Lukas 19

₁O Jesus, dias andre ande o Jeriko, nakhelas o foro. ₂Ai eta, jekh manuš barvalo, akharen les Zakeus, birevo kudalenge kai kjiden e taksa, rodelas te dikhel kon si o Jesus; ₃numa naštilas, katar o narodo, ke vo nas baro ande o stato. ₄Vo našlo anglal, ai anklisto pe jekh sikomoro te dikhel les, ke vo trubulas te nakhel kothar. ₅Kana o Jesus areslo ande kudo than, vo vazdias le jakha ai phenel leske:

Zakeus, gribisavo ta vuli; ke trubul ma te bešav adies ande tjiro kher.

₆O Zakeus gribisailo te vulel, ai lias les peste veselimasa. ₇Dikhle kudia, sa bulguinas, ai phenenas:

Vo gelo te bešel ka jekh manuš bezexalo.

₈Numa o Zakeus, bešel angla o Baro, phenel leske:

Eta, Baria, me dava le čořen dopaš anda so si ma, ai, te lem varikastar love athaimasa, dava les štar-var mai but.

₉O Jesus phenel leske:

O skipimos dias adies ande kado kher, ke kado vi vo si jekh šiav katar o Abraham. ₁₀Ke o Šiav le manušesko avilo te rodel ai te skipil so sas xasardo.

₁₁Von ašunenas kudala dieli, ai o Jesus mai phenel jekh paramiči, ke von sas paša o Jerusalem, ai von gindinas ke strazo e amperetsia le Devleski si t'avel. ₁₂Vo phenel kadia:

Jekh manuš anda e bari vitsa žialastar ande jekh them dur, te thon les amperato ai atunči t'avel palpale. ₁₃Vo akharel deš anda peske služi, dias le deš love po jekh mina, ai phenel lenge: Keren butji žikin či avav palpale. ₁₄Numa leske kai sas lesa vuřitsinas les, ai von tradine manušen pala leste, te phenen: Ame či kamas te kudo manuš amperetsil pe amende.

₁₅Kana vo avilo palpale, pala ke thode pe leste t'avel baro amperato, vo akharel paša peste le služi kaste dias le love, eta te žianel sar sako butiardias les. ₁₆O mai angluno avilo, ai phenel: Baria, tjiri mina andias deš mini. ₁₇Vo phenel leske: Mišto si, laši sluga; ke sar ke tu sanas čačo ande jekh tsini diela, le t'aves baro pe deš foruri. ₁₈O duito avel, ai phenel: Baria, tjiri mina dias panž mini. ₁₉Vo phenel leske: Vi tu, t'aves baro pe panž foruri. ₂₀Jekh aver avel, ai phenel: Baria, eta tjiri mina, ke me garadem ande o poxtan. ₂₁Ke me daravas tutar, ke tu san jekh manuš trudno; tu les so tu či thodian, ai tu kjides kai tu či bariardian. ₂₂Vo phenel leske: Me dav tu kris pala tjire vorbi, sluga nasul; tu žianesas ke me sim jekh manuš trudno, lavas so me či thodem, ai kjidavas so me či bariardem; ₂₃sostar či thodian tu muřo lov ande jekh banka, eta ke kana avava palpale te lav mai but? ₂₄Porme vo phenel ka kudala kai sas kothe: Len lestar e mina, ai den la ka kudo kai si les deš. ₂₅Von phende leske: Gazda, si les vuže deš mini. ₂₆Me phenav tumenge, dena kudaleske kai si les, numa kadalestar kai nai les mai lena inke so si les. ₂₇So mai ašel, anen kathe muře dušmanon, kai či kamle t'amperetsiv pe lende, ai mudaren le angla mande.

₂₈Pala ke dias duma kadia, o Jesus phirel angla o narodo, t'anklel ande o Jerusalem. ₂₉Kana pašilo paša o Betfage ai e Betania, karing o plai akhardo o plai le Maslinengo, o Jesus tradias don anda peske vortača.

₃₀Phenelas:

Žian ande o gav kai si angla tumende; kana dena tume andre, tume arakhena jekhe magaritsos phanglo, pe savo či jekh manuš či bešlo; putren les, ai anen les mange. ₃₁Te varekon pušel tumen: Sostar putren les tume? tume dena les palpale: O Baro trubul les.

₃₂Kudala kai sas tradine gele, ai arakhle le dieli sar o Jesus phendiasas lenge. ₃₃Sar von putrenas le magaritsos, leske birevia phenen lenge:

Sostar putren tume kadale magaritsos?

₃₄Von den palpale:

O Baro trubul les.

₃₅Ai von andine ka o Jesus le magaritsos, pe savo von šiudine penge tsalia, ai thode t'anklel opre o Jesus. ₃₆Kana gele pe o drom, le žene thode penge tsalia pe e vurma. ₃₇Ai sar vuže pašiol paša o Jerusalem, karing te vulel katar o plai le Maslinengo, sa le but vortača, lias len o veselimos, thodine pe te luvudin le Devles zurale hangosa anda sa le čudeni kai von dikhle. ₃₈Von phenenas: Svintsime t'avel o amperato kai avel ande o anav le Baresko! Patia ande o čeri, ai vestimos ande le thana but vuče!

₃₉Uni Farizianuri, maškar o narodo, phenen ka o Jesus:

Birevo, ašiav tjire vortakon.

₄₀Ai vo del anglal:

Me phenav tumenge: Te von ašena, le bař tsipina!

₄₁Sar vo pašiolas paša o foro, o Jesus, kai dikhel les, rovel pe leste, ai phenel:

₄₂Te sanas vi tu, makar ande kado dies kai si tjiro, te žianesas le dieli kai šai den tu e patia! Numa akana von si garade ka tjire jakha. ₄₃Avena pe tute dies kai tjire dušmaia avena krugom tut groapensa, ai kjidena tut pa sako rig. ₄₄Von phařavena tut, tut ai tjire šiaven maškar tute, ai či mukena pe tute bař pe bařeste, ke tu či prinžiardian e vramia kai o Del avilo tute.

₄₅Vo dias andre ande o templo, ai vo lias pe te gonil kudalen kai bikjinenas.

₄₆Phenelas lenge:

Si ramome: Muřo kher avela jekh kher řudjimasko. Numa tume, tume kerdian anda leste jekh groapa čorengi.

₄₇Vo sikiarel sako dies ande o templo. Ai le bare raša, le zakonaria ai le bare anda o narodo rodenas te xasaren les; ₄₈numa von či žianenas sar te keren, ke sa o narodo ašunelas leste dragosa.