Lukas 10

₁Pala kudia, o Baro mai thodias efta-var-deš ai dui kaver vortakon ai tradias le po dui angla peste ande sa le foruri ai ande sa le thana kai vo trubulas te žial. ₂Vo phenel lenge:

O kjidimos si baro, numa tsiřa si le butiaria. Řudjin le birevos kudalengo kai kjiden te tradel butiaria ande pesko kjidimos. ₃Žiantar; eta, me tradav tumen sar bakroře maškar le ruva. ₄Na len tumensa tišila, či gono, či papuča, ai na den pozdraimos khanikas pe e vurma. ₅Ande varesavo kher kai tume den andre, phenen angla savořende: Ke e patia t'avel pe kado kher! ₆Ai t'avel kothe jekh manuš la patiako, tumari patia hodinila pe leste; te na, voi avela palpale tumende. ₇Bešen ande kudo kher, xan ai pen so dena tumen; ke o butiari niril so den les. Na žian kher kherestar. ₈Ande varesavo foro kai tume den andre, ai kai lena tumendar sama, xan so dena tumen. ₉Sastiaren le nasvalen kai avena, ai phenen lenge: E amperetsia le Devleski pašili paša tumende. ₁₀Numa ande varesavo foro kai tume den andre, ai či kamena te primin tumen, žian ande le droma, ai phenen: ₁₁Ame khosas karing tumende e pulberia tumare foroski kai astardili pe amare punře; numa te žianen ke e amperetsia le Devleski pašili. ₁₂Me phenav tumenge ke ande kudo dies o Sodom avela leske mai tsiřa trudno sar kudo foro.

₁₃Nasul tuke, Horazin! Nasul tuke, Betsaida! Ke, t'avilinosas ke le čudeni kai sas kerde maškar tumende sas kerde ande e Tira ai ande o Sidon de dumult kamenas von te phiraven tsalia goneske ai te thon vušar pe pende. ₁₄Sa anda kudia, o dies kai avela e kris, e Tira ai o Sidon avela len mai tsiřa zurales sar tume. ₁₅Ai tu, Kapernaum, avesa uštiado ži ka o čeri? Tu avesa šiudino tele ži kai si le mule.

₁₆Kudo kai ašunel tumende ašunel mande, ai kudo kai šiudel tumen šiudel man; ai kudo kai šiudel man šiudel kudales kai tradias man.

₁₇Le efta-var-deš ai dui avile veselimasa, phenenas:

Baria, inke le duxuri nasul patian amaro mui ande tjiro anav.

₁₈O Jesus phenel lenge:

Me dikhavas le Satan sar perel anda o čeri sar jekh strefiaimos.

₁₉Eta, me dem tumen e putiaria te phiren pe le sapa ai le skorpioni, ai pe sa e zor le dušmanoski; ai khanči či avela te rimol tumen. ₂₀Numa, na veselin tume ke le duxuri patian tumende; numa veselin tume ke tumare anava si ramome ande o čeri.

₂₁Inke ande kudia vramia, o Jesus isdrailo veselimastar katar o Svinto Duxo, ai vo phenel:

Me luvudiv tu, Tate, Baro pe o čeri ai pe e phuv, ke tu garadian kadala dieli katar le godiaver ai kudale kai sikile, ai ke tu sikadian le ka le glati. Ei, Tate, me luvudiv tu sar ke tu kamlian kadia.

₂₂Sa kadala dieli sas mange dine katar muřo Dad, ai khonik či žianel kon si o Šiav, numa ferdi o Dad, či kon si o Dad, te na avela o Šiav ai kudo kaske o Šiav kamel te sikavel les. ₂₃Ai, amboldinisailo karing le vortača, vo phenel lenge rigate: Veseli le jakha kai dikhle so tume dikhlian. ₂₄Ke me phenav tumenge ke but profeturi ai amperatsi kamle te dikhen so tume dikhlian, numa von či dikhle, kamle t'ašunen so tume ašundian, numa von či ašunde.

₂₅Jekh zakonari uštilo, ai phenel ka o Jesus, te zumavel les:

Birevo, so trubul te kerav t'avel ma o traio pe sakda?

₂₆O Jesus phenel leske:

So si ramome ande o zakono? So gjines tu kothe?

₂₇Vo del palpale:

T'avel tuke drago o Baro, tjiro Del, anda sa tjiro ilo, anda sa tjiro duxo, anda sa tjiri zor, ai anda sa tjiri godji; ai tjiro vortako sar tu.

₂₈Tu mišto dian palpale, phenel leske o Jesus; ker kudia, ai traisa.

₂₉Numa vo, kamelas te sikavel pesko čačimos, phenel ka o Jesus:

Ai kon si muřo vortako?

₃₀O Jesus mai lias e vorba, ai phenel:

Jekh manuš vulelas anda o Jerusalem ande o Jeriko. Vo pelo maškar le čor kai line pa leste leske tsalia, marde les, ai geletar, mukle les dopaš mulo. ₃₁Jekh rašai, kai nečaino vulelas sa pa kudia vurma, dikhlias kudale manušes, nakhel inčial. ₃₂Jekh Levito, kai areslo vi vo ande kudo than, dikhlias les, nakhlo inčial. ₃₃Numa jekh Samaritano, kai žialas pe o drom, avilo kothe, lias les e mila kana dikhlias les. ₃₄Vo pašilo, ai phanglias leske řani seliasa, thodias opral vuloi ai mol; porme thodias les pe peski žigania, ninkerdias les ži ka jekh kher sovimasko, ai lias sama lestar. ₃₅Teharin, lias pestar dui dinari, dias le ka o birtaš, ai phenel: Le sama lestar, ai so tu desa mai but, me dava tuke kana avava palpale.

₃₆Savo miazol tuke anda kudala trin ke sas o vortako kudalesko kai pelo maškar le čor?

₃₇Kudo si kai sas leske mila karing leste, dias les palpale o zakonari.

Ai o Jesus phenel leske:

Žia, vi tu, ker sa kadia.

₃₈Sar o Jesus sas pe e vurma peske vortakonsa vo dias andre ande jekh gav, ai jekh žiuvli, bušol Marta, lias les ande pesko kher. ₃₉La sas la jekh phei, bušol Maria, kai, bešelas ka le punře le Bareske, ašunelas leski vorba. ₄₀E Marta, kerelas butji sar jekh sluga, avili ai phenel:

Baria, nai tuke khanči ke muři phei mukel ma korkořo te služiv? Phen lake te ažutil ma.

₄₁O Baro del la palpale:

Marta, Marta, tu gindis tu ai tu miškis tu pala tsiřa dieli. ₄₂Jekh diela ferdi trubul. E Maria alosardias e laši partia, kai či avela lini latar.