Matei 26

₁Kana o Jesus getosardias sa kudala divanuri, vo phenel peske vortakonge: ₂Tume žianen ke e Patradi si t'avel pa dui dies, ai ke o Šiav le manušesko avela dino ande o vast t'avel amblado pe o trušul.

₃Atunči le mai bare raša ai le purane anda o narodo kjidinisaile ande o kimpo ka o baro rašai akharen les Kaifas. ₄Ai von den pe duma sar te keren t'astaren le Jesus xitreniasa, ai te mudaren les. ₅Numa von phenen: Te na avel žikin si o prasniko, te na avel buntuimos maškar o narodo.

₆Sar o Jesus sas ande e Betania, ande o kher ka o Simon o žiungalo nasvalo. ₇Jekh žiuvli pašili paša leste, ninkerelas jekh khoro duxi, sas duxi pria kuč; ai, žikin vo sas ka e skafidi, voi dias muial e duxi pe lesko šero. ₈Le vortača dikhle kudia, xoliaile, ai phenen: So si lašio kado xasarimos? ₉Šai bikjindiamas kadia duxi pria kuč, ai diamas le love ka le čoře.

₁₀O Jesus, lias sama, phenel lenge: Sostar nekežin tume kadala žiuvlia? Voi kerdias jekh laši diela karing mande. ₁₁Tumen si tume sakda le čoře tumensa, numa me či avava sakda tumensa. ₁₂Kai dias muial kadia duxi pe muřo stato, voi kerdias kadia te getol ma pe muřo groapoševo. ₁₃Me phenav tumenge čačimasa, kai-godi kadia laši viasta avela phendi, ande sa e lumia, phenena vi te den pe godji so kadia žiuvli kerdias.

₁₄Atunči jekh anda le deš-u-dui, akharen les o Juda Iskariot, gelo karing le bare raša, ₁₅ai phenel: So kamen tume te den ma, te me bikjinava les tumenge?

Ai von pokjinde leske trianda kotora rup. ₁₆De katar kudia vramia, vo rodelas jekh vramia laši te del ande o vast le Jesus.

₁₇O mai angluno dies katar o prazniko kana xan le manře bi-drosdake, le vortača pušen katar o Jesus, te phenen leske: Kai kames tu te lašiaras tuke o xamos la Patradiako.

₁₈Vo del palpale: Žian ande o foro ka jekh kasavo, ai phenen leske: O Baro phenel: muři vramia aresli; me kerava tute e Patradi muře vortakonsa.

₁₉Le vortača kerde so o Jesus phendiasas lenge, ai von lašiarde e Patradi.

₂₀E riat aresli, vo thodias pe pala e skafidi le deš-u-donsa. ₂₁Žikin von xan, vo phenel: Me phenav tumenge čačimasa, jekh anda tumende bikjinela ma.

₂₂Von si pria nekežime, ai sako lias pe te phenel leske: Sim me kudo, Baria?

₂₃Vo del palpale: Kudo kai thodias mansa o vast ande o tiari, kudo si kai bikjinela ma. ₂₄O Šiav le manušesko žialtar, sar si ramome pa leste. Numa nasul le manušeske kastar o Šiav le manušesko si bikjindo! Mai mišto kudale manušeske te na arakhadinosas.

₂₅O Juda, kai sas te bikjinel les, lias e vorba ai phenel: Sim me kodo, Rabi?

O Jesus del les palpale: Tu phendian.

₂₆Žikin von xan, o Jesus lias o manřo; ai, pala kana řudjisardias, vo phaglias les, ai dias les ka le vortača, phenelas: Len, xan, kado si muřo stato.

₂₇Vo atunči lias jekh taxtai, ai, pala kana řudjisardias, vo dias les lenge, phenelas: Pen, sa tume. ₂₈Ke kado si muřo rat, o rat la patiako, kai si dino muial pala but manuš, te na mai aven len bezexa. ₂₉Me phenav tumenge, me či mai piava de akana anda e fruta la rezaki, ži ka o dies kai me piava mol nevi tumensa ande e amperetsia muři Dadeski.

₃₀Pala ke gjilabade gjilia, von gele ka o plai le Maslinengo.

₃₁Atunči o Jesus phenel lenge: Inke kadia riat, tume si sa te muken man, ke si ramome: me malavava le pastuřes, ai le bakroře avena puřime. ₃₂Numa, kana me živindiva, me avava angla savořende tumendar ande e Galilea.

₃₃O Petri, lias e vorba, phenel leske: Makar ke sa le kaver mukena tu, me či mukava tu šoha.

₃₄O Jesus phenel leske: Me phenav tuke, inke ande kadia riat, angla savořende ke te o kokošo gjilabel, tu tri-var phenesa ke či prinžiares man.

₃₅O Petri del les palpale: Kana te trubula te merav tusa, me šoha phenava ke či prinžiarav tu.

Ai sa le vortača phende sa jekh fialo.

₃₆Pe kudia, o Jesus gelo lensa ande jekh than kai akharen les Getsemane, ai vo phenel le vortakonge: Bešen kathe, žikin me duriuvav te řudjiv.

₃₇Vo lias pesa le Petri ai le do šiaven katar o Zebedeo, ai les lias les o nekežimos ai e dar. ₃₈Vo phenel lenge: Muřo duxo si nekežime ži ka o merimos; bešen kathe, ai len sama mansa.

₃₉Porme, gelo uni pašuri angle, vo pelo pe peski fatsa, ai řudjisardias kadia: Muřo Dad, te šai daštil, ke kado taxtai te duriol mandar! Numa, na so me kamav, numa so tu kames.

₄₀Ai vo avel karing le vortača, ai arakhel le sar soven, ai vo phenel ka o Petri: Tume naštisardian te len sama mansa jekh časo! ₄₁Len sama ai řudjin, eta tume te na peren ande o zumaimos; o duxo le manušesko si lašio numa o mas si kovlo.

₄₂Vo mai durilo jekh duito data, ai řudjisardias kadia: Muřo Dad, te naštila ke kado taxtai duriol mandar bi ke te piav les, t'avel sar tu kames! ₄₃Vo mai avilo, ai mai arakhlias le sar soven; ke lenge jakha sas phare.

₄₄Vo muklias le, ai duriol, vo řudjisarel pe e trito data, phenel sa jekh fialo. ₄₅Porme vo gelo karing peske vortača, ai phenel lenge: Tume soven akana, ai tume hodinin! Eta, o časo pašilo, ai o Šiav le manušesko avela dino ande le vast le bezexalenge. ₄₆Ušten, žias; eta, kudo kai bikjinel ma pašiol.

₄₇Sar vo mai delas duma, eta, o Juda, jekh anda le deš-u-dui, avel, ai lesa baro narodo si len xanře ai rovlia, tradine katar le bare raša ai katar le purane anda o narodo. ₄₈Kudo kai bikjindias les lenge dias kako semno: Kas me čimidava, vo si, len les. ₄₉Strazo, pašilo paša o Jesus, vo phenel: Unpači Rabi!

Ai vo čimidias les.

₅₀O Jesus phenel leske: Muřo vortako, so tu avilian te keres, ker les.

Atunči kudala žene avile angle, thode o vast pe o Jesus, ai line les. ₅₁Ai eta, jekh anda kudala kai sas le Jesusosa vazdias o vast, ai tsirdias pesko xanřo; vo maladias la sluga katar o baro rašai ai peradias lesko kan. ₅₂Atunči o Jesus phenel leske: Tho tjiro xanřo palpale; ke sa kudala kai lena o xanřo xasavona katar o xanřo. ₅₃Gindis-tu tu ke me naštiv t'akharav muře Dades, kai dela man akana strazo deš-u-dui armi andželi? ₅₄Sar te aresen čače le Ramomata? Ke von phenen ke trubul t'avel kadia.

₅₅Ande kudia vramia o Jesus phenel le narodoske: Tume avilian, sar pala jekh řobaš, le xanřensa ai le rovliansa, te len man. Me bešavas sako dies tumensa, sikiaravas ande o templo, ai tume či lian man. ₅₆Numa sa kadia areslo eta ke te le Ramomata katar le profeturi t'aresen čače.

Atunči le vortača mukle les, ai našle.

₅₇Kudala kai line le Jesus ningerde les ka o baro rašai Kaifas, kai le zakonaria ai le purane sas kjidine. ₅₈O Petri gelo pala leste dural ži ande o kimpo ka o baro rašai, dias andre, ai bešlo tele le slugensa, te dikhel so te getol pe.

₅₉Le bare raša ai sa e kris židovitsko rodenas uni falši martururi pe o Jesus, dosta te mudaren les. ₆₀Numa či arakhle, makar ke uni falši martururi sikadile. Eta, avile dui, kai phenen: ₆₁Kado phendias: Me šai phařavav o templo le Devlesko, ai vazdava les ande trin dies.

₆₂O baro rašai uštilo ai phenel leske: Či des tu khanči anglal so kadala manuš phenen pe tute?

₆₃O Jesus bešel muto. Ai o baro rašai lias e vorba, phenel leske: Me mangav tu, katar o Del o živindo, te phenes amenge te san tu o Kristo, o Šiav le Devlesko.

₆₄O Jesus del les palpale: Tu phendian. Mai but, me phenav tumenge: tume dikhena d'akanara sar o Šiav le manušesko bešel pe e čači rig katar o Del o zuralo, ai avel pe le nuveria le čereske.

₆₅Atunči o Baro rašai šindias peske tsalia, phenelas: So prasaimos! So mai trubul amen martururi? Eta, tume ašundian lesko prasaimos. ₆₆So miazol tumenge?

Von den palpale: Trubul vo mudardo.

₆₇Pe kudia, von čungarde les pe o mui, ai dine les dukhuma ai palmi pe o mui, phenenas: ₆₈Kristo, phen so avela; phen amenge kon maladias tu.

₆₉Numa, o Petri bešelas avri ande o kimpo. Jekh sluganka pašiol paša leste, ai phenel: Vi tu, tu sanas le Jesusosa anda e Galilea.

₇₀Numa vo del palpale angla sa, phenelas: Me či žianav so tu phenes.

₇₁Sar vo žialas karing o vudar, jekh kaver sluganka dikhlias les, ai phenel kudalenge kai si kothe: Vi kado sas le Jesusosa anda o Nazaret.

₇₂Vo mai dias palpale, solaxasa: Me či prinžiarav kudale manušes.

₇₃Tsiřa pala kudia, kudala kai sas kothe, pašile, phenen ka o Petri: Čačes ke vi tu san anda kudala žene, ke prinžiaras tu pala tjiro glaso.

₇₄Atunči vo thodias pe te prasal ai te solaxal: Me či žianav kudale manušes.

Strazo o kokošo gjilabadias. ₇₅Ai o Petri dias pe godji ka le vorbi le Jesusoske kai phendiasas: Angla savořende ke te o kokošo gjilabel, tu phenesa tri-var ke či prinžiares man. Ai vo anklisto avri, vo rovel zurales.