Matei 9

₁O Jesus, anklisto ande jekh čuno, nakhlias e maria, ai gelo ande pesko foro. ₂Ai eta, ande leske jekhe paralitikos sovel pe jekh pato. O Jesus, dikhlias lengo patiamos, phenel le bangeske: Av veselo, muřo šiav, tjire bezexa si jertime.

₃Pe kudia, uni zakonaria phenen ande pende: Kado manuš prasal.

₄Ai o Jesus, žianelas lenge ginduri, phenel: Sostar si tumen nasul ginduri ande tumare ile? ₅Ke, so si mai mišto, te phenes: Tjire bezexa si jertime, vai te phenes: Ušti, ai phir? ₆Eta, te žianen ke o Šiav le manušesko si les pe e phuv e putiaria te jertil le bezexa:

Ušti, phenel vo le bangeske, le tjiro pato, ai žia ande tjiro kher.

₇Ai vo uštel, ai gelo ande pesko kher. ₈Kana o narodo dikhlias kudia, lias len e dar, ai von vestin le Devles, kai dias ka le manuš kasavi putiaria.

₉Kothar gelotar mai angle, o Jesus dikhlias jekhe manušes bešel kai trubulas te pokjinen e taksa, ai kai akharen les Matei. Vo phenel leske: Av mansa.

Kudo manuš uštilo, ai gelo pala leste.

₁₀Sar o Jesus sas pala e skafidi ande o kher, eta, but kai kjiden e taksa le amperatoske ai žene kai nai lengo traio lašio avile te thon pe pala e skafidi lesa ai leske vortakonsa. ₁₁Le Farizianuri dikhle kudia, ai phenen ka leske vortača: Sostar tumaro birevo xal vo kudalensa kai kjiden e taksa ai le ženensa kai nai lengo traio lašio?

₁₂Sar o Jesus ašundias, vo phenel: Nai kudala kai si saste ke trubul le doxtoro, numa le nasvale. ₁₃Žian, ai sikion so si kudia: Me mangav o mištimos, ai na te šinaven le žigenien. Ke me či avilem pala kudala kai si vorta, numa pala le bezexale.

₁₄Atunči le vortača katar o Jono avile paša o Jesus, ai phenen: Sostar ame ai le Farizianuri postin but, žikin tjire vortača či postin?

₁₅O Jesus del le palpale: Le vortača le terneske ande o abiav šai nekežin von žikin o terno si lensa? Le dies avena kana o terno lena les lendar, atunči von postina.

₁₆Khonik či suvel jekh purano tsolo jekhe kotoresa nevo; ke kudo kotor ankalavela jekh partia le tsoloski ai e groapa ašela mai bari.

₁₇Či mai thona vi e mol nevi ande le bočonkuri purane; aver fialo, le bočonkuri phaglion, e mol pitial, ai le bočonkuri xasardile; numa thon e mol nevi ande le bočonkuri neve, ai e mol ai le bočonkuri garaven sa.

₁₈Žikin vo phenel kudala vorbi, eta, jekh birevo aresel, bangilo angla leste, ai phenel: muři šei muli de jekh tsiřa vramia; numa aidi, tho pe late le vast, ai voi traila.

₁₉O Jesus uštilo, ai gelo pala leste peske vortakonsa.

₂₀Ai eta, jekh žiuvli kai xasavol lako rat de deš-u-dui berš pašili palal, ai asbadia tele lesko tsolo. ₂₁Ke voi phendias ande peste: Te šai ferdi t'asbav lesko tsolo, me sastiuvava.

₂₂O Jesus amboldias pe, ai phenel, kai dikhlias la: Av veselo, muři šei, tjiro patiamos sastiardias tu.

Ai kudia žiuvli sastili ande kudo časo.

₂₃Kana o Jesus areslo ka o kher le birevosko, ai ke ašundias kai gjilaben ande le tuturiazi ai o narodo kai tsipil, ₂₄vo phenel lenge: Žiantar; ke e terni šei nai muli, numa voi sovel.

Ai von marde mui lestar. ₂₅Kana o narodo sas tradino, vo dias andre, lias o vast la ternia šako, ai e terni šei uštili. ₂₆E viasta geli ande sa kudia rig.

₂₇Gelotar kothar, o Jesus gele pala leste dui koře, kai tsipinas: T'avel tuke mila anda amende, Šiav katar o David!

₂₈Kana aresle ka o kher, le koře pašile paša leste, ai o Jesus phenel lenge: Gindin tume ke me šai kerav kudia?

Ei, Baria, den von palpale.

₂₉Atunči vo asbadias lenge jakha, phendias: T'avel tumenge sar si tumaro patiamos.

₃₀Ai lenge jakha puterdile. O Jesus phendias lenge kadia zurales: Len sama ke te khonik te na žianel.

₃₁Numa, sar von ankliste avri, von dine duma pa leste ande sa o them.

₃₂Sar von žianastar, eta, andine ka o Jesus jekhe bengailes mute. ₃₃O demono sas dino avri, o muto dias duma. Ai o narodo sas lenge šodo, phenenas: Šoha kasavi diela či dikhilias ande o Israel.

₃₄Numa le Farizianuri phenen: Si katar o prinso le demonongo ke vo del avri le demonon.

₃₅O Jesus nakhel ande sa le foruri ai le gava, sikiarelas ande le khangeria židovitsko, phenelas e laši viasta la Amperetsiaki, ai sastiarelas sa le nasvalimata ai le bangimata. ₃₆Dikhlias o narodo, lias les mila lendar, ke von sas nekežime ai perade, sar le bakroře kai nai le kai lel sama lendar. ₃₇Atunči vo phenel ka peske vortača: But barilias, numa nai dosta butiaria. ₃₈Řudjin tume le birevos le kjidimasko te tradel butiaren te kjiden.