Lukas 16

₁O Jesus mai phenel peske vortakonge:

Jekh manuš barvalo sas les jekh kai lias sama pa lesko kher. Ande jekh dies varekon phendias leske ke kudo manuš xalas leske mištimata. ₂Vo akharel les, ai phenel leske: So ašunav ke phenen pa tute? Phen mange sar kerdian so dem tu te keres, ke tu naštisa te mai les sama katar muře mištimata. ₃O manuš phenel ande peste: So kerava me, sar muřo birevo lel mandar te lav sama leske mištimata? Kerava me butji e phuv? Me naštiv. Mangava? Lažiav mange. ₄Me žianava so si te kerav, t'aven žene kai šai len man ande penge khera kana šiudena ma anda muři butji. ₅Ai, kerdias t'anen sako kai kamelas leske birevoske, vo phenel ka o mai angluno: Sode kames tu ka muřo birevo? ₆Jekh šel mezuri vuloi, del vo palpale. Ai vo phenel leske: Le tjiro lil, beš tele sigo, ai ramosar panž-var-deš. ₇Vo phenel atunči jekh avreske: Ai tu, sode kames tu? Jekh mia mezuri gjiv, del vo palpale. Ai vo phenel leske: Le tjiro lil, ai ramosar oxto šel. ₈O birevo luvudil les ke kerdias mišto, ke le žene kadala lumiake si mai xitri ande le dieli jekh avresa sar kudala kai si ande e vedaria.

₉Ai me, me phenav tumenge:

Keren tumenge vortača le barvalimatansa kadala lumiake, te len tumen von ande penge tabernakuli pe sakda, kana avela te trubul tumen. ₁₀Kudo kai si čačo ande le mai tsinoře dieli avela vorta vi ande le bare, ai kudo kai nai vorta ande le tsinoře dieli či avela vorta či ande le bare. ₁₁T'avela ke či san čače ande le barvalimata kai nai laše, kon dela tumen sama ka le barvalimata čače? ₁₂Ai te tume či sanas čače ande so si le avresko, kon dela tumen so si tumaro?

₁₃Či jekh sluga naštil te služil do birevon. Ke, vai ke vuřitsila le jekhes ai kamela le kavres; vai ke astardiola ka jekh ai vuřitsila le kavres. Tume naštin te služin le Devles ai le Love.

₁₄Le Farizianuri, kai sas xanžvale, ašunenas vi von sa kudia, ai marena mui lestar. ₁₅O Jesus phenel lenge:

Tume, tume roden te miazon vorta angla le manuš, numa o Del žianel tumare ile; ke so si uštiado angla le manuš si jekh žiungalimos angla o Del.

₁₆O zakono ai le profeturi aresle ži ka o Jono; de kothar, e amperetsia le Devleski si phendi, ai sako thol zor te del andre. ₁₇Mai sigo šai nakhen o čeri ai e phuv, de sar te perel ferdi e mai tsinoři bukva de so si ande o Zakono.

₁₈Kon-godi mukel peska řomnia ai lel jekha avria kerel jekh kurvetsia, ai kon-godi lel jekha řomnia mukli katar pesko řom kerel jekh kurvetsia.

₁₉Sas jekh manuš barvalo, kai sas pe leste phanřeski ai fino tsalia, ai kai sako dies sas les veselo ai šukar traio. ₂₀Jekh čořo, bušolas Lazar, sovelas ka lesko vudar, pherdo phugnia, ₂₁ai kamelas te kjidel le kotora kai perenas pa e skafidi le barvaleski; ai inke le žiukel avenas te čařen leske phugnia. ₂₂O čořo mulo, ai ningerde les le andželi ande o peř le Abrahamosko. O barvalo vi vo mulo, ai sas angropome. ₂₃Kothe kai si le mule, vo vazdias le jakha; ai, žikin vo sas kothe kai kjinuin les, vo dikhel de dural le Abraham, ai le Lazar paša leste. ₂₄Vo tsipil: Tate Abraham, t'avel tuke mila mandar, ai trade le Lazar, te makhel o gor peske naiesko ande o pai ai te šudrarel muři šib; ke me pria but kjinuiv ande kadia pařa. ₂₅O Abraham del palpale: muři glata, de tu godji ke tu lias tjire mištimata kana sas tu traio, ai ke o Lazar lias peske nasulimata ka pesko traio; akana vo si kathe řesgime, ai tu, tu kjinuis. ₂₆Mai, si maškar amende ai tumende jekh bari hunia, eta ke kudala kai kamena te nakhen kathar karing tumende, vai kothar amende, naštin te keren. ₂₇O barvalo phenel: Me řudjiv tu, tate Abraham, te trades le Lazar ande o kher muře dadesko; ₂₈ke mai si ma panž phral. Si te phenel lenge kadala dieli, eta te na aven vi von ande kado than kai kjinuin. ₂₉O Abraham del palpale: Len si le o Moše ai le profeturi; t'ašunen lende. ₃₀Ai vo phenel: Niči, tate Abraham, numa t'avela varekon anda le mule ke žial karing lende, von keina pe. ₃₁Ai o Abraham phenel leske: Te na ašunena von ka o Moše ai ka le profeturi, von či muken pe te patian makar ke varekon anda le mule živindila.