Jono 4

₁O Jesus ašundias ke le Farizianuri ašunde ke vo kerel ai bolel mai but vortakon sar o Jono. ₂Numa o Jesus či bolelas vo, numa leske vortača. ₃Atunči vo muklias e Judea, ai gelo palpale ande e Galilea. ₄Sar trubulas te nakhel e Samaria, ₅vo areslo ande jekh foro ande e Samaria, bušol Sišar, paša o kimpo kai o Jakob dias ka o Josef, lesko šiav. ₆Kothe sas e xaing le Jakoboski. O Jesus, kjino katar o drom, bešelas pe e rig la xaingaki. Sas pašte mismeri.

₇Jekh žiuvli anda e Samaria avel te lel pai. O Jesus phenel lake: De ma te piav. ₈Ke leske vortača gele ande o foro te kjinen te xan.

₉E žiuvli samaritana phenel leske: Sar tu, kai san Židovo, manges mandar te pes, mandar kai sim jekh žiuvli samaritana? Le Židovuri, čačes, nai len patia le Samaritanonsa.

₁₀O Jesus del la palpale: Te žianesas tu so del o Del ai kon si kudo kai phenel tuke: De ma te piav! tu anda tute manglianas lestar te pel, ai vo sas te del tu o pai o živindo.

₁₁Baria, phenel leske e žiuvli, tut nai tu khanči te les pai, ai e xaing si pria andre; katar avela tut kudo pai živindo? ₁₂San tu mai baro sar amaro dad o Jakob, kai dias ame kadia xaing, ai kai vo pilias anda late, ai vi leske šiave ai vi leske žigeni?

₁₃O Jesus del la palpale: Kongodi pela anda kado pai mai avela trušalo; ₁₄numa kudo kai pela o pai kai me dava les či mai avela šoha trušalo ai o pai kai me dava les avela ande leste jekh paiořo kai xutela ande o traio pe sakda.

₁₅E žiuvli phenel leske: Baria, de ma anda kudo pai, eta te na mai avav trušali, ai te na mai avav te lav kathe.

₁₆Žia, phenel lake o Jesus, akhar tjire řomes, ai aidi kathe.

₁₇E žiuvli del palpale: Nai ma řom.

O Jesus phenel lake: Tu čačes phenes: Nai ma řom. ₁₈Ke tut sas tu panž řom, ai kudo kai si tu akana nai tjiro řom. Ande kodia tu phenes čačimos.

₁₉Baria, phenel leske e žiuvli, me dikhav ke tu san jekh profeto. ₂₀Amare purane kamenas pe kako plai; ai tume phenen, tume Židovuri, ke o than kai trubul te kamas si ande o Jerusalem.

₂₁Žiuvlio, phenel lake o Jesus, patia ma, o časo avel kai nai či pe kado plai či ande o Jerusalem kai tumenge avela drago o Dad. ₂₂Tumenge si drago so tume či žianen; ame, amenge si drago so ame žianas, ke o skipimos avel katar le Židovuri. ₂₃Numa o časo avel, ai inke avilo, kai kudala kai kamen čačes kamena le Dades duxosa ai čačimasa; ke si kudala kai o Dad mangel. ₂₄O Del si Duxo, ai trubul ke kudala kai kamen les kamen les ande o duxo ai ande o čačimos.

₂₅E žiuvli phenel leske: Me žianav ke o Mesia trubul t'avel (kudo kai akharen les o Kristo); kana vo avela, vo phenela amenge sa le dieli.

₂₆O Jesus phenel lake: Me sim kudo, me kai dav tusa duma.

₂₇Pe kadia aresle leske vortača, ai sas lenge šodo ke vo del duma jekha žiuvliasa. Numa či jekh či phenel: So manges tu? vai: Pa soste des tu duma lasa?

₂₈Atunči e žiuvli, muklias pesko khoro, gelitar ande o foro, ai phenel le ženenge: ₂₉Aven te dikhen jekhe manušes kai phendias mange sogodi me kerdem; či avela vo o Kristo? ₃₀Von ankliste avri anda o foro, ai avile karing leste.

₃₁Ži ande kudia vramia, le vortača gribin les te xal, phenenas: Rabi, xa.

₃₂Numa vo phenel lenge: Me xalem jekh xamos kai tume či žianen.

₃₃Le vortača phenen penge jekh kavreske: Varekon andiasas leske te xal?

₃₄O Jesus phenel lenge: Muřo xamos si te kerav sar mangel kudo kai tradias man, ai te getov leski butji. ₃₅Či phenen tume ke mai si štar šion ži kai si te kjiden? Eta, me phenav tumenge, vazden le jakha, ai dikhen le kimpuri kai vuže parnion te aven kjidine. ₃₆Kudo kai kjidel lel jekh pokjinimos, ai kjidel fruti pe o traio pe sakda, eta ke kudo kai bariarel ai kudo kai kjidel veselin pe ande jekh than. ₃₇Ke ande kudia kai phenen si čačes: Aver si kudo kai bariarel, ai kaver si kudo kai kjidel. ₃₈Me tradem tumen te kjiden kothe kai tume či kerdian butji; aver kerde butji, ai tume dinian andre ande lenge butji.

₃₉But Samaritanuri anda kudo foro patian ande o Jesus pala so phendias zurales e žiuvli: Vo phendias mange sa so me kerdem. ₄₀Kadia, kana le Samaritanuri avile t'arakhen les, von řudjin les te bešel paša lende. Ai vo bešlo kothe dui dies.

₄₁Mai but patianas pe pala leske vorbi, ₄₂ai von phenen le žiuvliake: Manai pala ke so tu phendian ke ame patias; ke ame inke ašundiam leste, ai ame žianas ke vo si o skipitori la lumiako.

₄₃Pala kudala dui dies, o Jesus gelotar kothar, te žial ande e Galilea. ₄₄Ke vo inke phendias ke jekh profeto nai les pativ ande pesko them. ₄₅Kana vo areslo ande e Galilea, mišto line sama lestar le Galilenuri, kai von dikhle sogodi vo kerdias ande o Jerusalem kana sas o prasniko; ke vi von sas pe o prasniko.

₄₆Vo kadia gelo ande e Kana ande e Galilea, kai pařudias o pai ande mol. Sas ande o Kapernaum jekh fitsiri le amperatosko, kai lesko šiav sas nasvalo. ₄₇Ašundias ke o Jesus avilo anda e Judea ande e Galilea, vo gelo karing leste, ai řudjil les te vulel ai te sastiarel leske šiaves, kai sas te merel. ₄₈O Jesus phenel leske: Te na dikhena tumen čudeni ai šodo, tume či patian.

₄₉O fitsiri le amperatosko phenel leske: Baria, vuli angla te merel muřo šiav.

₅₀Žia, phenel leske o Jesus, tjiro šiav trail.

Ai kudo manuš patiaias ka e vorba kai o Jesus phendias leske, ai vo gelotar. ₅₁Sar vo inke vulelas, leske služi avile angla leste, andine leske kadia viasta: Tjiri glata trail.

₅₂Vo pušel lendar ka če časo sas leske mai mišto; ai von phenen leske: Aratji, ka o mai angluno časo, o tatimos muklias les. ₅₃O dad prinžiardias ke sas ka kudo časo kai o Jesus phendias leske: Tjiro šiav trail. Ai vo patiaias, vo ai sa lesko kher.

₅₄O Jesus mai kerdias kudi duito čudenia kana vo avilo anda e Judea ande e Galilea.