Matei 23

₁Atunči o Jesus, del duma ka o narodo ai ka peske vortača, phenel: ₂Le zakonaria ai le Farizianuri bešen ai phenen sa o zakono le Mošesko. ₃Keren tume ai len sama sogodi von phenena tumenge; numa na keren sar lende. Ke von phenen, ai či keren. ₄Von phanden so si pharo, ai thon le pe le dume le manušenge, numa von či kamen te miškin o nai. ₅Sogodi von keren kamen te dikhel le o narodo. Kadia, le vorbi svintsi kai si pe lengo čikat ai pe lengo vast si le kuti pria bare, ai si len lunzi čukuri ka lenge tsalia. ₆Lenge drago le mai angluni thana ande le pativa, ai le mai angluni skamina ande le khangeria židovitsko. ₇Lenge drago te den len pozdraimos ande le thana kai si o narodo, ai t'akharen len le manuš Rabi, Rabi. ₈Numa tume, te na akharen tume Rabi; ke jekh si ferdi tumaro birevo, ai tume san sa phral. ₉Ai na akharen khanikas pe e phuv tumaro dad; ke ferdi jekh si tumaro Dad, kudo kai si ande o čeri. ₁₀Te na akharen tumen birevo; ke jekh si ferdi tumaro Birevo, o Kristo. ₁₁O mai baro maškar tumende avela tumari sluga. ₁₂Kon-godi vazdela pe perela tele, ai kon-godi perela tele avela thodino opre.

₁₃Nasul t'avel tumenge, zakonaria ai Farizianuri, athaitoria! Ke tume phandaven le manušenge e amperetsia le čereski, tume inke či dena andre, ai tume či muken te den andre kudalen kai kamen te den andre.

[ ₁₄Nasul t'avel tumenge, zakonaria ai Farizianuri, athaitoria! Ke tume xan sa o mištimos le phivliango, ai ke naročno keren but řudjimata te sikaven ke laše san; anda kudia, tume avena dine pe kris mai zurales.]

₁₅Nasul t'avel tumenge, zakonaria ai Farizianuri, athaitoria! Ke tume našen e maria ai e phuv te roden manušes te pařuven les sar tumende; ai, kana arakhen les, tume keren anda leste du-var mai nasul sar tumende.

₁₆Nasul t'avel tumenge, kai ningeren le kořen ai phenen: T'avela varekon ke solaxal pa o templo, nai khanči; numa, t'avela varekon ke solaxal pa o sunakai le templosko, vo thodias pe te ninkerel so solaxadias. ₁₇Dile ai koře! Savo si o mai baro, o sunakai vai o templo kai svintsil o sunakai? ₁₈Te si varekon, mai phenen tume, solaxal pa o altari, nai khanči; numa, t'avela varekon kai solaxal pa so si pe o altari, vo thodias pe te ninkerel so solaxadias. ₁₉Koře! Savo si o mai baro, so si dino, vai o altari kai svintsil so si dino? ₂₀Kudo kai solaxal pa o altari solaxal pa o altari ai pa sa so si opral. ₂₁Kudo kai solaxal pa o templo solaxal pa o templo ai pa kudo kai bešel andre. ₂₂Kudo kai solaxal pa o čeri solaxal pe o skamin amperatisko le Devlesko ai pa kudo kai bešel pe leste.

₂₃Nasul t'avel tumenge, zakonaria ai Farizianuri, athaitoria! Ke tume pokjinen deš pala jekh šel anda e menta, anda o anel ai anda o kumin, numa tume muken so si o mai baro ande o zakono, e kris, e mila ai o čačimos; kudia sas te keren angla savořende, bi te bustren le kaver dieli. ₂₄Koře kai ningeren le kavren, kai lena avri le tsintsari anda tumaro pimos, ai kai nakhaven jekh gumula.

₂₅Nasul t'aven tumenge, zakonaria ai Farizianuri, athaitoria! Ke tume khosen avrial o taxtai ai o tiari, numa andral von si pherde čorimos ai nasulimos. ₂₆Kořo Fariziano! Khos mai angluno andral o taxtai ai o tiari, eta ke vi avrial t'avel vužio!

₂₇Nasul t'avel tumenge, zakonaria ai Farizianuri, athaitoria! Ke tume miazon sar le groapoševuri parniarde, kai miazon šukar avrial, ai andral si pherde kokala mulenge ai sako fialo mahrime. ₂₈Tume sa kadia, avrial, tume miazon mišto ka le manuš, numa, andral, tume san pherde xoxaimos ai bezex.

₂₉Nasul t'avel tumenge, zakonaria ai Farizianuri, athaitoria! Ke tume vazden le groapoševuri le profetonge ai uriaven le groapoševuri kudalenge kai sas vorta, ₃₀Ai tume phenen: T'ame traisardiamas ande e vramia amare dadengi, ame či geliamas lensa te das muial o rat le profetongo. ₃₁Tume sikaven pe tumende ke tume san le šiave kudalenge kai mudarde le profeton. ₃₂Keren sar kerde tumare dada. ₃₃Sapa, vitsa sapengi! Sar skipina tume katar e jag le bengeski? ₃₄Sa anda kudia, eta, me tradav tumenge profeton, manuš godiaver ai zakonaria. Tume mudarena ai amblavena le unen, tume marena řaiasa le kavren ande le khangeria židovitsko, ai tume mesaina len foro forostar. ₃₅Eta ke te perel pe tumende o rat bi-došalo dino muial pe e phuv, de katar o rat katar o Abel o vorta ži ka o rat katar o Zakaria, šiav katar o Barakia, kai tume mudardian maškar o templo ai o altari. ₃₆Me phenav tumenge čačimasa, sa kudia perela pe kadia vitsa.

₃₇Jerusalem, Jerusalem, kai mudarel le profeton ai kai mudaren bařensa kudalen kai si tute tradine, sodivar me kamlem te kjidav tjire šiaven, sar e khaini kjidel peske puien tela peske phaka, ai tume či kamlian! ₃₈Eta, tumaro kher avela tumenge muklo pusto! ₃₉Ke, me phenav tumenge, tume či mai dikhena ma, žikin či tume phenena: Svintsime t'avel kudo kai avel ande o anav le Bare Devlesko!