensa, ai tu či prinžiardian ma, Filipo? Kudo kai dikhlias man dikhlias le Dades. Sar phenes tu: Sikav amenge le Dades? ₁₀Či patias tu ke me sim ande o Dad, ai ke o Dad si ande mande? Le vorbi kai me phendem tumenge, či phenav le me mandar; ai o Dad kai bešel ande mande, vo si kai kerel peske butia. ₁₁Patian mande, me sim ande o Dad, ai o Dad si ande mande; patian mišto katar leske butia. ₁₂Čačimasa, čačimasa, me phenav tumenge, kudo kai patial ande mande kerel vi vo le butia kai me kerav, ke me žiavtar ka o Dad. ₁₃Ai sa so tume mangena ande muřo anav, me kerava les, eta ke te o Dad luvudil pe ande o Šiav. ₁₄Te mangena mandar vareso ande muřo anav, me kerava les.

₁₅Te kamena tume ma, garavena muře poronki. ₁₆Ai me, me řudjiva le Dades, ai vo tradela tumenge jekh kaver kai lela sama tumendar, eta te bešel sakda tumensa. ₁₇Vo si o Duxo le čačimasko, kai e lumia naštil te lel, ke vo či dikhel les ai či žianel les; numa tume, tume žianen les, ke vo bešel tumensa.

₁₈Me či mukava tumen korkořo, me avava tumende. ₁₉Mai jekh tsiřa vramia, ai e lumia či mai dikhela ma; numa tume, tume dikhena ma, ke me traiv, ai vi tume traina. ₂₀Ande kudo dies, tume prinžiarena ke me sim ande muřo Dad, ai ke tume san ande mande ai ke me sim ande tumende.

₂₁Kudo kai si les muře poronki ai kai garavel le, kudo si kai kamel ma; ai kudo kai kamel ma avela drago muře Dadeske, me kamava les, ai me kerava te prinžiarel ma.

₂₂O Juda, na o Iskariot, phenel leske: Baria, katar avela ke tu keresa te prinžiaras tu, ai na e lumia?

₂₃O Jesus del les palpale: Te si varekon ke kamel ma, vo garavela muře vorbi, ai muřo Dad kamela les; ame avasa leste, ai ame kerasa amaro kher leste. ₂₄Kudo kai či kamel ma či garavel muře vorbi. Ai e vorba kai tume ašunen nai mandar, numa katar o Dad kai tradias ma.

₂₅Me phenav tumenge kadala dieli žikin bešav tumensa. ₂₆Numa kudo kai lela sama tumendar, o Duxo Svinto, kai o Dad tradela ande muřo anav, sikiarela tume sa kadala dieli, ai dela tumen godji sa so me phendem tumenge.

₂₇Me mukav tumenge e patia. Me či dav la tumenge sar e lumia del la. Ke tumaro ilo te na rimol pe, ai te na daral. ₂₈Tume ašundian ke me phendem tumenge: Me žiavtar, ai me avava karing tumende. Te kamena man tume, tume veselina tume ke me žiavtar ka o Dad; ke o Dad si mai baro mandar. ₂₉Ai akana me phenav tumenge kadala dieli angla savořende t'aresen, eta, kana von aresena, tume te patian. ₃₀Me či mai dava duma tumensa; ke o prinso kadala lumiako avel. Les nai khanči ande mande. ₃₁Numa ke te e lumia te žianel ke mange si drago o Dad, ai ke me kerav sar si e ordina kai o Dad dias ma. Ušten, žiastar kathar.