Jud 1

₁O Jud, sluga katar o Jesus Kristo, ai phral katar o Jakob,

ka kudala kai si akharde, kai si drago ande o Del o Dad, ai garade le Jesus Kristoske;

₂ke e mila, e patia ai o kamimos te bution tumenge!

₃Muře draži, sar me mai but kamav te ramov tumenge pala amaro skipimos ande jekh than, me hatiardem ke sas mange musai te kerav kudia eta te vazdav tumen te maren tume pe o patiamos kai sas ninkerdo le svintsonge jekh data pe sa. ₄Ke thode pe maškar tumende uni manuš, kai lengo strafo si ramome de dumult, čoře, kai pařuven o mištimos amare Devlesko te diliaren, ai či prinžiaren amare ferdi jekhe birevos o Rai Jesus Kristo.

₅Me kamav te mai phenav tumenge, tumenge kai žianen but mišto kadal dieli, ke o Baro, pala ke skipisardias le narodos ai tsirdias les avri anda o them e Egipta, vo atunči kerdias ke xasavon kudala kai či patian; ke thodias le rigate pe e kris le bare dieseski, phangle pe sakda ande o tuniariko. ₆Den tumen godji ka le andželi kai nas lenge mišto ande e putiaria kai sas lenge dini numa kai mukle le thana kai bešenas; ₇den tumen godji ka ke o Sodomo ai e Gomořa ai le foruri paše, kai o narodo kerde sar kudala andželi ai dine pe ka e kurvetsia ai ke so či trubul te kerel o manuš. Bešel pe lende o nekazo ande jekh jag pe sakda.

₈Makar kudia, vi kudala manuš, ningerde le lenge sune, mahrin sa kadia lengo mas, vuřitsin e putiaria le Develeski ai prasan le vestimen ande o čeri. ₉Eta, o arxandželo o Mihail, kana xalias pe le bengesa pa o stato le Mošesko, vo či tromalas te thol pe leste jekh kris prasamaski, numa phendias leske: Ke o Baro te del tu strafo! ₁₀Von, aver fialo, von den duma jekh fialo prasaimasko anda so von či žianen, ai von rimon pe ande so von žianen sar žigeni bi-godiake. ₁₁Nasul t'avel lenge! ke von gele pala e vurma katar o Kain, von šiudine pe pala jekh lov sar rimosailo o Balam, von xasaile katar o buntuimos sar o Kore, ₁₂Von si melale ande tumare pativa, xan bi-lažiavesko, pravaren pe korkořo. Si nuveria bi-paiesko, spidine katar le balvalia; kopačia tomnake bi-frutake, duvar mule, ankalade avri. ₁₃Sar talazuri zurale la mariake, šiudel e spuma katar lenge dieli nai vuži; čeřaia xasarde, kaske o tamlo tuniariko si lenge thodino rigate pe sakda.

₁₄Si lenge ke o Enok, o eftato de katar o Adamo, phendias so avela, kadia: Eta, o Baro avilo peske svintsi miensa, ₁₅te kerel jekh kris pe lende, ai te strafuil len te žianen sa le dieli bi-laše so von kerde ai sa le vorbi prasaimaske kai phende pe leste le nasul bezexale.

₁₆Si manuš kai bulguin, kai vatin pe anda pende, kai phiren sar von kamen, kai si len ande o mui vorbi barimatange, kai si lenge drago le žene pala lovende.

₁₇Numa tume, muře draži, den tume godji ka le dieli phende de angla savořende katar le apostoli katar amaro Baro o Jesus Kristo. ₁₈Von phende tumenge ke ande le posledni vrami avena manuš kai asan tumendar, phirena sar von kamen bi-lašes ₁₉si kudala kai kamen te hulaven, manuš kurvaria, nai len Duxo. ₂₀Tumenge, muře draži, vazden tumaro traio pe o svinto patiamos, ai řudjin ande o Svinto Duxo, ₂₁ninkeren tume ande o kamimos le Devlesko, žikin ažiukeren e mila katar amaro Rai o Jesus Kristo pe o traio pe sakda.

₂₂Sikaven mila ka kudala kai či hatiaren; ₂₃skipin le kavren ai len le avri anda e jag; ai vi le kavre, sikhaven lenge jekh mila hamime la darasa, numa vuřitsin ži ka e bunda mahrime katar lengo mas.

₂₄Eta, kudaleske kai šai lel tumendar sama anda sako perimos ai te tradel tumen angla lesko vestimos bi-došako ai ande e veselia, ₂₅ferdi ka o Del, amaro Skipitori, katar o Jesus Kristo amaro Baro, t'avel o vestimos, o barimos e zor ai o zuralimos, angla savořende de sa le vrami, ai akana, ai ande sa le berš! Amen!