Jono 17

₁Pala ke dias duma, o Jesus vazdias le jakha pe o čeri, ai phenel: Tate, o časo avilo! Luvudisar tjire Šiaves, eta ke tjiro Šiav te luvudil tut, ₂sar ke tu dias les putiaria pe sako mas, eta te del o traio pe sakda sa kudalenge kai tu dias les. ₃Eta, o traio sakda, si ke te prinžiaren tut, o ferdi jekh čačo Del, ai kudales kai tu tradian, Jesus Kristo. ₄Me luvudisardem tu pe e phuv, me getosardem e butji kai tu dian ma te kerav. ₅Ai akana tu, Tate, luvudisar ma paša tute katar o luvudimos kai sas ma paša tute angla savořende t'avel e lumia.

₆Me kerdem te žianen tjiro anav le manuš kai tu dian ma maškar e lumia. Von sas tjire, ai tu dian le mange; ai von garade tjiri vorba. ₇Akana von prinžiarde ke sogodi tu dian ma avel tutar. ₈Ke me dem le le vorbi kai tu dian ma; ai von line le, ai von čačes prinžiarde ke me avilem tutar, ai von patian ke tu tradian man.

₉Lenge me řudjiv. Me či řudjiv la lumiake, numa kudalenge kai tu dian ma, ke von si tjire; ₁₀ai sogodi si muřo si tjiro, ai sogodi si tjiro si muřo — ai me sim luvudime ande lende. ₁₁Me či mai sim ande e lumia, ai von si ande e lumia, ai me žiav tute. Dad svinto, garav ande tjiro anav kudalen kai tu dian ma, eta t'aven jekh sar amende. ₁₂Kana me simas lensa ande e lumia, me arakhadem le ande tjiro anav. Me arakhadem kudalen kai tu dian ma, ai či jekh anda lende či xasailo, te na niči o šiav le xasarimasko, eta te getol pe so si ramome. ₁₃Ai akana me žiav tute, ai me phenav kudala dieli ande e lumia, eta t'avel ande lende muři veselia vorta. ₁₄Me dem len tjiri vorba; ai e lumia vuřitsil len, ke von nai ande e lumia, sar me či sim ande e lumia. ₁₅Me či řudjiv tu te les len pa e lumia, numa te les lendar rigate o nasulimos. ₁₆Von nai la lumiake, sar me či sim la lumiako. ₁₇Svintsisar le katar tjiro čačimos; tjiri vorba si o čačimos. ₁₈Sar tu tradian ma ande e lumia, vi me tradem le ande e lumia. ₁₉Ai te me svintsi ma lenge, eta ke vi von t'aven svintsime katar o čačimos.

₂₀Na ke ferdi lenge me řudjiv, numa vi kudalenge kai patian ande mande katar lengi vorbi, ₂₁eta ke sa t'aven jekh ande amende, sar tu, Tate, tu san ande mande, ai sar me sim ande tute, eta ke te vi von t'aven sar jekh, te e lumia te žianel ke tu tradian man. ₂₂Me dem len o luvudimos kai tu dian man, eta ke von t'aven jekh sar ame sam jekh: ₂₃Me ande lende, ai tu ande mande, eta t'aven vorta jekh, ai ke te e lumia te žianel ke tu tradian man ai ke tu kamlian le sar tu kamlian man.

₂₄Tate, me kamav ke, kai me avava, kudala kai tu dian man t'aven vi von mansa te dikhen o luvudimos, o luvudimos kai tu dian man, ke tu kamlian man angla t'avel e lumia. ₂₅Tate vorta, e lumia či prinžiarel tu; numa me žianav tu, ai kadala prinžiarde ke tu tradian man. ₂₆Me kerdem te žianen tjiro anav, ai me kerava te mai žianen les, kadia o kamimos kai tu kames man t'avel ande lende, ai me t'avav ande lende.