Matei 20

₁Ke e amperetsia le čereski si jekh fialo sar jekh birevo kheresko kai anklisto avri diminiats, eta te lel butiaren te žian ande leski rez. ₂Vo lias pe lensa pe jekh dinaro pa o dies, ai vo tradias le ande peski rez. ₃Vo anklisto avri karing o iniato časo, ai vo dikhlias kavren kai sas pe o platso bi te keren khanči. ₄Vo phenel lenge: Žian vi tume ande muři rez, ai me dava tumen so avela vorta. ₅Ai von gele. Vo mai anklisto karing mismeri ai karing o trito časo pala mismeri, ai sa kadia kerdias. ₆Anklisto karing o panžto časo, vo arakhlias kavren kai sas pe o platso, ai vo phenel lenge: Sostar bešen tume kathe sa o dies bi te keren khanči? ₇Von dine les palpale: Ke nas khonik te lel ame. Žian vi tume ka muři rez, phenel lenge vo.

₈Kana e riat avili, o birevo la rezako phenel kudaleske kai lel sama: Akhar le butiaren, ai de len lengo lov, katar o mai paluno ži ka o mai angluno. ₉Kudala katar o panžto časo avile, ai line sako jekh dinaro. ₁₀Le mai anglune avile atunči, gindinas pe ke len mai but; numa von line sako jekh dinaro. ₁₁Kana line le, von den duma pe o birevo le kheresko, ₁₂ai phenen: Kadala mai palune kerde butji ferdi jekh časo, ai tu keres anda lende sar anda amende, kai ninkerdiam o kjinuimos le diesesko ai o tatimos. ₁₃Vo dias palpale ka jekh anda lende: Muřo vortako, me či kerav tuke či jekh doš; či ašilian tu mansa pe jekh dinaro? ₁₄Le so si tjiro, ai žiatar. Me kamav te dav kadalen kai si mai palune sode dem tut. ₁₅Nai mange slobodo te kerav muře mištimasa so me kamav? Vai dikhes čoře jakhensa ke me sim lašio? ₁₆Kadia le mai palune avena le mai anglune, ai le mai anglune avena le mai palune.

₁₇Žikin o Jesus anklel ande o Jerusalem, vo lias rigate le deš-u-do vortakon, ai vo phenel lenge pe e vurma: ₁₈Eta, ame anklias ande o Jerusalem, ai o Šiav le manušesko avela dino ande o vast le mai bare rašango židovitsko ai le zakonarengo. Von dena te mudaren les, ₁₉ai von dena les ka kudala kai či patian, te maren mui lestar, te maren les le řaiansa, ai thona les pe o trušul; ai o trito dies vo živindila.

₂₀Atunči e dei katar le šiave katar o Zebedeo pašili paša o Jesus peske do šiavensa, te mangel lestar jekh diela.

₂₁Vo phenel lake: So kames tu?

De ordina, phenel leske voi, ke muře dui šiave te bešen ande tjiri amperetsia, jekh pe tjiri čači ai o kaver pe tjiri stingo.

₂₂O Jesus del palpale: Tu či žianes so tu manges. Šai pena tume o taxtai kai me trubuv te piav?

Ame šai, den von palpale.

₂₃Ai vo del len palpale: Si čačes ke tume šai pena muřo taxtai numa pe kudia so si te bešen pe muři čači vai pe muři stingo, nai kudia mandar, ai le thana avena dine kudalenge kaske muřo Dad garadias le.

₂₄Le deš, ašunde kudia, lias le e xoli pe le dui phral. ₂₅O Jesus akharel le, ai phenel: Tume žianen ke le birevia le themenge maren le, ai ke le bare porončin pe lende. ₂₆Či avela kadia maškar tumende. Numa te varekon kamela t'avel baro maškar tumende, t'avel tumari sluga. ₂₇Ai kon kamela t'avel o mai angluno maškar tumende, t'avel tumaro řobo. ₂₈Kadia o Šiav le manušesko avilo, na te služin les, numa te služil ai te del pesko traio te skipil bute manušen.

₂₉Kana ankliste avri anda o Jeriko, baro narodo gelo pala o Jesus. ₃₀Ai eta, dui koře, bešen pe o berego la vurmako, ašunde ke o Jesus nakhel, ai tsipin: T'avel tuke mila amendar, Baria, Šiav katar o David! ₃₁O narodo ašiavel len; numa von tsipin mai zurales: T'avel tuke mila amendar, Baria, Šiav katar o David!

₃₂O Jesus terdilo, akharel le, ai phenel: So kamen tume te kerav tumenge?

₃₃Von phenen leske: Baria, ke amare jakha te puterdion.

₃₄Lias les e mila, o Jesus asbadias lenge jakha; ai strazo von arakhle o dikhimos, ai gele pala leste.