Lukas 14

₁O Jesus dias andre, jekh dies o sabato, ande o kher katar jekh anda le birevia katar le Farizianuri, te žial te xal, le Farizianuri len sama pe leste. ₂Ai eta, jekh manuš, sas les jekh nasvalimos šuvliarelas les,

₃O Jesus lias e vorba, ai phenel ka le zakonaria ai ka le Farizianuri:

Slobodo, vai nai, te sastiares o sabato?

₄Von ašile muto. Atunči o Jesus lias kudale manušes, sastiardias les, ai tradias les. ₅Porme phenel lenge:

Savo anda tumende, t'avela lesko šiav vai lesko guruv te perel ande jekh xaing, či ankalavela les strazo, o sabato?

₆Ai von naštisarde te den khanči palpale pe kudia.

₇Vo mothol atunči jekh paramiči ka le gosti, ke dikhelas ke von alon le mai anglune thana; ai vo phenel lenge:

₈Kana tu avesa akhardo sar gosto varekastar ka o abiav, na tho tu pe o mai angluno than, daratar ke si maškar le gosti jekh ženo mai vestime tutar, ₉ai ke kudo kai akhardias tumen sar gosti le jekhes ai le kavres avel te phenel tuke: Muk o than kakale ženeske. Tuke avela atunči o lažiav te les o mai paluno than. ₁₀Numa, kana tu avela akhardo sar gosto, žia tai tho tu ka o mai paluno than, eta ke, kana kudo kai akhardias tu avela, vo te phenel tuke: Muro vortako, ankli mai opre. Atunči tuke avela pativ angla sa kudala kai si pala e skafidi tusa. ₁₁Ke kon-godi uštela avela tele, ai kon-godi si tele avela uštiado.

₁₂Vo mai phenel ka kudo kai akhardias les:

Kana tu desa te xan o xamos ratiako vai diesesko na akhar sar gosti tjire vortakon, či tjire phralen, či tjire niamon, či tjire vortakon le barvale. Te keres kadia vi von si t'akharen tu ai te keren tuke sa jekh fialo. ₁₃Numa, kana tu des jekh pativ, akhar le čořen, le bangen, le langanen, le kořen. ₁₄Ai tu avesa veselo ke von naštin te keren tuke sa jekh fialo; ke avela tuke palpale kana živindina le vorta.

₁₅Jekh anda kudala kai sas kothe pala e skafidi, pala ke ašundias kudala vorbi, phenel ka o Jesus:

Veselo kudo kai lela pesko xamos ande e amperetsia le Devleski!

₁₆Ai o Jesus del les palpale:

Jekh manuš del jekh baro xamos, ai vo akhardias but ženen. ₁₇Ka o časo kai si te xan, vo tradias peska sluga te phenel le gostenge: Aven, sa si vuže thodino. ₁₈Numa sa ande jekh than line pe te jertin pe. O mai angluno phenel leske: Me kjindem jekh kimpo, ai musai si mange te žiav te dikhav les; jertisar ma, me mangav tu. ₁₉Jekh kaver phenel: Me kjindem deš guruven, ai me žiav te zumavav le; jertisar mange, me mangav tu. ₂₀Jekh kaver phenel: Me akana ansurisailem, sa anda kudia naštiv t'avav. ₂₁E sluga avili palpale, phendias kudala dieli ka pesko birevo. Atunči o birevo le kheresko xoliariko phenel peska slugake: Žia sigo ande le platsuri ai ande le vulitsi le foroske, ai an kathe le čořen, le bangen, le kořen ai le langanen. ₂₂E sluga phenel: Birevo, so tu dian ordina sas kerdo kudia, ai mai si than. ₂₃Ai o birevo phenel la slugake: Žia ande le vurmi ai pe e rig le kimposki ai kudalen kai tu arakhesa, tho pe lende zor te den andre, eta ke muřo kher t'avel pherdo. ₂₄Ke, me phenav tumenge, či jekh anda kudala kai sas akharde sar gosti či zumavena anda muřo xamos.

₂₅But žene žianas pe o drom le Jesusosa. Vo amboldel pe, ai phenel lenge:

₂₆T'avela varekon mande, ai te na vuřitsila peske dades, peska da, peska řomnia, peske šiaven, peske phralen ai peske pheian, ai inke pesko duxo, naštil t'avel muřo vortako. ₂₇Ai varekon te na ningerela pesko trušul, naštil t'avel muřo vortako. ₂₈Ke, savo anda tumende, te kamela te vazdel jekh turo, či bešel tele angla savořende te gjinel sode aresel leske ai te dikhel te šai getol, ₂₉daratar ke te thol pe te vazdel, ai naštil te getol, sa kudala kai dikhena les asan lestar. ₃₀Phenena: Kado manuš lias pe te vazdel, ai naštil te getol! ₃₁Vai savo amperato, te žiala te kerel marimos pe jekh kaver amperato, či bešel tele angla savořende te lel sama te šai daštil, deš mii manušensa, te žial pe kudo kai avel pe leste te lel les biš miensa. ₃₂Te naštil te daštil, žikin o kaver amperato si inke dur, vo tradel leske manušen te mangen lestar e patia. ₃₃Kadia, varekon anda tumende te na mukela sogodi si lesko naštil t'avel muřo vortako.

₃₄O lon si jekh laši diela; numa t'avela ke o lon xasarel pesko gusto, sosa mai lašiaren les? ₃₅Vo nai lašio či la phuviake, či la gosniake; šiuden les avri. Kudo kai si les kan t'ašunel, ašunela!