Lukas 24

₁O mai angluno dies anda o kurko, von gele ka o groapoševo de diminiats, ningerenas le draba kai von lašiarde. ₂Von arakhle ke o bař sas spidino angla o groapoševo; ₃ai, dine andre, von či arakhle o stato le Baresko Jesus. ₄Sar von či žianenas so te gindin anda kudia, eta, dui manuš paša lende, ande le tsalia šukar. ₅Isdraile daratar, von perade penge muia karing e phuv; numa von phenen lenge:

Sostar roden tume maškar le mule kudales kai si živindo? ₆Vo nai kathe, numa vo živindisailo. Den tume godji sar vo dias tumensa duma, kana vo mai sas ande e Galilea, ₇ai ke vo phenelas: Trubul ke o Šiav le manušesko t'avel dino ande le vast le bezexalenge, ai ke vo živindila o trito dies.

₈Ai von mai dine pe godji ka le vorbi le Jesusoske. ₉Kana avile palpale katar o groapoševo, von phende sa kudala dieli ka le deš-u-jekh, ai ka sa le kaver. ₁₀Kudala kai phende kadala dieli ka le apostoli sas e Maria anda e Magdala, e Johanna, e Maria, dei katar o Jakob, ai le kaver kai sas lensa. ₁₁Von gindisaile ke so le žiuvlia phenenas sas dilimos, ai von či patiaile ka len. ₁₂Numa o Petri uštilo, ai našlo ka o groapoševo. Bangilo, vo dikhlias ferdi le pištjiria kai sas pe e phuv; porme gelo peste, sas leske šodo so areslias.

₁₃Ai eta, sa kudo dies, dui vortača žianas ande jekh gav akharen les Emaus, dur katar o Jerusalem deš kilometri; ₁₄ai von denas pe duma anda sa so nakhlias. ₁₅Žikin von denas duma ai xanas pe, o Jesus pašilo, ai žial pe o drom lensa. ₁₆Numa lenge jakha či mukenas len te prinžiaren les. ₁₇Vo phenel lenge:

Pa soste den tume duma phirimasa, ke san tume kadia nekežime?

₁₈Jekh anda lende, bušol Kleopas, del les palpale:

Ferdi tu, anda kudala kai bešen ande o Jerusalem, či žianes so avelas ande kadala dies?

₁₉So? phenel lenge vo.

Ai von dine les palpale:

So avelas pa o Jesus anda o Nazaret, kai sas jekh profeto zuralo ande e butji ai ande le vorbi angla o Del ai angla sa o narodo, ₂₀ai amare bare raša ai amare krisinitoria dine les ande o vast te thon les te merel ai amblade les pe o trušul. ₂₁Ame ažiukerasas ke vo si t'avel te skipil o Israel; numa so mai si eta o trito dies ke kadala dieli nakhle. ₂₂Si čačes ke uni žiuvlia maškar amende kerde t'avel amenge šodo: gele de diminiats ka o groapoševo, ₂₃ai či arakhle lesko stato. Von avile te phenen ke le andželi sikadile lenge ai phende lenge ke vo si živindo. ₂₄Uni anda kudala kai sas amensa gele ži ka o groapoševo, ai von arakhle le dieli sar le žiuvlia phendesas; numa les, von či dikhle les.

₂₅Atunči o Jesus phenel lenge:

O, manuš bi-godiake, ai kai o ilo kovlo te patial sa sogodi phende le profeturi! ₂₆Či trubulas ke o Kristo te kjinuil kudala dieli, ai ke vo te del andre ande pesko barimos?

₂₇Ai, lias pe katar o Moše ai katar sa le profeturi, vo sikavel lenge ande sa le Ramomata so si pa leste.

₂₈Kana aresle paša o gav kai von žianas, miazolas lenge ke vo žial mai dur. ₂₉Numa von gribin les, phenenas: Beš amensa, ke e riat pašiol, e riat perel tele. Ai vo dias andre, te bešel lensa. ₃₀Žikin vo sas pala e skafidi lensa, vo lias o manřo; ai, pala ke řudjisardias, vo phaglias les, ai dias les lenge. ₃₁Atunči lenge jakha puterdile, ai prinžiarde les; numa vo bilailo angla lende. ₃₂Ai von phenenas jekh avreske:

Amaro ilo či phabolas vo andre ande amende, kana vo delas duma amensa pe e vurma ai sikavelas amenge le Ramomata?

₃₃Uštile ande kudo časo, von gele palpale ande o Jerusalem, ai von arakhle le deš-u-jekh, ai kudalen kai sas lensa kjidine, ₃₄phenenas:

O Baro čačes živindisailo, ai vo sikadilo ka o Simon.

₃₅Ai von phenen so areslias lenge pe e vurma, ai sar von prinžiarde les kana vo phaglias o manřo.

₃₆Sar von denas duma kadia, vi vo sikadias pe maškar lende ai phenel lenge:

E patia t'avel tumensa!

₃₇Lias len e dar ai daran, von gindinas te dikhen jekh duxo. ₃₈Numa vo phenel lenge:

Sostar san tume rimome, ai sostar kasave ginduri ušten von ande tumare ile? ₃₉Dikhen muře vast ai muře punře, mišto me sim; asban man ai dikhen: jekh duxo nai les či mas či kokalo, sar tume dikhen ke si man.

₄₀Ai sar phenelas kudia, vo sikavel lenge peske vast ai peske punře. ₄₁Sar, ande lengi veselia, von inke či patianas, ai ke lenge sas šodo, vo phenel lenge:

Si tumen vareso te xas?

₄₂Von sikavel leske mašio peko, ₄₃Vo lias lendar ai vo xalias angla lende. ₄₄Porme vo phenel lenge:

Si kathe so me phenavas tumenge kana me mai simas tumensa, ke trubulas t'aresel sa so sas ramome pa mande ande o Zakono katar o Moše, ande le profeturi ai ande le psalmoria. ₄₅Atunči vo puterdias lengo duxo, eta te hatiaren le Ramomata. ₄₆Ai vo phenel lenge: Kadia si ramome ke o Kristo kjinuila, ai ke vo živindila anda le mule o trito dies, ₄₇ai ke o keimos ai o jertimos le bezexenge ande lesko anav avena phende ka sa le thema, angla savořende ande o Jerusalem. ₄₈Tume san martururi anda kadala dieli. ₄₉Ai eta, me tradava pe tumende so muřo Dad phendias ke del tume; numa tume, bešen ande o foro žikin či avela pe tumende e zor opral.

₅₀Vo ningerdias len ži karing e Betania ai vazdias le vast, vo svintsisardias le. ₅₁Žikin vo svintsil len, vo huladilo lendar ai line les opre ande o čeri. ₅₂Ai von, pala ke von luvudisarde les, gele palpale ande o Jerusalem jekh bare veselimasa; ₅₃ai von sas sakda ande o templo, luvudin ai svintson le Devles.