Matei 5

₁Dikhel pe o narodo, o Jesus anklisto pe o plai; ai, pala ke bešlo tele, leske vortača pašile paša leste. ₂Porme, puterdias o mui, vo sikiarel le, ai phenel:

₃Veseli t'aven le čoře ande o duxo, ke e amperetsia le čereski si lengi!

₄Veseli t'aven le nekežime, ke avena len mila!

₅Veseli le prosti, ke lenge avela e phuv!

₆Veseli kudala kai si bokhale ai trušale anda e kris, ke von avena pravarde!

₇Veseli le milosi, ke avela mila anda lende!

₈Veseli kudala kai si lengo ilo vužio, ke von dikhena le Devles!

₉Veseli kudala kai keren e patia, von avena akharde šiave le Devleske!

₁₀Veseli kudala kai avena marde ke von keren sar o Del mangel, ke e amperetsia le čereski si lengi!

₁₃Tume san o lon la phuviako. Numa t'avela ke o lon xasarel pesko gusto, sar šai londiarela les? Vo manai lašio ferdi te šiuden les avri, ai te avela inčardo tela le punře katar le manuš.

₁₄Tume san e vedaria la lumiaki. Jekh foro thodino pe jekh plai naštil t'avel garado; ₁₅ai či den jag jekh lampa te thon les tela e vadra, numa thon les pe e vadra, ai vo strefial sa sogodi si ande o kher. ₁₆Ke te tumari vedaria te strefial kadia angla le manuš, eta te dikhen tumare laše dieli, ai te luvudin tumare Dades kai si ande o čeri.

₁₇Na gindin tume ke me avilem te dav rigate o zakono vai le profeton. Me či avilem te šiudav, numa te sikavav lengo pherdo čačimos. ₁₈Me phenav tumenge čačimasa, žikin o čeri ai e phuv či nakhena, či bilala katar o zakono ferdi jekh vorba vai jekh bukva, žikin či sa aresela. ₁₉Kudo kai lela tele jekh anda le mai tsinoře poronki, ai kai sikiarela le manušen te keren kadia, avela akhardo o mai tsinořo ande e amperetsia le čereski, numa kudo kai lela len opre, ai kai sikiarela te len le sama, kudo avela akhardo baro ande e amperetsia le čereski. ₂₀Ke, me phenav tumenge, ke tumari kris te na nakhavela e kris le zakonarengi ai le Farizianongi tume či dena andre ande e amperetsia le čereski.

₂₁Tume ašundian ke sas phendo ka le purane: Tu či mudaresa; kudo kai mudarel trubul t'avel dino strafo. ₂₂Numa me, phenav tumenge ke varekon kai xoliavol pe pesko phral trubul t'avel dino strafo katar le krisinitoria; kudo kai phenela peske phraleske: «Prosto!» trubul t'avel dino strafo katar e bari kris; ai ke kudo kai phenela leske: «Dilo!» trubul t'avel dino strafo katar e jag le merimaski. ₂₃T'avela te sikaves so des ka o altari, ai ke kothe des tu godji ke tjiro phral si les vareso pe tute, ₂₄muk kothe sode te des angla o altari, ai žia angla savořende te lašiardios tjire phralesa; porme, aidi ai de tjiri podarka.

₂₅Lašiardo sigo tjire dušmanosa, žikin san pe e vurma lesa, daratar ke del tu ka o krisinitori, ke o krisinitori del tu ka o fitsiri la krisako, ai ke thon tu ande o temnitsa. ₂₆Me phenav tumenge čačimasa, tu či anklesa avri kothar žikin či pokjinesa e mai paluni palianka.

₂₇Tume ašundian ke sas phendo: Tu či keresa kurvetsia. ₂₈Numa me, phenav tumenge ke varekon kai dikhel pe jekh žiuvli te gindil-pe pe late vo vuže kerdia kurvetsia lasa ande pesko ilo. ₂₉T'avela tjiri jakh e čači ke šai peravel tu, ankalav la avri ai šiude la dur tutar; ke mai mišto avela tuke ke jekh jakh ferdi anda tute xasavol, ai ke tjiro stato sa te na avel šiudino ande e jag le merimaski. ₃₀Ai t'avela tjiro vast o čačo ke šai peravel tu, šin les ai šiude les dur tutar: ke mai mišto avela tuke ke jekh vast ferdi anda tute xasavol, ai ke tjiro stato sa te na avel šiudino ande e jag le merimaski.

₃₁Sas phendo: Ke kudo kai del palpale peska řomnia te del la jekh lil ke muklias la. ₃₂Numa me, phenav tumenge ke kudo kai mukel peska řomnia, ferdi te na ke dias pes pe o lažiav, kerel ke aresli kurva, ai kudo kai lel jekha řomnia šiudinia kerel jekh kurvetsia.

₃₃Tume mai ašundian ke sas phendo ka le purane: Tu či solaxasa xoxamnes, numa tu desa karing o Baro so tu phendias solaxasa. ₃₄Numa me, phenav tumenge te na solaxan či jekh fialo, či pa o čeri, ke si o skamin amperatosko le Devlesko; ₃₅či pa e phuv, ke si kai vo thol peske punře; či pa o Jerusalem, ke si o foro le bare amperatosko. ₃₆Na solaxa či pe tjiro šero, ke tu naštis te keres parno vai kalo ferdi jekh anda tjire bal. ₃₇Ke tjiri vorba t'avel ei, ei, niči, niči; so thon opral avel katar o Xitro.

₃₈Tume ašundian ke sas phendo: Jakh pala jakh, ai dand pala dand. ₃₉Numa me, phenav tuke te na malaves palpale kudales kai kerel tuke nasul. T'avela varekon kai del tut palma pe e buka e čači, muk les te del tu vi pe e buka e stingo. ₄₀T'avela varekon te kamel te kerel kris pe tute, ai te lel tjiro tsolo, mai muk leske vi tjiri bunda. ₄₁T'avela varekon te zuriarel tu te žial lesa jekh kilometro, žia dui lesa. ₄₂De ka kudo kai mangel tutar, ai na de tu palpale katar kudo kai mangel te lel tutar vužile.

₄₃Tume ašundian ke sas phendo: T'avel tuke drago tjiro vortako, ai te vuřitsis tjire dušmanos. ₄₄Numa me, phenav tumenge: Kamen tumare dušmanon, svintsin kudalen kai den tumen armaia, keren mištimos kudalenge kai vuřitsin tumen, ai řudjin kudalenge kai keren tumenge nasul ai kai maren tumen. ₄₅Eta tume t'aven šiave tumare dadeske kai si ande o čeri; ke vo uštiavel pesko kham pe le nasul ai pe le laše, ai vo del brišin pe le vorta ai pe le nai vorta. ₄₆Te kamena tume kudalen kai kamen tumen, so šai nirina tume? Kai kjidel e taksa le amperatoske či kerel vi vo kadia? ₄₇Ai te dena tume pozdraimos ferdi le phralen, keren tume vareso šodo? Kai či patian či keren von sa kadia? ₄₈Aven tume vorta, sar tumaro Dad čeresko si vorta.