Lukas 6

₁Areslias jekh sabato ke o Jesus nakhelas maškar kimpuri gjiveske. Leske vortača ankalade simintsi, inčarde le ande le vast ai xale. ₂Uni Farizianuri phenen leske:

Sostar keren tume so nai slobodo te keren pe o sabato?

₃O Jesus del len palpale:

Či gjindian tume so kerdias o David, kana sas bokhalo, ai vo ai kudala kai sas lesa; ₄sar vo dias andre ande o kher le Devlesko, lias o manřo kai sas dišado pe o altari, xalias, ai dias kudalen kai sas lesa, makar ke sas ferdi le rašange te xan?

₅Ai vo phenel lenge:

O Šiav le manušesko si birevo vi pe o sabato.

₆Areslias, jekh kaver sabato, ke o Jesus dias andre ande e khangeri židovitsko, ai ke vo sikiarel. Vo arakhlias jekhe manušes kai lesko vast čačo sas šuko. ₇Le zakonaria ai le Farizianuri len sama katar o Jesus, te dikhen ke kerel jekh sastiarimos o sabato. Sas jekh diela te thon beda pe leste. ₈Numa vo žianelas lenge ginduri, ai vo phenel le manušeske kai sas lesko vast šuko:

Ušti, ai beš katka ande o maškar.

Vo uštilo, ai bešel pe punřende. ₉Ai o Jesus phenel lenge:

Me pušiav tumendar te si slobodo, o dies o sabato, te keres mištimos vai te keres nasulimos, te skipis jekhe manušes vai te mudares les.

₁₀Atunči, šiudel pesko dikhimos pe lende sa, vo phenel le manušeske:

Vazde tjiro vast.

Vo vazdias les, ai lesko vast sastilo. ₁₁Von pherdile xoli, ai von dine pe duma so šai keren le Jesusoske.

₁₂Ande kudia vramia, o Jesus gelo pe o plai te řudjil, ai vo nakhlo sa e riat te řudjil le Devles. ₁₃Kana o dies avilo, vo akhardias peske vortakon, ai vo alosardias deš-u-don, kaske vo dias o anav apostoli: ₁₄O Simon, kai akharel les Petri; o Andreas, lesko phral; o Jakob, o Jono, o Filipo, o Bartelemi; ₁₅o Matei, o Tomas, o Jakob, o šiav katar o Alfeo, o Simon, akharen les o Zeloto; ₁₆o Jud, šiav katar o Jakob, ai o Juda Iskariot, kai areslo te bikjinel les.

₁₇Vo vulisto lensa, ai terdilo pe jekh than platsko, kai sas jekh narodo katar leske vortača ai jekh baro narodo anda sa e Judea, anda o Jerusalem, ai anda e Tira ai anda o Sidon pa e rig la mariaki. Von avile t'ašunen leste, ai t'aven sastiarde anda penge nasvalimata. ₁₈Kudala kai sas rimome katar le duxuri bi-vuže sas saste. ₁₉Ai sa o narodo rodelas t'asban les, ke jekh zor anklelas anda leste ai sastiarelas savořen.

₂₀Atunči o Jesus, vazdias le jakha pe le vortača, phenel:

Veseli san tume kai san čoře,

ke e amperetsia le Devleski si tumari!

₂₁Veseli tume kai san bokhale akana,

ke tume avena pravarde!

Veseli tume kai roven akana,

ke tume avena ande e veselia!

₂₂Veseli avena tume, kana le manuš vuřitsina tumen, kana gonina tumen, dena tumen pe o lažiav, ai šiudena tumaro anav sar nai lašio, pala o Šiav le manušesko! ₂₃Veselin tume kudo dies ai isdran dragostar, ke tumaro pokjinimos avela baro ande o čeri; ke kadia lenge dada kerenas karing le profeturi.

₂₆Nasul, kana sa le manuš phenena mištimos pa tumende, ke kadia kerenas lenge dada karing le falši profeturi!

₂₇Numa me phenav tumenge, tumenge kai ašunen mande: Kamen tumare dušmanon, keren mištimos kudalenge kai vuřitsin tumen. ₂₈Svintson kudalen kai den tumen armaia, řudjin kudalenge kai maren tumen. ₂₉T'avela varekon ke malavel tu pe jekh buka, mai sikav leske vi e kaver. T'avela varekon ke lel tjiri bunda, te na des tu palpale te lela vi tjiro gad. ₃₀De ka varekon kai mangel tutar, ai na mai mang palpale tjiro mištimos katar kudo kai lias tutar. ₃₁So tume kamen ke le manuš keren tumenge, keren sa kadia lenge.

₃₂Te kamena tume kudalen kai kamen tumen, so šai avela tumenge? Le bezexale vi von kamen kudalen kai kamen len. ₃₃Te kerena tume mištimos kudalenge kai keren tumenge mištimos, so šai avela tumenge? Le bezexale vi von keren sa jekh fialo. ₃₄Ai t'avela tume te den užile ka kudala kai ažiukeren tume te len palpale lendar, so šai avela tumenge? Le bezexale vi von den užile ka le bezexale, eta te len sa jekh fialo. ₃₅Numa kamen tumare dušmanon, keren mištimos, ai den užile bi t'ažiukeren khanči. Ai tumaro pokjinimos avela baro, ai tume avena šiave kudalesko kai si Mai Vučo, ke vo si lašio kudalenge kai či naisin ai le nasulenge. ₃₆T'avel tumenge mila, sar tumaro Dad si miloso.

₃₇Na den pe e kris, ai tume či avena dine pe e kris; na den strafo, ai tume či avena dine pe o strafo; jertin, ai tume avena jertime. ₃₈Den, ai avela tumen dino: Von dena muial ande e bari pošotsi kai si pe tumaro dži jekh laši mezura, kjidini, miškisardi ai dini opral; ke von mezurina tumenge la mezurasa kai sas tumari.

₃₉Vo phenel lenge vi kadia paramiči: Jekh kořo šai ningerel vo jekhe kořes? Či perena von vi le dui ande jekh groapa? ₄₀O vortako nai vo mai baro sar o birevo; numa sako vortako kai sikiola avela sar o birevo.

₄₁Sostar dikhes tu o sulum kai si ande e jakh tjire phraleski, ai či dikhes tu e beli kai si ande tjiri jakh? ₄₂Vai sar šai phenes tu tjire phraleske: Phrala, muk ma te lav o sulum kai si ande tjiri jakh, tu kai či dikhes e beli kai si ande tjiri? Xoxamno, le angla savořende e beli anda tjiri jakh, ai atunči tu dikhesa sar te les o sulum kai si ande e jakh tjire phraleski.

₄₃Nai jekh lašio kopači kai nai pe leste laše fruti, či jekh čořo kopači te šai del laše fruti. ₄₄Ke sako kopači prinžiaren les katar lake fruti. Či kjiden figi ai či kjiden struguro pe le kanře. ₄₅O manuš o lašio tsirdel laše dieli anda o lašio mandjin peske ilesko, ai o nasul tsirdel nasul dieli anda pesko nasul mandjin; ke si anda o but kai si ande o ilo ke o mui del duma.

₄₆Sostar akharen ma tume Baro, Baro! ai či keren tume so me phenav tumenge? ₄₇Me sikavava tumenge sar miazol o manuš kai avel mande, ašunel muře vorbi ai lel le opre. ₄₈Si jekh fialo sar o manuš kai, vazdel jekh kher, hunadias, hunadias but andre, ai thodias te astardiol pe e stanka. Jekh tasaimos avilo, ai o pai šiudias-pe pe kudo kher, bi te šai miškil les, ke vo sas mišto vazdino. ₄₉Numa kudo kai ašunel, ai či lel ma opre, si jekh fialo sar jekh manuš kai vazdias jekh kher pe e phuv, bi t'avel astarimos. O pai šiudias-pe pe leste; ai vo strazo pelo, ai o phařaimos kudale kheresko si baro.